شارپرێس:
بەڕێوەبەرایەتی گشتی هاتووچۆی عێراق ئاشكرایكرد، بەپێی ڕێنماییەكی نوێ ، كە لەلایەن عادل عەبدول مەهدی سەرۆك وەزیری عێراقەوە دەرچووە، دەبێت لە بابەتی سەرپێچیی و پابەندبوون بە ئاماژەكانی هاتووچۆو راگرتن لەترافیك لایەنەكان بەهەمان شێوەی مامەڵەكردن لەگەڵ هاووڵاتییان مامەڵە لەگەڵ كاروانی ئۆتۆمبیلی بەرپرسانیش بكرێت .
رائید فامی عیماد لەراگەیاندنی بەڕێوەبەرایەتی گشتی هاتووچۆ رایگەیاندووە، "فەرمان بە هەموو تیمەكانمان كراوە لە هەردوو لای كەرخ و رەسافەی شاری بەغدا، كە كار بەو ڕێنماییە تازەیەی سەرۆك وەزیران بكەن ، كە داوا دەكات بەشێوەیەكی ئاسایی و وەك هاووڵاتییەك مامەڵە لەگەڵ سەرپێچیی و راگرتنی ئۆتۆمبیل و پابەند بوون بە ئاماژەكانی هاتوچۆو لەگەڵ ئۆتۆمبیلی بەرپرسان بكرێت".
عیماد بۆ پێگەی "سۆمەریە نیوز"ی راشیگەیاندووە، كە پێویستە لەسەر بەرپرسان و كاروانی تایبەتی بەرپرسان پابەند بن بەڕێنماییەكانی پۆلیسی هاتووچۆ، كە لەسەر دووڕیان و یەكتربرەكان دەوەستن.
هەروەك ئاماژەی بۆ ئەوەش كردووە، كە عادل عەبدول مەهدی سەرۆك وەزیران هانی پۆلیسی هاتووچۆ دەدات، كە بەشێوەیەكی سرووشتی ئەركەكانی خۆیان رابپەڕێنن و نابێت بەهیچ جۆرێك ڕێگە بدرێت بەرپرسان ببن بە بار بەسەر شانی هاووڵاتیانەوە.
وەرگێڕان: ئاكۆ عەبدوڵڵا ئاڵی