شارپرێس: لوقمان حاجی قادر
ڕاشد غەنووشی سەرۆكی بزووتنەوەی نەهزەی تونسی، لەنامەیەكدا، لەژێر ناونیشانی "كاتی دابڕانی من‌و ئیخوان موسلمین نزیكبووەتەوە"، كە لەمانگی پێشوو (پەیامەكە پێشتر پێشكەشكراوە) بۆ كۆبوونەوەی تایبەتی ڕێكخستنی جیهانی ئیخوان موسلمینی ناردووه دەڵێت: "ڕێبازەكەتان چەوتەو كارەساتی بەدواخۆیدا هێناون ، هاوپەیمانیتان لەگەڵ ڕێكخراوە تیرۆرستەكان نیشتمانەكانتان وێران دەكات".
غەنووشی سەركردەی جوڵانەوەی ڕابوونی تونسی جەختی لەوە كردەووە كە ئانوساتی لێكدابڕانی لەگەڵ كۆمەڵەی ئیخوان موسلمین نزیك بۆتەوە. ئەمەش لە میانەی نامەیەكیدا كە ئاراستەی كۆبوونەوەی تایبەتی ڕێكخستنە جیهانییەكەی ئیخوان موسلمینی كردبوو كە لە ئەستەمبوڵ و لەژێر دروشمی "سوپاس توركیا" لە نیسانی ڕابردوو گرێیان دابوو، "الحیاە الجدید" لە سەرچاوەیەكی تایبەتەوە كۆپییەكی نامەكەی بەدەست گەیشتووە.
غەنووشی لە نامەكەیدا دەڵیت: "هیچ هۆكارێكی تەندروستی و هی دیكەش لەگۆڕێنین كە ڕێگر بووبن لە ئامادەبوونم ، بەڵام ڕۆژ لە دوای رۆژ پێم وایە ئانوساتی دابڕانی نێوانمان نزیك دەبێتەوە، من موسوڵمانێكی تو‌نسیم، تونس نیشتمانی منە، باوەڕێشم بەوەیە كە نیشتمانپەروەری گرنگ و بنچینەیی و یەكلاییكەرەوەیە ، بۆیە ڕێگە بە هیچ كەسێك نادەم "تونس" بوونی خۆمم لێ زەووتكات، هیچ دوژمنكارییەكیش دژ بە تونس قبوڵ ناكەم هەتا ئەگەر لە لایەن خاوەن پەیامێكی یەكتاپەرستیشەوە بێت".
وتیشی: "ئێستا من لە بەردەم ئێوەدا ڕایدەگەیەنم كە تونسیبوونی خۆم باڵاترین و گرنگترینە ، نامەوێت تونس "لیبیا" یەكی دیكەی دەوروبەر بێت ، نەعێراقێكی دوورەدەستیش بێت، دەمەوێت تونس ڕۆلەكانی خۆی بە هەموو دەنگ و ڕەنگە جیاواز و بۆچوونە سیاسییەكانەوە بپارێزێت ، من پڕ بەدەمم پێتانی ڕایدەگەیەنم كە ڕێبازەكەتان چەوتە و ناوچەكەشی تووشی مەرگەسات كردووە، ئێوە خۆتان نابینا كردووە لە بەرامبەر داكەوتدا (واقع) ، ساوێر (وهم) وخەون و خەیاڵپڵاوییە‌كانی خۆشتان ئاشكراكردن، گەل و چارەنووسی گەلانیشتان فڕێدایە دەرەوەی خۆتان".
بەردەوام بوو: "لە میسر و سوریا و یەمەن هۆشدرایم پێدان و بێدارم كردنەوە، بەڵام ئێوە كەڕەمسۆن و ئەهلی بێدراكردنەوەنین، من ئێستا سەربازێكی ڕێگەی بەرگریكردنم لە خاكی تونس، ڕێگەش بە تیرۆر نادەم جا لەژێر هەر ناو و ناونیشانێك بێت، ووڵاتەكەم بە ئامانج بگرێت، چونكە گلانی نیشتمان گلانی منە، پێویستە ئەگەر بۆ جارێكیش بێت هۆش بێننەوە بەرخۆتان و پەی بە مەترسی ئەوە بەرن كە ڕوودەدات و بشزانن كێ سوودمەندەی ڕاستەقینەیە، ئێوە وا میسرتان بۆ وێناكردین كە هەرە‌س دێنێت و ئێوەش لە ماوەی چەند هەفتەیەك یان چەند مانگێكدا فەرمانڕەوایی لە میسر بونیاد دەنێنەوە، بەڵان سەدحەیف و مخابن سەلماندتان كە خەڵكانێكی كەڕەمسۆی دەستوپێ سپیلكەی بێ تەگبیرن ، چۆن هاوپەیمانیتان لەگەڵ ئەو ڕێكخراوە تیرۆرستییانەدا گرێدا كە نیشتمانەكانتان وێران دەكات، كە ووڵاتەكەتان وێران بوو ئێوە چیتان بۆ دەمێنێتەوە؟ نابێت كورسییەكان ئامانجبن ، چونكە نیشتمان گرنگتره".
