شارپرێس:

هاوڵاتیانی شەنگال بەربەستی سەربازیی نێوان شەنگال و ڕۆژئاوای کوردستانیان شکاند و چوونە سنوری ڕۆژئاواوە.

ئێوارەی ئەمڕۆ هاوڵاتیانی شەنگال توانیان ئەر بەربەستە سەربازییە بشکێنن، کە لە ڕێڕەوی مرۆیی نێوان شەنگال و ڕۆژئاوادا دروست کراوە و ڕێگەکەیان داخستبوو.

هاوڵاتیانی شەنگال بۆ ناڕازایی دەربڕین دژی داخستنی ڕێڕەویی مرۆیی نێوان شەنگال و ڕۆژئاوا، ئەمڕۆش بەرەو ڕێڕەوەکە ڕۆیشتن، بەڵام لەلایەن هێزە عێراقییەکانەوە سەرەتا لە نزیک گوندی بارێ ڕێگریان لێ کرا، بەڵام خۆپیشاندەران گوێیان بە ڕێگرییەکان نەدا و توانیان بەربەستە سەربازییەکە تێپەڕێنن و بگەنە ڕێڕەوەکە و چوونە سنوری ڕۆژئاواوە و داوایان لە بەرپرسان کرد، کە ڕێڕەوەکە بە تەواویی بکەنەوە.

دواتر شاندێک بە نوێنەرایەتی خەڵکەکە لەگەڵ بەرپرسانی سەر سنورەکە کۆبوونەوە و داواکارییەکانیان ڕادەستی بەرپرسان کرد، بەرپرسانی سەر سنوریش ئاماژەیان بەوە کرد "داواکاریی خەڵکەکە دەگەیەننە شوێنی پەیوەندیدار".

بەڵام  چالاکی هاوڵاتیان لەسەر سنور بەردەوامە و چالاکوانان لەسەر سنور چادریان هەڵداوە و دەڵێن هەتا ڕێڕەوەکە بە تەواویی نەکرێتەوە، ئەوان لە چالاکیی بەردەوام دەبن.

ئەو ڕێڕەوە مرۆییەی کە لە کاتی جینۆسایدی ئێزدییەکانەوە لەلایەن شەڕڤانانەوە لەنێوان شەنگال و ڕۆژئاوای کوردستانەوە کرابووەوە، لە ڕۆژی ١٥ی کانوونی دووەمی ٢٠١٨ لەلایەن حکومەتی عێراقەوە داخرا، دوای ناڕەزایەتی دەربڕینی خەڵک لەبەرامبەر داخستی ڕێڕەوەکە، جارێکی دیکە کرایەوە و کاربەدەستانی عێراق بەڵێنیاندا، کە جارێکی دیکە داینەخەن، بەڵام دوای ماوەیەک بە تەواوەتی داخرا، بۆ ئەوەی ڕێڕەوەکە بە فەرمی بکرێتەوە لە ٢٤ی ئەم مانگەوە خەڵکی شەنگال لەبەردەم ڕێڕەوەکە چادریان هەڵدا.

سەرچاوە: ڕۆژنیوز
هـ ـ ر