كەمی ژمارەیان بایەخی نەهێشتوون.. كامپی ئاوارەكان چتر رووگەی قەوارە‌و كاندیدەكان نین

sharpress.net

375 جار خوێندراوه‌ته‌وه

05/05/2018‌

شارپرێس: نیقاش
پێدەچێت كامپی ئاوارەكان، كە لەهەڵبژاردنی پێشوودا رووگەیەكی گرنگی كاندیدەكان بوون، ئەو بایەخەیان نەمابێت، ئەم دۆخەش ئەو ئاوارانەی توڕەكردووە كە چاویان لەسەر گۆڕانكارییە.

كاتێك بۆ یەكەم جار بەنێو كامپی ئاوارەكاندا لە عامرییەی سمود (30 كم لەباشووری شاری فەلوجە) دەگەڕێیت، وا هەست دەكەیت لە سنوور پەڕیویتەوە بەرە‌و دەوڵەتێكی تر كە خۆی بۆ هەڵبژاردنێكی نزیك ئامادە ناكات، چونكە ناكرێت قەبارەی بانگەشەی هەڵبژاردن لەكامپەكاندا بەو پۆستەر‌و لافیتانە بەراورد بكرێت كە بەشێوەیەكی سەرنجڕاكێش لە هەردوو بەری رێگا لاوەكی‌و سەرەكییەكان لە سەرتاسەری وڵاتدا بڵاوبوونەتەوە.

دوای ئۆپراسیۆنەكانی ئازادكردنی شارەكانی پارێزگاكە لە چنگی داعش، زیاتر لە 30 كامپ لە بیابانی عامرییەی سمود دروست كراون كە دەیان هەزار ئاوارە لەخۆدەگرن، هەر كە حكومەتی عێراقیش توانی ژێرخانی هەندێك لە شارەكان ئامادە بكاتەوە نزیكەی 60%یان گەڕانەوە بۆ شارەكانیان، ژمارەی ئەو ئاوارانەش كە ماون نزیكەی (3500) ئاوارە دەبن بەپێی وتەی بەڕێوەبەرایەتی ناوەندی كامپەكانی عامرییەی سمود.

كامپی ئاوارەكان كە سادەترین هۆكارەكانی ژیانیان تێدا نییە، هەموویان خاڵین لە پۆستەر‌و ریكلام تەنیا چەند وێنەیەكی كەم نەبێت كە بڵاوكراونەتەوە بەسەر تانكی ئاو‌و هەندێك ستوونی كارەبا‌و لە دەروازەی هەر كاپێكیشدا چەند لافیتەیەك هەن كە دیارە بە بێ بایەخی‌و سەرپەرشتی دانراون وەك ئەوەی دەست بەسەر ئەم كامپە یان ئەو كامپەدا گیرابێت بۆ هەندێك لە حزبە سیاسییەكان.

یاسر مەحلاوی (43 ساڵ) یەكێكە لە ئاوارەكانی قەزای قائیم (450 كم لە خۆرئاوای بەغدای پایتەخت) پێی وایە كارێكی راستی كردووە كە زانیارییەكانی نوێكردووەتەوە‌و كارتی نوێی دەنگدانی وەرگرتووەتەوە كە دەتوانێت بەشداری پێبكات لە هەڵبژاردنی داهاتوودا.

مەحلاوی قسەی بۆ "نیقاش" كرد‌و وتی: "ئەگەر لەو ریكلامە كەمانە وردبیتەوە كە لەنێو خێمەكانماندا بڵاوبوونەتەوە دەبینیت هی ژمارەیەكی كەمی كاندیدەكانن كە لە پەنجەی دەست تێپەڕ ناكەن، ئەگەرچی تەنیا كاندیدانی پارێزگای ئەنبار (800) كاندیدن، ئامادەنەبوونی ئەم كاندیدانە‌و بانگەشەكانیان لە كامپەكانماندا ئاماژەیە بۆ پیلانێك كە هەوڵ دەدات مافی هەڵبژاردنی نوێنەرانمان لێ زەوت بكات".

دەشڵێت: "پێیان وایە بە هەندێك رێوشوێن‌و ئاستەنگ دەتوانن كاریگەری لەسەر باوەڕمان دروستبكەن تا دەنگ بە هەندێك كەسایەتی بدەین كە ریكلامەكانیان بە خێمەكانماندا هەڵواسراون، بەڵام نازانن ئێمە كەس هەڵنابژێرین ئەوانە نەبن كە باوەڕمان وایە لەم واقیعە تاڵە دەرمان دەهێنن".

وتیشی: "هەر زوو چووم بۆ نوێكردنەوەی زانیارییەكانم تا كارتی دەنگدان وەربگرم كە لەكاتی هەڵاتنم لەشارەكەم لە ژێر دەسەڵاتی داعش ونم كردبوو، هەرچەندە دەزانم كە دەنگەكانی ئێمەی ئاوارە جێی بایەخی كاندیدەكان نییە بەهۆی كەمی ژمارەمان، بەڵام من بەنیازم ئەو كەسە گونجاوە هەڵبژێرم كە لەگەڵیدا دەتوانین دەموچاوە گەندەڵەكان دووربخەینەوە".