هەروەها وتیشی: "دەبێت سەرلەنوێ بەو ڕاستییە ئاشنابین كە ئێمە نیشتمانپەروەری ئیسلامین، دەبێت دان بە نیشتمانپەروەریدا بنێین، واش مامەڵەی لەگەڵ بكەین كە ناكرێت ئو‌مەتێكی ئیسلامی بنیات بنێین بێ ئەوەی نیشتمانپەروەری ئیسلامی بوونی هەبێت ، ئەمەش خاڵە ناكۆكییە سەرەكییەكەی نێوانمانە، تیرۆرستێكی موسوڵمان كە لە پاكستان و مۆریتانیا و سعودیەوە هاتووە چی دەكات لە تونس؟ چی دەوێت؟ مەگەر نایانەوێت ڕۆڵەكانی گەلەكەم بكوژن.
غەنووشی بەردەوام بوو : "بۆ دواجار سوێندتان دەدەم بە خودا كە داكەوت (واقع) وەك خۆی و بە باشی بخوێننەوه، كەلەڕەقی مەكەن، تەماشای داكەوتی خۆتان بكەن كە چیتان بەسەرهاتووە، كۆمەڵێك بوونە دوو كۆمەڵە و زیاتریش ، ئێوە ئێستا له زۆرێك ووڵاتان نیشتەجێن و لاتەریك و گۆشەگیری جەماوەرن ، ئەو جەماوەرەی پێشتر گرەوتان لەسەر ئامێزی گەرمی دەكرد، لێرە(ئەمە بڕگە جەرگبڕەكەیە) ناتوانن لە ئامێزێكی گەرمی جەماوەریدا ئۆقرە بگرن بێ ئەوەی خاوەن ناسنامەیەكی نیشتمانیبن، ئێوە بۆ كوێ دەچن؟ لەخوا بترسن لە بەرامبەر گەل و نیشتمانەكانتاندا".
زیاتریشی وت "ئێمە ئێستا لە تونس پەیامێكی ڕوون و ئاشكرامان بۆ ئێوە پێیە ، ئێمە فەرمانڕەواییمان گرتەدەست و هەڵبژاردنیشمان دۆڕاند، ئەوەی ئەو هەڵبژاردنەشی پێی دۆڕاندین گەلی تونس بوو نەك كەس و لایەنێكی دیكە، كونوكەلەبەر و درزێك هەیە لەوەی پێشكەشمان كردووە و دامانڕشتووە و پیادەمان كردووە لەگەڵ گەلی تونسدا، هێزی دەرەكی نەهاتن هەرەسمان پێبێنن ، بەڵكو ئەوەی هەرەسی پێهێناین هەڵە و ئیجتهادەكانی خۆمان بوون و هەر ئەوانیش بەرپرسی ئەو هەرەسەن، نە ڕوس و نە ئەمریكییەكانیش و نە كەس و لایەنی دیكەش هۆكارنین ، ئێمە لە ئەزموونە تازەكەی تونسدا هەڵەمان كرد، گەلی تونسیش سزای داین ، دەبێت پەند لەو ڕووداوە وەرگرین، ئەگەر بە ڕاستی ئێمە ڕژدبین و خاوەنی پەیام بین".
"بەچاوپۆشین لەوەی ئەنجامەكانی چی دەبن، واز لە هەموو ووڵات و نیشتمانێك بێنن بۆ ڕۆڵەكانیان، هەتا ئەگەر بشدۆڕێن ، ئەو كات وێنەكتان وەك وێنەی هەر سیستەمێك لە سیستەمە‌كانی ئێستا دەبێت، ئەگەر گەل ئێوەی ڕەتكردەووە دەچن پەنا بۆ توندوتیژی دەبەن، هیچتان نەگۆڕی ، پەیامی تازەتان ڕادەستی گەلانی دیكە نەكرد ، بەڵكو بە پێچەوانەوە ، چونكە ئێستا گەل كتومت وێنەكەتان وەك خۆی دەبینی و دەخوێنێتەوە، بەرزەفڕی گەلانتان لە پێناو گۆڕانكاریدا تووشی تێكشكان و بێئومێدی كرد و ئێوەش بەرپرسی ئەو نائومێدیەن، زۆر بەداخەوەم كە هێشتاش ئێوە لە ئەزموونەكەی میسرتان نەكۆڵیوەتەوە ، هەڵتان نەسەنگاندووە و پەندتان لێ وەرنەگرتووە، ئێستا 5 ساڵە جەنگی سووریا درێژەی هەیە ، هەموو جیهان بە هۆی خوێندنەوە و توێژینەوە و لێهەڵێنجان و پەندوەرگرتنەوە گۆڕانیان بەسەرداهاتووە تەنها ئێوە نەبێت، دەی مەگەر ئێوە بۆ كوێمان دەبەن؟!".
ئەوەشی وت: "لە كۆتایدا بە ڕوونی پێتان دەڵێم ئێمە لە تونس ئامادەگی خۆمان لەو كۆبوونەوانە هەڵدەپەسێرین كە بوونەتە ڕۆتینێكی تەواو، بگرە لەوەش زیاتر و بوونەتە كارێكی نەرێنی و زیانی زیاترە لە سوودەكەی، داوا لە ئاقڵمەند و داكەوتبینەكانتان دەكەم بە دوای میكانیزم و بەرنامەی دیكەدا بگەڕێن كە یەكتانخات نەك پەرتوبڵاوتان كات، خەڵكتان بەرەو پیرەوە بێنێ نەك لێتانبڕەونەوە. دوای خوێندنەوەی ئەم پەیامە شاندی تونس كۆبوونەوەكە جێدێڵێت، ڕاشیدەگەیەنین كە ئامادەگی خۆمان لەو جۆرە كۆبوونەوانە هەڵدەپەسێرین".
