شارپرێس:
کۆمەڵگای دیموکرات و ئازادی ڕۆژهەڵاتی
کوردستان-کۆدار ناسنامەی سێ گەریلای شەهیدی ئاشکراکرد، کە لە شەڕێکدا لە شاری سنەی
ڕۆژهەڵاتی کوردستان بەرامبەر سوپای پاسدارانی ئێران شەهیدبوون.
ئەمڕۆ، شەممە کۆمەڵگای دیموکرات و ئازادی
ڕۆژهەڵاتی کوردستان-کۆدار، لە ڕاگەیەنراوێکدا کە لە ماڵپەڕی فەرمیی پارتی ژیانی
ئازادی کوردستان-پژاک بڵاوکراوەتەوە، ناسنامەی سێ گەریلای شەهیدی ئاشکراکرد.
بەپێی ڕاگەیەندراوەکە، ڕۆژی ٧ی ئەیلول هاوکات
لەگەل هێرشی "تیرۆریستی" سوپای پاسداران بۆ سەر بنکەی حیزبە
کوردییەکان-ی ڕۆژهەڵاتی کوردستان لە شارۆچکەی کۆیە، هێرشی هێزەکانی ڕژیمی سوریا لە
قامیشلو و تۆپبارانی هەرێمی کوردستان لەلایەن ڕژیمی ئێرانەوە، سوپای پاسداران
ئۆپەراسیۆنێکی سەربازیی بەربڵاوی بەبەشداری بەکرێگیراوانی ناوچەکە لەدژی
گەریلاکانی کۆدار لە قووڵایی خاکی ڕۆژهەڵاتی کوردستان لە ناوچەی سنە دەستیپێکردووە.
هەر لە بەیاننامەکەی کۆدار-دا هاتووە: ئەم
ئۆپەراسیۆنە بەربڵاوە دەبێت لە چوارچێوەی هێرش بۆ سەر هەبوونی کورد ناوبنرێت، لە
ئەنجامی ئەو هێرشە بەربڵاوەدا سێ گەریلای ئێمە لەدوای شەڕێکی قارەمانانەدا لەدژی
هێزەکانی سوپای پاسدارانی ڕژیمی ئێران شەهیدبوون و لە چارەنووسی یەکێک لە
گەریلاکانمان بێ ئاگاین.
کۆدار ئەوەشی ڕاگەیاندووە، کە لەو
ئۆپەراسیۆنە سەربازییەدا چەکداران و بەکرێگیراوانی کورد وەک پێشڕەو و قەڵغانی
هێزەکانی سوپای پاسداران ڕۆڵیان گێڕاوە، کە وردەکارییەکانی لە ڕۆژانی داهاتوودا
بڵاودەکەنەوە.
کۆدار ناسنامەی سێ گەریلا شەهیدەکەی
بەمشێوەیە ڕاگەیاندووە:
ناو و پاشناو: جەمال ڕەحمانی
نازناو: ئارگەش کارزان/ ئەندامی ڕێبەری کۆدار
شوێنی لەدایکبوون: کامیاران
شوێن و بەرواری شەهید بوون: سنە - ٧ی ئەیلولی
٢٠١٨
ناو و پاشناو: ڕەئوف ئیبراهیمی
نازناو: تۆلهەڵدان سنە/ ئەندامی ڕێبەری کۆدار
شوێنی لەدایکبوون: سنە
شوێن و بەرواری شەهیدبوون: سنە - ٧ی ئەیلولی
٢٠١٨
ناو و پاشناو: شەریف ئەمینی
نازناو: دلۆڤان فەدایی/ ئەندامی کۆمەڵەی
جەوانانی ڕۆژهەڵاتی کوردستان-کەجەرە
شوێنی لەدایکبوون: سەردەشت
شوێن و بەرواری شەهیدبوون: سنە – ڕۆژی ٧ی
ئەیلولی ٢٠١٨
لە کۆتایی ڕاگەیەندراوەکەشدا "کۆمەڵگای
دیموکرات و ئازادی ڕۆژهەڵاتی کوردستان-کۆدار، سەرەڕای سەرخۆشیکردن لە بنەماڵەی
شەهیدان و گەلی کورد، بەڵێنیشیان داوە: ناهێڵین خوێنی هەڤاڵانمان بە فیڕۆ بڕاوات و
درێژەپێدەری ڕێبازی شەهیدان دەبین".
هـ ـ ر