رەوتی بانگەشەی هەڵبژاردن تەنیا بە لافیتەی ریكلامەوە ناوەستێت، بەڵكو پەلدەكێشێت بۆ رێكخستنی ئەو كۆنگرە‌و چالاكیانەی ئاڕاستەی هاووڵاتیان دەكرێن لە هەموو شارێكدا، تەنیا كامپی ئاوارەكان نەبێت كە نەچووەتە نێو لیستی كاری لەپێشینەی قەوارە سیاسییەكان تەنانەت خاڵیشن لە هەر چالاكییەكی بانگەشە كە وێنەی سیاسی هەندێك لە كاندیدەكان بۆ دەنگدەران روون بكاتەوە.

عامر خەلیفاوی (38 ساڵ) یەكێكە لە دانیشتووانی شاری رومادی‌و تا ئێستاش لە كامپدا دەژی بەهۆی چەند دۆسێیەكی ئەمنییەوە كە رێگرن لە گەڕانەوەی بۆسەر زێدی خۆی، ئەو كارتی دەنگدانی هەیە، بەڵام هێشتا شارەزای میكانیزمی پرۆسەی دەنگدان نییە ئەمە جگە لەوەی ناوی كاندیدە نوێیەكان یان بەرنامەی هەڵبژاردنیان نازانێت.

خەلیفاوی قسەی بۆ "نیقاش" كرد‌و وتی: "ئەو بانگەشەیەی هەڵبژاردن كە لەنێو ئەم كامپانەدا دەیبینین ئاماژەی خواستێكی راستەقینە نییە بۆ كاركردنی راستگۆیانە، ئەگەر راستگۆ بوونایە ئەوا ریكلامەكانیان هاوتای ئەو ریكلامانە دەبوون كە خودی خۆیان لە هەڵبژاردنی 2014دا بانگەشەیان بۆ دەكرد ئەو كاتەی هەڵپەیان بوو بۆ كامپەكانی ئاوارەكان لە باكووری عێراق‌و پێش ریكلام‌و پۆستەرەكانیشیان یارمەتی دارایی‌و ماددییان دەنارد".

هەروەها وتی: "ئێمە لەدەرەوەی بازنەی گرنگیپێدانی قەوارە سیاسییەكان‌و كاندیدەكانیان‌و كۆمسیۆنی باڵای سەربەخۆی هەڵبژاردنیشداین، هەموویان هەوڵێكیان نەداوە یارمەتیمان بدات بۆ ئاشنابوون بە میكانیزمی دەنگدان یاخود بەرنامەی كاندیدەكان، ئێمە دەزانین كە بودجەی زەبەلاح خەرج دەكرێت بۆ راكێشانی دەنگدەری عێراقی یاخود هۆشیاركردنەوەی سەبارەت بەوەی لەرۆژی دەنگداندا دەبێت چی بكات".

موسڵیح جومەیلی یەكێكە لە كاندیدەكانی شاری رومادی بۆ ئەنجومەنی نوێنەرانی داهاتوو، پێی وایە وێنەكە سەبارەت بە مەسەلەی بانگەشەی هەڵبژاردن‌و میكانیزمەكانی بەئامانجگرتنیان یان راكیشانیان، شێوێندراوە، دووپاتیشی دەكاتەوە كە دەنگی ئاوارەكان گرنگە‌و دەكرێت رۆڵێكی گەورە بگێڕن لەو گۆڕانكارییەی ئامانجی هەمووانە.

جومەیلی بە "نیقاش"ی وت: "ناكرێت دەستبەرداری یەك دەنگی دەنگدەران ببین، نەبوونی ریكلامەكانیشمان لە كامپی ئاوارەكاندا بەتایبەتی لە عامرییەی فەلوجە دەگەڕێتەوە بۆ ئەوەی بەپێی راپرسی‌و تێبینییە مەیدانییەكان باوەڕمان وایە دەنگی دەنگدەران لەو كامپانەدا قۆرغكراون بۆ چەند لایەنێكی دیاریكراو كە هەژموونی عەشایری‌و حزبییان لە ناوچەكانی عامرییەی سموددا هەیە بە كامپەكانیشەوە".

وتیشی: "دەزانین كە دەنگدەری عێراقی پەندی وەرگرتووە‌و ناكرێت دەرفەتێكی دیكە بداتە گەندەڵەكان، بەتایبەتی ئەو ئاوارانەی ئێستا باش دەزانن كێ بووە هۆكاری نەهامەتییەكان‌و ناكرێت جارێكی دیكە دەنگی پێبدەن، ئەگەر بە ریكلامی ئاڵتونیش بانگەشە بۆ خۆی بكات".

بەپێی میكانیزمی دەنگدانی مەرجدار كە كۆمسیۆنی باڵای سەربەخۆی هەڵبژاردنەكان دایناوە‌و بەشداریكردنی ئەو ئاوارانە زامن دەكات كە نەیانتوانیوە كارتی دەگدان وەربگرن، هەموو ئاوارەكان دەتوانن دەنگ بدەن ئەمە جگە لەوەی دەتوانرێت ئەم میكانیزمە لەلایەن هەندێك قەوارەوە بۆ بەرژەوەندی كاندیدەكانیان بەكاربهێنرێت، بەتایبەتی كە ژمارەیەكی زۆر لە ئاوارەكان میكانیزمی دەنگدان‌و شوێنەكەی نازانن.  







ads
ads
Developed by Avesta Group and powered by Microsoft Azure

Copyright © 2015 Shar Press. all rights reserved