شارپرێس:
"سایكۆلۆژیای سیاسی" یەكێكە لەنایابترینو دانسقەترین كتێبەكانی ساڵی 2018، چەند رۆژێك لەمەوبەر دەزگای سەردەم چاپیكردووە.
كتێبەكە بەرهەمی دووساڵ شەونوخوونی نووسەری دیار حەمەڕەشید فاروق-ە، كە زۆر بەوردی بۆ زمانی كوردی وەریگێڕاوە.
نووسەر لەپێشەكی كتێبەكەیدا بەمجۆرە لەبارەی كارەكەوە نوسیوییەتی: سەرەتا ناخوازم هیچ دیدو بۆچوونێكی تایبەت بە خۆم لەسەر ناوەرۆكی ئەم كتێبە دەرببڕم، ئەوەندە نەبێت، یەكەم، ئەو كەسەی دەست بە خوێندنەوەی دەكات، بۆ ئەوەی لەنێوە رێگەدا واز لە خوێندنەوەی نەهێنێت، دەبێت لەو فۆرمو تێكستو زمانەی ئەم كتێبەی پێنووسراوە، زۆر پشوو درێژ بێتو چەمك زاراوەكانی قەڵسو جارسی نەكات، چونكە تەنیا بە تەواوكردنی كتێبەكە لەنرخو بەهاكەی تێدەگات".
هەروەها نووسیویەتی: "پێموایە هەر كەسێك لە خوێندنەوەی ئەم كتێبە ببێتەوە، حەتمەن لەسەر كۆی ئەو پرسانەی لەجیهانو ناوچەكەو ئەم نیشتمانەی خۆمان دەگوزەرێت، بیرۆكەیەكی لەلا گەڵاڵە دەبێت، هەروەها پەی بەوەش دەبات، كە چۆن بڕیار دروستدەكرێ، چۆن هەڵبژاردن ئەنجام دەدرێ، چۆن دەنگدەدرێ، كێشەو تەنگژەو قەیران دەخوڵقێنرێتو چۆن چارەسەریش دەكرێنو هیدی".
حەمەڕەشید فاروقئەوەشی نووسیوە: "ئەم كتێبە لە سێ تەوەرو حەڤدە بەش پێكهاتووە، تەنانەت نەك هەر یەكێك لە تەوەرەكانی، بەڵكو هەر بەشێك لەو بەشانەی ئەم كتێبە شایانی ئەوەیە بەدەیان توێژینەوەو كتێبو وتاری ئەكادیمی لەسەر بنوسرێت، بۆیە ئەم كتێبە ئەوەندە لەڕووی داتاو زانیارییەكانی دەوڵەمەندە، ئیمكان نیە گەر كەسێك بە وردیو بەدیقەتەوە لە خوێندنەوەی بێتەوە، دەیان پرسیاری لەلا قوت نەبێتەوە، رەنگە هەر ئەوەش وایلێبكات بە دوای سەرچاوەو زانیاری دیكەدا بگەڕێت، بۆ ئەوەی باشتر لە دونیای دەوروبەری تێبگاتو بەجۆرێك لە جۆرەكان وەڵامێكی بۆ ئەو پرسانەش هەبێت كە رۆژانە دەستەویەخەی خۆیو هەمو هاوڵاتیانی نیشتمانەكەی دەبنەوە".
هەروەكو نووسەری ئەم كتێبە مكورە لەسەر ئەوەی لایەنگیریو پشتگیری هیچ تیورەو ئەزموونو ئایدیاو دیدو بۆچونەكان نەكات، تا خەڵكانی پسپۆرو خوێنەران سەرپشك بكاتو سەربەخۆی تەواویان پێبدات پەیڕەوی لە كام تیورەو كام هەڵوێست دەكەن، "ئەوا منیش هەمان هەڵوێستی ئەوم گرتەبەرو ئەم كتێبەو دەستنوسە وەرگێڕاوەكەیم دایە هاورێی بەرێزم، نوسەرو وەرگێر "شوان ئەحمەد" تا بە دەقە وەرگێڕاوەكە بچێتەوەو پاشان بۆچونی خۆی لەسەر ئەم كتێبە دەربڕێت. دوای پیاچونەوەی دەقی كتێبەكە، پێكەوە گفتوگۆمان دەربارەی زۆربەی بابەتەكانی كرد، بەڵام داوام لێكرد شتێكی زۆر زۆر كورت لە بارەی ئەم كتێبەوە بنوسێت تاكو ئەم شێوازە ببێت بە نەریتێكو دواتر هەر كەسێك لە خوێندنەوەی بێتەوە بە چەند دێرێك رەئی خۆی لە دوا لاپەرەی ئەم كتێبە بنوسێت (لە كۆتایی كتێبەكەدا لاپەرەیەك بە ناوی سەرنجو تێبینی بۆ ئەو مەبەستە تەرخان كراوە)، بۆ ئەوەی گەر تەمەن باقی بێتو دەرفەتی ئەوەش بڕەخسێت رۆژێك لە رۆژان زۆربەی ئەو دیدو بۆچونانە لە تێكستێكدا كۆبكرێتەوە، لەو باوەڕەدام بابەتێكی ناوازەی لێ بەرهەم دێت".
دیدو بۆچوونی شوان ئەحمەد لە دوای خوێندنەوەی ئەم كتێبە: "بۆ بەرچاو ڕوونی خوێنەران سەرەتا دەبێت بڵێین ئەم كتێبە لەیەككاتدا هەم گرنگە وەك بابەت و هەم كەم تا كورتێكیش زمانەكەی قورس و ئاڵۆزە)، واتە ڕەنگە بەخوێندنەوەیەكی سەرپێی یاخود لەیەكەم خوێندنەوەدا، بەئاسانی خۆی بەدەستەوە نەدات و پڕاوپڕ لێی تێنەگەین".
هەروەها دەڵێت: "ئەو بابەتەی نووسەرەكەی قسەی لەسەر دەكات، تا بڵێی گرنگ و هەنووكەییەو بەستایلێكی نوێ و تایبەت باسی لێكراوەو تێهەڵكێشە بەزانیاری ووردو ئەزموونی زیندووی ڕۆژانە، سەرباری داتای جۆراوجۆرو بەراوردكاری و نیشاندانی نمونەی سەرنج ڕاكێشی وا كە خزمەت بەبابەتی نوسینەكە بكەن".
كتێبەكە ستایلی نوسینەكەی، تایبەتەو بەنەفەسێكی ئەكادیمیانەی تۆكمە نوسراوەو وەك ئەوە وایە، بۆنوخبەو بۆتوێژێكی تایبەت لەخوێنەران نوسرابێت، "هەرچۆنێك بێت ئەم كتێبە پێمان دەڵێت، لەدنیای مۆدێرندا بریاری سیاسی چۆن و بەچ شێوازێك دروست دەكرێت و گەڵاڵە دەبێت. ئەمەش ئەو شتەیە كە سیاسەتمەدارانی خۆرهەڵات بەگشتی و لای خۆمان بەتایبەتی، لێی بێ ئاگان و فڕیان بەسەریەوە نییە".