دوو دابەزینی نهێنی ئاسمانی
ئەمەریكا نهێنییەكانی لەرۆژهەڵاتی فورات دەشارێتەوە

sharpress.net

5447 جار خوێندراوه‌ته‌وه

20/02/2019‌

شارپرێس:
هیزەكانی ئەمەریكا دوو پرۆسەی دابەزاندنی ئاسمانییان لە رەققەی سوریا ئەنجامداوە ، لە رۆژئاوای شارەكەش بە هەلیكۆپتەر تەقەیان لەخەڵكی مەدەنی گوندی "ئەلمەحموودلی" كردووە .

پەیامنێری ئاژانسی سپۆتنیكی رووسی لە رەققە وتی: هێلیكۆپتەرەكانی هێزی دەریایی ئەمەریكا ، زۆر بە چڕی بەسەر ئاسمانی شاری تەبقەو ئاسمانی دورگەی عاید لەكەناری دەریاجەی " تەبقە"  سووراونەتەوە .

ئەو جموجۆڵە ئاسمانییەی سوپای ئەمەریكا ، هاوكاتە لەگەڵ راگواستنی سەرجەمی ئەو كەلوپەل و پێداویستییە سەربازییكانی سوپای ئەمەریكا لە ناوچەكە .

پەیامنێری سپۆتنیك وتیشی: لە ٤٠ كیلۆمەتری  رۆژئاوای شاری رەققە ، فڕۆكە هەلیكۆپتەرەكانی ئەمەریكا لە جۆری "ئاپاچی" تەقەیان لە دەوروبەری گوندی هداج  لەنزیك شارۆچكەی ئەلمەحموودلی كردووە، كە خەڵكەكەی سەر بەعەشیرەتی "ئەلبوجابر و ئەلعجیل "ن .

بەرەبەیانی رۆژی یەكشەممەش ، لە شاری رەققە سوپای ئەمەریكا لەیەكێك لە باڵەخانەكانی شەقامی "هیشام عەبدول مەلیك " كردەیەكی دابەزاندنی ئاسمانیان كردووە ، بەڵام سەرچاوە ناوچەییەكان دەڵێن ، لەو كردەیەدا سوپای ئەمەریكا هیچیان دەست نەكەوتووە .

لەماوەی ئەو چەند هەفتەی رابردوو ، فڕۆكەی بارهەڵگری ئەمەریكی لە ناوچەكانی ژیر كۆنترۆڵی خۆیان لە رۆژئاوای  شاری رەققە ، چەند پرۆسەیەكی دابەزاندنیان  كردووە .

هەرچەندە بەشێوەیەكی بەردەوام فرۆكەكانی ئەمەریكا خەریكی ئەو جۆرە كردانە بوون، بەڵام لەم چەند رۆژەی دواییدا، بەشێوەیەكی بەرچاو زیادیان كردووە ، بەجۆرێك هەفتەی رابردووش پرۆسەیەكی تری دابەزاندنی ئاسمانی لەناوچەی (ئەلسەحل) لە گوندەواری باشووری رۆژئاوای شاری رەققە روویداوە.

هەروەها شایەتحاڵەكان بە ئاژانسی سپۆتنیكی روسیان  وتووە "هێزێكی ئەمەریكی ، لە شارەدێیەكی سەر ڕیگای حەلەب، كە ١٥ كیلۆمەتر لە رەققەوە دوورە ،  پرۆسەیەكی دابەزاندنی ئاسمانیان ئەنجامداوە ، تێیدا داواكراوێكیان بەناوی عیسا ئەلشەوواخ دەستگیر كردووە، كە برازای  كەسێكە بەناوی ئەبو لقمان، كە  پێشتر لەسەردەمی دەوڵەتی رێكخراوی داعش والی شاری رەققە بووەو  بەرەو جێگایەكی نادیاریان بردووە .

خەڵكی ناوجەكە دەڵین عیسا شەوواخ پێشتر لای ئەمەریكییەكان داوكراو نەبووە ، لەوكاتەوەی شارۆچكەكە كەوتووەتە دەست هێزەكانی ئەمەریكا و هاوپەیمانەكانیان، ئەو نیشتەجێی ئەوی بووە ، بەڵام رەنگە دەستگیركردنی پەیوەندی بەوەوە هەبووبێت ، كە پێدەجێت بەهۆی مامییەوە زانیاری زۆر و مەترسیداری  لابێت  لەسەر ماوەی دەسەلاتی داعش لەو شارە.

هەروەك ، لە ٧ی مانگی شوباتی ئەمساڵ ، هێزەكانی ئەمەریكا لەشارۆچكەی مەنسوورە ، كە  ٢٥ كیلۆمەتر دوورە لەشاری رەققە ، پرۆسەیەكی دابەزاندنی ئاسمانیان ئەنجامداوە ، بەپێی  قسەی خەڵكی ناوچەكە پرۆسەكە لەنزیك قوتابخانەی نموونەیی باشووری شارۆچكەكە بووە.

بەگوێرەی  سەرچاوەكان ، ئەو قوتابخانە سەرەتاییە نموونەییە كە پرۆسەكەی لەنزیك  كراوە، تائێستاش تەرمی نزیكەی ٢٠٠ كەسی تێدایە، بەشی هەرەزۆریشیان تەرمی ئەو ژن‌و منداڵانەن، كە لە پرۆسەی رزگاركردنی ئەو ناوچەیە لەدەستی داعش لە شارۆچكەو گوندەكانی دەوروبەری رەققە  رایانكردبوو لەو  قوتابخانەیەدا خۆیان پەنا دابوو، بەڵام رووبەرووی بۆردوومانێكی چڕی سوپای ئەمەریكا بوونەوەو سەرجەمیان كۆمەڵكوژ كران ، ئەو هێرشەش  وەك دەستپێشخەرییەك بوو بۆ پرۆسەی چوونە ناو شارۆچكەكە و پاككردنەوەی لە چەكدارانی داعش،  كە بە "كۆمەڵكوژی مەنسوورە"  ناسراوە .

شایەتحالەكان دەڵێن لە پرۆسەی دابەزاندنی ئاسمانی مەنسوورەدا ، چوار  فرۆكەی ئاپاتچی تێیدا بەشدار بوون ، دوویان لەسەر زەوی نیشتوونەتەوە و هەر فرۆكەیەك نزیكەی ١٠ سەربازی لێهاتووەتە دەرەوە ، دوو فڕۆكەكەی تر لە ئاسمانەوە و لەنزمییەكی كەمەوە ماونەتەوە.

خەڵكی ناوچەكە دەڵێن ، ئامانج لەو پرۆسەیە ، دەستگیركردنی یەكێك لە سەركردە دیارەكانی پێشووی داعش بووە ، بەڵام نەیانتوانیوە بیدۆزنەوە، دەشڵێن ئەو كەسە پێشتر بەئازادی لەناوچەكە سووراوەتەوە ، سەرەرای ئەوەی هێزە ئەمەریكییەكانیش و هیزەكانی ئاسایشی سەر بە " قسد"  پێیان زانیوە، بەڵام دەستگیریان نەكردووە .

وەرگێران: ئاكۆ عەبدوڵڵا ئاڵی 
سەرچاوە: sutnik






ads

زۆرترین خوێندراوە

  • ڕۆژ
  • هەفتە
  • مانگ
ads
ads

ads
ads
Developed by Avesta Group and powered by Microsoft Azure

Copyright © 2015 Shar Press. all rights reserved