شارپرێس:
به‌رهه‌م ساڵح، سه‌رۆك كۆماری عێراق بایەخ و گرنگیی بەدیهاتنی ئۆقرەیی و ئاشتیی کۆمەڵایەتیی دوپاتکردەوە و ئاماژه‌ی كرد بۆ ئامادەکاریی بەرەو قۆناغی دوای رزگارکردنی ناوچە جیاجیاکانی خاکی عێراق لە بن دەستی داعشدا و دەستپێکردنی هەڵمەتێکی نیشتمانیی بۆ ئاوەدانکردنەوە و جێبەجێکردنی خزمەتگوزارییەکان.
به‌رهه‌م ساڵح، سه‌رۆك كۆماری عێراق لەگه‌ڵ شاندێكی دووزخورماتوو لە کۆشکی سەلام لە بەغدا كۆبووه‌وه، لە كۆبوونه‌وه‌كه‌دا بارودۆخی ئەمنیی و خزمەتگوزاریی لە قەزای دوز خورماتوو گفتوگۆی لەبارەوە کرا، هەرەوەها ئەو رێوشوێنانەش باسکران کە پێویستن بۆ چارەسەرکردنی هەمو ئەو کێشانەی کە شارەکە بەدەستیانەوە دەناڵێنێت.
بەرهەم ساڵح قوربانیدانی رۆڵەکانی دووزخورماتووی بەرز نرخاند لە بەگژاچونەوەی چه‌كدارانی داعش، هاوکات داوای لە هەمو لایەک کرد رێنەدەن بە تێرۆر فرسەت بقۆزێتەوە و پیلانی یەکڕیزیی نیشتمانیی هەڵبوەشێننەوە.
بەرهەم ساڵح رونیکردەوە، پێویستە بە باشترین شێوە خزمەتی دانیشتوانی قەزاکە بکرێت و ئەو زیانانەشیان قەرەبوو بکرێتەوە کە لە ئەنجامی ئۆپەراسیۆنە سەربازییەکان و پەلاماردانەکانی داعش لێیان کەوتوە.
ه.م