شارپرێس: نیقاش
لەشارۆچكەی سەیدسادق پیاوێك هەیە هەر بووە بەعادەت بەلای هەركەسێكدا بڕوات پرسیاری سەعاتی لێدەكەن، چونكە بەهرەیەكی سەیری لەزانینی ژمارەو هەستكردن بەكاتدا هەیە.
رزگار ئیبراهیم حەمە ئەمین، پیاوێكی تەمەن (42) ساڵەو لەقەزای سەیدسادقی خۆرهەڵاتی سلێمانی نیشتەجێیە، وەك خۆی دەڵێت 25 ساڵی رەبەقە سەعاتی لەدەست نەكردووە، كەچی گەر پرسیاری كاتی لێبكەیت بەچركەو خولەك‌و سەعات دەیزانێت.
رزگار بەبابەتی زانینی كات ئەوەندە ناوبانگی دەركردووە تا نازناوی "سەعاتەی سەیدسادق"یان لێنراوە، بۆ خەڵكی شارۆچكەكە وایلێهاتووە تەنانەت ئەگەر كەسێك سەعاتیشی لەدەستدا بێت، زیاتر باوەڕ بەو كاتە دەكات، كە رزگار دەیڵێت، نەك ئەوەی سەعاتەكەی دەستی پێی دەڵێت.
رزگار خۆیشی نازانێت ئەم بەهرەیە چۆن فێربووە، بەڵام بیری نایەت رۆژێك لەرۆژان بۆ چركەیەكیش هەڵەی لەكاتدا كردبێت، لەمڕووەوە دەڵێت "هەموو رۆژێك نزیك بە 150 كەس پرسیاری كاتم لێدەكەن‌و بەوردی وەڵامی هەموویان دەدەمەوە".
نە ئاستی خوێندەوارییەكەی‌‌و نە پیشەكەی یارمەتی ئەم بەهرەیەی رزگاریان نەداوە، چونكە ئەو تا پۆلی چواری سەرەتایی خوێندووەو ئێستا رۆژانە خەریكی كرێكارییەو بژێوییەكی خوار مامناوەندی هەیەو نەیپەرژاوەتە سەر خوێندن‌و خوێندنەوە.
نەك هەر بۆ كاتی عێراق، بەڵكو پرسیاری كاتی هەر وڵاتێك لەرزگار بكەیت دەم‌و دەست وەڵام دەداتەوە، بۆ تاقیكردنەوەش پەیامنێری "نیقاش" پرسیاری كاتی ئێران‌و توركیاو بەریتانیاو چەند ویلایەتێكی ئەمەریكای لێكرد، یەكسەر هەمووی وەڵامدایەوەو كاتێكیش پەیامنێرەكە بە مۆبایلەكەی بەراوردی كرد، كاتەكان راست دەرچوون.
وانەبێت رزگار هەر لەكاتدا شارەزا بێت، بەڵكو هەر شتێك پەیوەندی بەپێوانەوە هەبێت باش سەری لێدەردەكات، بۆ نموونە دەزانێت دووری نێوان قەزای سەیدسادق‌و زۆربەی شارو شارۆچكەكانی دیكەی كوردستان چەندەو دەم‌و دەست حیسابی دەكات بەئۆتۆمبێل‌و پیادە رۆیشتن ماوەی چەندی دەوێت.
رزگار دەڵێت "بەخەڵكیم وتووە ماوەی نێوان قەزای سەیدسادق‌و پێنجوێن 45 كیلۆمەترەو بەپیادەرۆیی بەشەش سەعات دەبڕدرێت، هەروەها ماوەی نێوان سلێمانی‌‌و سەیدسادق هەشت سەعاتی رۆیشتی پێی دەوێت، لەگەڵ چەندین ناوچەی دیكەش، كاتێك تاقیشكراوەتەوە هەموو قسەكانی من راست دەرچوون".
بۆ راست‌و دروستی ئەم قسانەش پەیامنێری "نیقاش" گفتوگۆی لەگەڵ چەندین كەسایەتی دیارو ناوداری شارۆچكەكەدا كردو هەموویان ئەو زانیارییانەیان پشتڕاستكردەوە.
