شارپرێس:
ناوەندی ڕاگەیاندنی هەسەدە ڕایگەیاندوە "لە ٢٤ کاتژمێری ڕابردوودا چەند بارەگایەکی فەرماندەیی چەکدارەکانیان خاپوورکردووە و ١٥ چەکداری داعشیش کوژراون".

ئەمڕۆ هەینی ، ناوەندی ڕاگەیاندن و چاپەمەنیی هێزەکانی سوریای دیموکرات-هەسەدە، ئاماری شەڕی ٢٤ کاتژمێری ڕابردووی قۆناغی کۆتایی گەردەلولی جزیرەی لە ڕۆژهەڵاتی ڕووباری فورات ئاشکراکرد.

ناوەندی ڕاگەیاندن و چاپەمەنیی هێزەکانی سوریای دیموکرات-هەسەدە ڕایگەیاندوە "لە دوروبەری گوندی باخۆزا-ی سەروو چەکدارەکانی داعش ناوەندێکی تۆپبارانکرد، کە ڕۆژێک پێشتر لەلایەن هێزەکانمانەوە ڕزگارکرابوو، فڕۆکەکانی هاوپەیمانان سەرچاوەی تۆپهاوێژەکانی چەکدارەکانیان بۆردوومانکرد، هەروەها تۆپهاوێژەکانی هاوپەیمانان بارەگاکانی چەکدارەکانیان تۆپباران کرد، لە ئەنجامدا بارەگایەکی فەرماندەیی چەکدارەکانی داعش و شوێنی جێگیرکردنی تۆپهاوێژەکان و گوللـەنەبڕێکی چەکدارەکان تێکشکێندرا.

ناوەندی ڕاگەیاندن و چاپەمەنیی هێزەکانی سوریای دیموکرات ئاماژەی بەوەشداوە "هێزەکانمان شەوی ڕابردوو هێرشیانکردە سەر گوندی باخۆزێ و پێنج خاڵی سەربازییان ڕزگارکرد، بەمشێوەیەش شەڕ دەچێتە باخۆزەوە، لە شەڕەکەشدا شەڕڤانێکمان برینداربوو".

ناوەندی ڕاگەیاندن و چاپەمەنیی هەسەدە ئەوەشی وتوە "لە بەرەی سووسێ چالاکیی سەربازیی و گوللـەباران بە چەکی سووک ڕوویداوە و دواتر شەڕی دەستەویەخە لەنێوان شەڕڤانانمان و چەکدارەکانی داعش ڕوویداوە، هێزەکانمان ڕووبەری یەک کیلۆمەتر پێشڕەوییان کرد، چەکدارەکان جارێکی دیکە هێرشی پێچەوانەیان کرد، لە هێرشەکەیاندا ئۆتۆمبێلێ بۆمبڕێژکراویان بەکارهێنا و ئەو خاڵە سەربازییانەیان گرت کە لەلایەن شەڕڤانانمانەوە ڕزگارکرابوون، شەڕ تا درەنگانی شەوی خایاند و لە کۆتاییدا شەڕڤانانمان خاڵەکیان گەڕاندەوە و چەکدارەکان ڕاوەدوونا".

ناوەندەکەی هەسەدە وتوشیەتی  "لە ئەنجامی شەڕی ئەمڕۆدا لە گوندی شەفا، بارەگایەکی فەرماندەیی چەکدارەکان لە گوندەکە بووەتە ئامانجی فڕۆکەکانی هاوپەیمانان، لە ئەنجامی ئەو بۆردوومانەشدا ٢ چەکدار کوژراون، هەروەها لە دەوروبەری گوندی باخۆز ١٣ چەکدار کوژراون و خاڵێکی چاودێرییشیان خاپوورکراوە".

جێگای باسە، ڕۆژی ١١ی ئەیلول، فەرماندەیی گشتیی هەسەدە کۆتا قۆناغی ئۆپەراسیۆنی گەردەلوولی جزیرەی بە ناوی "شەڕی لەناوبردنی تیرۆر" لە ڕۆژهەڵاتی ڕووباری فورات ڕاگەیاند.


هـ ـ ر