شارپرێس:
گەنجترین پاڵێوراوی پارتی دیموكراتی گەلان هەدەپە بۆ پەرلەمانی توركیا ناوی رۆزەرین ئاكتاش-ی تەمەنی تەنیا ١٨ ساڵە و لەبارەی خۆ كاندیدكردنییەوە رایگەیاند، لەبەرئەوەی هەدەپە هیوای گەنجان و ژنانە، خۆی كاندید كردووە.
هەڵمەتی خۆتۆماركردنی پاڵێوراوانی پارتی دیموكراتیكی گەلان "هەدەپە" بۆ بەشداریكردن لە هەڵبژاردنەكانی ٢٤ی حوزەیرانی توركیادا بەردەوامەو گەنجترین پاڵێوراوی هەدەپە ناوی رۆزەرین ئاكتاش-ە، كە لە ١ی حوزەیراندا تەمەنی دەبێت بە ١٨ ساڵ.
رۆزەرین لەشاری ئامەدی باكووری كوردستان خۆی لەسەر لیستی هەدەپە بۆ پەرلەمانی توركیا كاندید كردووە.
رۆزەرین رایگەیاند، بۆئەوەی، كە سەرنج رابكێشێتە سەر بارودۆخی گەنجان و ژنانی كورد خۆی كاندید كردووە.
ناوبراو راشیگەیاند، هەدەپە تاكە هیوای گەنجان و ژنانە و هەدەپە دەتوانێت ژنان و گەنجان رزگاربكات.
لەبارەی ئامانجی لە خۆكاندیدكردنەكەی رایگەیاند "ئامانجم ئەوەیە، كە ژنان و گەنجان روون بكەمەوە، كە رزگارییان لە ڕێگەی هەدەپەوە دەبیت. بۆ ئەوەش داووا لە هەموو ژنان و گەنجان دەكەم دەنگ بە هەدەپە بدەن".
ئاكتاش هەروەها رایگەیاند "ئەگەریش هاتوو كاندیدبوونەكەی پەسەند نەكرا، ئەوا بەشێوەیەكی چالاك بەشداریی لە هەڵمەتی هەڵبژاردندا دەكات".
هـ ـ ح