شارپرێس:
محەمەد كەریم عەبدول حەسەن ، ئەندامی ئەنجوومەنی نوینەرانی عێراق رایگەیاند، پارە و شوێنەوارەكانی عێراق لە دوو كاتی جیاوازدا رووبەڕووی دزی و تاڵانكردن بوونەتەوە ، هەروەك جەختی كردەوە پەرلەمان و لیژنە تایبەتمەندەكان دەست بەجموجۆڵ دەكەن بۆ وەرگرتنەوەی بڕێكی زۆر لەو زێر و شوێنەوارە دێرینانەی عێراق كە ئەمەریكا دەستی بەسەردا گرتوون.
ئەو ئەندام پەرلەمانەی عێراق بۆ پیگەی "الاتجاه" راشیگەیاند، لەدوو سەردەمی جیاوازدا پارە و زێر و شوێنەواری عێراق تاڵان كراون، جارێكیان لەساڵی ٢٠٠٣ كاتێك هێزەكانی سوپای ئەمەریكا هاتنە ناو بەغدا و جوونە ناو كۆشكەكانی سەرۆكایەتی كۆمار و مۆزەخانە و شوێنە شوێنەوارییە گرنگەكانی عێراق.
هەروەك وتی: جاری دووەمیش ئەو كاتە بوو، كە چەكدارانی ڕێكخراوی داعش دەستیان بەسەر سنوورێكی فراوانی خاكی عێراقدا گرت ، پارە و شوێنەواریكی زۆری عێراقیان كەوتە بەردەست لەدوای دەركردنیشیان لەعێراق ئەو زێر و پارچە شوێنەواریانەیان گواستەوە بۆ سوریا ، بەڵام دوای ئەوەی هیزەكانی ئەمەریكا دەستیان بەسەر ناوچەی باغۆزی سەر سنووری نیوان عێراق و سوریادا گرت سەرجەم ئەو پارەو زێر و شوینەوارە دێرینە گرانبەهایانەش كەوتنە دەست هێزەكانی ئەمەریكا و گواستیاننەوە بۆ شوێنی نادیار".
عەبدول حەسەن جەختی لەسەر ئەوە كردەوە، كە پەرلەمان و لیژنە تایبەتمەندەكان كار لەسەر گەراندنەوەی ئەو سەروەت و سامانەی عێراق دەكەن .
چەند راپۆرتێك باسیان لەوە كردووە، كە هێزەكانی ئەمەریكا دەستیان گرتووە بەسەر دەیان تۆن زێڕ و بڕێكی زۆر لەپارە و شوێنەواری گرانبەهای عێراق كە چەكدارانی ڕێكخراوی داعش بەرەو سوریایان بردبوو ، ئەوەش دوای ئەوەی لە عێراق وەدەرنران .
وەرگێڕان: ئاكۆ عەبدوڵڵا