خەڵەف ئەحمەد پەرلەمانتاری كوردستان‌و دانیشتوی شارۆچككەكە بە"نیقاش"ی وت "رزگار بەهرەیەكی خوایی هەیە كە هەموو شتێك لەبارەی كات‌و پێوانەوە دەزانێت، ئاگادارین زۆربەی شارۆچكەكانی ئەم دەوروبەرەی بەپێ بڕیوەو بێ ئەوەی سەعاتی لەدەستدا بێت كاتەكەی حیساب كردووەو راست دەرچووە".
رزگار وەك خۆی دەڵێت بۆ بیست ساڵیش دەچێت لەماوەی شەوو رۆژێكدا تەنیا یەك كاتژمێر دەخەوێت، دەشڵێت "كاتێك خەڵكی دەخەون من بەدرێژایی شەو بیر لەكات‌و پێوانەو حیسابات دەكەمەوە، ئەگەر یەكێك مانگ‌و ساڵی لەدایكبوونی خۆیم پێ بڵێت یەكسەر پێی دەڵێم چەند سەعات‌و دەقیقە ژیاوە".
لەمەشدا پەیامنێری "نیقاش" چەند تەمەنێكی جیاوازی پێوت، یەكسەر هەموویانی بەوردی دەوت، بەڵام ئێمە پێویستمان بەمۆبایلەكەمان بوو بۆ ئەوەی ئەو ژمارانە لێك بدەین، دەركەوت هەمووی راست وتووە.
هەموو رۆژێك چەند سەعاتێكی رزگار بۆ كاری كرێكارییەو باقییەكەی بەشی زۆری بەگەڕان‌و پیادەڕۆیی‌‌و وەڵامدانەوەی پرسیاری خەڵكی شارۆچكەكەیەوە بەسەردەبات.
عومەر عەلی شوێنی فرۆشتنی كەلوپەلی بیناسازی هەیە لەسەیدسادق‌و چەند ساڵێكە رزگار لای ئەو كاردەكات، ئەو سەیری بەتواناكانی دێت‌و دەڵێت "رۆژی وا هەبووە بەتەنیا یەك لۆری چیمەنتۆی داگرتووە بەبێ ئەوەی بەهیچ شێوەیەك هەست بەماندوێتی بكات".
دەشڵێت "چەند ساڵێكە رزگار وەڵامی كات‌و پێوانەی خەڵكی دەداتەوەو جارێك لێم نەبیستووە حیسابەكانی غەڵەت بێت‌و زیادو كەمیان هەبێت".
یەكێكی دیكە لەبەهرە سەیرەكانی دیكەی رزگار ئەوەیە وەك خۆی دەڵێت پێش ئەوەی زەنگی مۆبایلەكەی لێبدات دەزانێت تەلەفۆنی بۆ دێت‌و دەتوانێت ئاڕاستەكەی دیاریی بكات كە تەلەفۆنەكە لەكوێوە دێت‌و زۆربەی جاریش دەزانێت ئەو كەسەی تەلەفۆنی بۆ دەكات كێیە.
كەمال نەسرەدین كە شارەزایەكی بواری ئایتی‌‌و نێتۆركەو لەقەزای سەیدسادق دەژی، بابەتی هەستكردن بەشەبەكەی مۆبایل ناچێتە عەقڵییەوەو روونی دەكاتەوە كە لەرووی زانستییەوە ئەمە رووی تێناچێت.
كەمال بە"نیقاش"ی وت "رێی تێناچێت كەسێك هەبێت بتوانێت هەست بەسیگناڵی مۆبایل بكات، من نازانم ئەوەی ئەم پیاوە باسی دەكات تا چەند دروستە".
لەگەڵ ئەوەی بابەتی مۆبایلەكە هیچ پێوەرێكی زانستی نییە، بەڵام لەو كاتەی رزگار قسەی بۆ پەیامنێری "نیقاش" دەكرد كەمێك وەستاو وتی: "ئەوە كوڕەكەم ئێستا تەلەفۆن دەكات" بەدەستی هێمای بۆ لای راستی خۆی كردو وتی "ئا لەم جێیەشەوە تەلەفۆن دەكات".
تازە لەو قسانەی تەواو بووبوو كە دەنگی زەنگی مۆبایلەكەی هات، دەستی بۆ گیرفانی شڕواڵەكەی بردو دەریهێناو پیشانی داین كە ئەوە كوڕەكەیەتی، ئەو قسەی خۆی كرد، بەڵام ئێمە نە لەكەسی ناو تەلەفۆنەكەو نە لەئاڕاستەی تەلەفۆنەكە دڵنیا نەبووینەوە.
