شارپرێس:
حاجی كاروان ئەندامی پەرلەمانی كوردستان، كە هاوكات ئەندامی سەركردایەتی یەكگرتووی ئیسلامی كوردستانە دەڵێت: هۆكاری پشتگوێخستنی پڕۆژە چاكسازییەكە تەنیا سەرۆكایەتی پەرلەمانەو ئەوانیش بەبێ تەوجیهی سەركردایەتی‌و حیزبەكانیان پشتگوێیان خستووە، بۆ ئەوەی دەنگەكانیان كەم نەكات، چونكە زیاتر لە "سەد هەزار كەس سوودمەندە بە قاچاغ، دزێتی ، پارە خواردنی حەرامی ئەم میللەتە هەرلەوان هەیە (٣-٦) موچەی هەیە، كە ئەوانە نامێنن كاریگەری لەسەر دەنگی ئەوان هەیە، بۆیە ئێستا هەڵبژاردنی پەرلەمانی كوردستان لە پێشە نایهێنن هەر ڕەنگە بكەوێتە خولی داهاتووی پەرلەمان.

حاجی كاروان دەشڵێت: پەرلەمانتار هەیە (٣٠) پاسەوانی هەیە، (١٥) بەحساب دەوام دەكەن (١٥)كەی تریشیان خانەنشینە و پارەی ئەوانیش وەردەگرێت و دەیخوات، سەرۆكی هەرێمیش (١٥٠٠) پاسەوان، خەڵكی وا هەیە لەسەركردایەتی پارتی‌و یەكێتی بەناوی هێز و میحوەرەوە هێزی تایبەتی خۆی هەیە، "ئەگەر ئەو پڕۆژە چاكسازیە جێ بەجێ بكرێت ئەمانە هەمووی نامێنن، بۆیە ڕەنگە بكەوێتە خولی داهاتووی پەرلەمان."

قەو سانەی حاجی كاروان ئەندامی پەرلەمانی هەرێمی كوردستان لەفڕاكسیۆنی یەكگرتووی ئیسلامی لەمیانەی وتوێژێكی بووە لەگەڵ دەنگی ئەمریكا، هەروەها دەڵێت: ئەوەی پرۆژە چاكسازییەكە دوادەخات، كە پەرلەمانی هەرێمی كوردستان گفتوگۆی لەسەر نەكات و پەسەندی نەكات و بەردەوام دوایدەخات سەرۆكایەتی پەرلەمانە نەك فراكسیۆنەكان، چونكە لیژنەكان گفتوگۆیان لەسەركردووە، تەنیا ئەوەندە ماوە سەرۆكایەتی پەرلەمان بیخاتە بەرنامەی كارەوە بۆ گفتوگۆكردن لەسەری، پاساوی سەرۆكایەتی پەرلەمانی كودستان ئەوەیە، كە نایخاتە كارنامەی دانیشتنەكان، دەڵێت دەبێت ئەم پرۆژەیە لایەنە سیاسییەكان لەسەری ڕێكبكەون، دووەمیش دەڵێن ئەم پرۆژەیە سروشتی دارایی هەیە دەبێت حكومەت حازربێت، ئێ ئەگەر پەرلەمانێك پەرلەمان بێت چۆن بەسێ مانگ حكومەتی پێ حازر ناكرێت؟ حكومەت كێیە وەزیری داراییە و ڕاوێژكاری سەرۆكایەتی ئەنجامی وەزیرانە.

حاجی كاروان وتیشی: "دەمەوێت بەبێ پەردە ئەو قسەیە بكەم سەرۆكایەتی پەرلەمان بە بێ تەوجیهی حیزبی خۆیان ئەو كارە ناكەن، لەپێش هەڵبژاردنی پەرلەمانی عێراق ئەم پرۆژانەیان نەهێنا وتیان با نەبێتە موزایەدەی سیاسی، بەڵام خۆی لەڕاستیدا بەو شێوەیەیە بۆ ئەوەی دەنگەكانیان كەم نەكات، چونكە زیاتر لە سەد هەزار كەس سوودمەندە بە قاچاغ، دزێتی ، پارە خواردنی حەرامی ئەم میللەتە، كە ئەوانە نامێنن كاریگەری لەسەر دەنگی ئەوان هەیە، چونكە ئەمانە دەنگدەری ئەوانن، بۆیە ئێستا هەڵبژاردنی پەرلەمانی كوردستان لە پێشە نایهێنن هەر ڕەنگە بكەوێتە خولی داهاتووی پەرلەمان ، خەڵكی وا هەیە شەش موچە وەردەگرێت، بابەتی پلە باڵاكانە، كە بەپێی ئە پرۆژەیە ئەوانە هیچیان نامێنێ و یەك موچەی شایستەی پلەی خۆیان وەردەگرن.

لە ساڵانی (٢٠١٠-٢٠١٢) بەپێی ڕێكەوتنێكی سیاسی پێش وەختەی نێوان لایەنە سیاسییەكانی هەرێمی كوردستان هەر حیزبە و بەپێی ڕێكەوتنی لەگەڵ سەرۆكی حكومەتی ئەوكاتی هەرێمی كوردستان سەدان و هەزاران كادری بەناوی پاسەوانی بارەگا حیزبییەكان لەسەر میلاكی حكومەتی هەرێم دامەزران.

