بەرهەم ساڵح: پەسەندكردنی بودجە كۆتایی بەنەهامەتی پاشەكەوتی موچە دەهێنێت

sharpress.net

1126 جار خوێندراوه‌ته‌وه

24/01/2019‌

شارپرێس:
بەرهەم ساڵح سەرۆك كۆماری عێراق رایگەیاند، پەسەندكردنی بودجە لەلایەن پەرلەمانەوە گرنگە بۆ بوژاندنەوەی ئابووری و ئاوەدانی عێراق‌و كۆمەڵێك پێویستی هاووڵاتیان دابین دەكات.

بەرهەم ساڵح راشیگەیاند، جیگیركردنی بەشە بودجەی هەرێم، بەتایبەتیش موچەی فەرمانبەران و پێشمەرگە، كۆتاییهێنانە بەنەهامەتی پاشەكەوتی موچە.

لێدوانەكەی سەرۆك كۆمار لەمیانی  تویتێك بووە، كە ئەمڕۆ پێنج شەممە لەئەژماری تایبەتی خۆی لەتۆڕی كۆمەڵایەتی تویتەر بڵاویكردووەتەوە، دوای ئەوەی پەرلەمانی عێراق شەوی رابردوو پرۆژەیاسای بودجەی بۆ ساڵی 2019 پەسەندكرد.

سەرۆك كۆمار هیوای خواستووە، جگە لەچارەسەرو كۆتایی نەهامەتی پاشەكەتی موچەی فەرمانبەرانی هەرێم، ئەو پڕە پارەشیان بۆ بگێڕێتەوە لەساڵانی داهاتوو لێیان پاشەكەوت كراوە.

پەرلەمانی عێراق درەنگانێكی شەوی رابردوو پرۆژەیاساكەی تێپەڕاندو پەسەندی كرد، كە ماوەیەكە گفتوگۆی زۆر لەنێوان لایەنەكان لەسەر ناوەڕۆكەكەی هەیە.

بەپێی ناوەڕۆكی پرۆژەیاسای بودجە، عێراق رۆژانە دەبێت 3.88 ملیۆن بەرمیل نەوت هەناردە بكات، كە رێژەكەی لەچاو ساڵی رابردوو بەرزتركراوەتەوەو هەر بەرمیلێك نەوتیش بە 56 دۆلار ئەژماركراوە، كە ساڵی 2018 هەر بەرمیلێك بە 46 دۆلار ئەژماركرابوو.

هەر بەپێی پرۆژەكە بودجەی گشتی عێراق بۆ ساڵی 2019 ، 133 تریلیۆن دینار (112 ملیار دۆلار) دینار دەبێت‌و تێدا موچەی فەرمانبەرانی هەرێمی كوردستان‌و هێزی پێشمەرگە بە 500 ملیار دیناری مانگانە دیاریكراوە.

لەبەرانبەر ئەوەدا، دەبێت هەرێمی كوردستان رۆژانە 250 هەزار بەرمیل نەوت هەناردە بكات‌و داهاتەكەی رادەستی بەغدا بكات، كە ئەمە نەبەسراوە بە ناردنی موچەی فەرمانبەران‌و پێشمەرگەی هەرێم.

هــ ـ ح





ads

زۆرترین خوێندراوە

  • ڕۆژ
  • هەفتە
  • مانگ
ads
ads

ads
ads
Developed by Avesta Group and powered by Microsoft Azure

Copyright © 2015 Shar Press. all rights reserved