حاجی كاروان لەسەر ئەم سەرنجە قسەی خۆی هەیە و دەڵێت: "نامەوێت پاساوی ئەوە بهێنمەوە، ئەوە ڕاستە، بەڵام تەنیا یەكگرتووی ئیسلامی كوردستانە خانەنشینی پلە باڵا و موچەی بندیواری نییە هەتا دەسپێشخەریمان بۆ كرا ئەندامی مەكتەبی سیاسی بەوەزیر ئەندامی سەركردایەتی بە بەڕێوەبەری گشتی، بەڵام ئێمە ڕازی نەبووین ، بەڵام پێیان وتین بارەگەكانی ئێوە پێویستی بەپاسەوانە وتیان پاسەوانەكانتان ناونووس بكەن ئێمەش لەبەر نەبوونی یاسای حیزب، كە بودجەی حیزب هەبێت قبوڵمان كرد بەپێی ئەم پرۆژەیە دەچنەوە سەر وەزارەتی ناوخۆ."

هەروەها حاجی كاروان ئاماژەی بەپاسەوانی بەرپرسەكان كرد، كە ئەگەر ئەو پڕۆژە چاكسازییە جێبەجێبكرێت ئەوانیش دەگرێتەوە ، وتی: "لەپاسەوانەكانی سەرۆكی هەرێمەوە هەتا پاسەوانی ئەندام مەڵبەند و ئەندام لقێك نەفەری وا هەیە (١٥٠٠) پاسەوانی هەیە ئێستا قورساییەكە زۆرە ئەگەر ئەو پرۆژەیە جێبەجێبكرێت ئەو قورساییە نامێنێت ، ئەندامی پەرلەمان هەیە تا ئێستا (٣٠) پاسەوانی هەیە (١٥) ی خانەنشینە ، (١٥)كەی تری بەحساب دەوام دەكەن، بەڵام پارەی ئەوانیش وەردەگرێت و دەیخوات ، بە ڕاستی فەزاحەت هەیە لەناو ئەم ئیدارەیە، هەر لەناو سەركردایەتی یەكێتیدا ، هێزی فڵان و فڵانمان هەیە لەناو پارتیشدا بەهەمان شێوە، ناوێكیان بۆ دۆزیونەتەوە بەناوی ئەوەوە دەیكەن كە بەرپرسی فڵانە میحوەرە و خستویانەتە سەر وەزارەتی پێشمەرگە یا وەزارەتی ناوخۆ یا سەرۆكی هەرێم یا سەرۆكی حكومەت ئەم هەموو پاسەوانەیان بۆچییە، زیاتر لە (١٥٠٠) پاسەوانن ، ئێ باشە ئەم هەموو پاسەوانەیان بۆچییە؟ ئەندامی مەكتەبی سیاسی پارتی هاتووە وتویەتی (٣٠) پاسەوانم هەیە ئێ وتومە كاكە تۆ ٣٠ پاسەوانت بۆچییە؟ وتویەتی لە مەخمور شەڕ دەكەم ئەی باشە بۆ ناچیتە ناو پێشمەرگە شەڕ بكەی واتە بەڕاستی شتەكان زیاد لەسنووری خۆیانن واتە ڕۆلی دامەزراوەیەك نەماوە بەناوی پێشمەرگە ، ئینجا بۆ نمونە كەس نازانێت بودجەی هێزی ٧٠ و ٨٠ كێ سەرفی دەكات ‌و چۆن و بۆچی ؟ ئێستا بەم یاسایە هەموو ئەوانە چارەسەر دەكرێت ، خۆ وەزیر هەر دیار نیە چەند پاسەوانی هەیە ؟ وە لە دەرەوەی حكومەت خەڵكی تر هەیە ؟"

لەوەڵامی ئەو پرسیارەی بۆچی ئێوە وەك یەكێك لەلایەنە ناڕازییەكان باس لەئەنجامدانی ساختەكاری لە ئامێرەكانی دەنگدان دەكەن لەكاتێكدا خۆت لەوەڵامی پرسیاری یەكەم وتت سەد هەزار كەس زیاتر سێ موچە تا شەش موچەیان هەیە دەنگدەری ئەو حیزبانەن، بەڵام ئێوە باس لەهاككردنی ئامێرەكانی دەنگدان دەكەن؟

حاجی كاروان وتی: "هەندێك لەو ساختەكارییانە بە پلانی جوان و ڕێك و پێك و پلانێكی ئەلكترۆنی كراون ، بەڵام هەندێكی دیكەیان بەنەزانی كراون، بۆیە وا حەیای خۆیان و كوردیشیان لەدەرەوە برد، ئێمە نزیكەی لە ٧٠%ی دەنگەكانمان دزراوە من بۆخۆم لەناو هەولێر نزیكەی پەنجا هەزار دەنگم هێناوە، بەڕاستی پێشتر چاوەرێی هەموو ساختكارییەكم دەكرد، بەڵام بەو شێوازە دەنگ دزین نا كە لەپشتەوە خەنجەرت لێبدەن ئەوە زۆر ناخۆشە، ئەوە بووە پەڵەیەكی ڕەش بە ناوچەوانیانەوە وەك پەڵەكانی (٣١ی ئاب و ١٦ی ئۆكتۆبەر)، چونكە ئەوە خیانەتێكی ناوخۆیی بوو."

حاجی كاروان هەروەها دەڵێت: "ئەگەر هەموو دەنگەكانمان بۆ بگەڕێتەوە ئەوا منیش و یەكێكی تریش ڕەنگە بە كۆتا لە هەولێر دەربچین ، بەڵام ئەوا نزیكەی مانگێك زیاترە ئەو سندوقانە لای ئەوانە ئەگەر دەسكاری نەكرابێت وەك یەكگرتوو نزیكەی (٣ )كورسی دەهێنین بەڵام ئەمڕۆ فێڵێكی تریان دۆزیەوەتەوە لە ڕێی دادوەرەكانەوە ئەوانە هەموو فرت و فێڵێك دەدۆزنەوە كەبەشێكی دەنگەكان جیابكرێتەوە بەدەست نەك هەمووی، بۆیە وەك چوار لایەنەكە سكاڵامان تۆماركرد."

هـ ـ ح