شارپرێس... ئاکۆ عەبدوڵلا ئاڵی:
سەرۆک کۆماری تورکیا دەڵێت "ئەو کەسانەی دراوی بیانی دەکرن لەبەر ئەوەی پێشبینی دەکەن لیرەی تورکی داببەزێت ئەوە باجێکی قورس دەدەن".
بەپێی داتاکانی بانکی ناوەندی تورکیا، سپاردەکانی دراوی بیانی و ئەو موڵک و ماڵەی لای هاوڵاتیانی تورکە لەوانەش کانزای گرانبەها گەیشتۆتە ئاستیکی پێوانەیی ، ئەوەش بەرای چاودێران مانای پاشەکشەی متمانەیە بە لیرە .
ڕەجەب تەیب ئەردۆغان لە گردبوونەوەیەکی یەکێک لەمەراسیمەکانی پارتەکەی کە بەبۆنەی هەڵبژاردنەکانەوە رێکخرابوو ڕایگەیاند " هەندێ کەس خەریکی توڕەکردنی تورکیان و دەیانەوێت بەهاوکاری هاوکارەکانیان کەناو تورکیا بەهای لیرە دابەزێنن".
ئەردۆغان هەرەشەی لەو کەسانە کردوە و وتی "بەوانە دەڵێم کە پێش هەڵبژاردنەکان لەو جۆرە چالاکییانە تێوە گلاون ، باش دەتانناسین ، دەزانین خەریکی چین ، باش بزانن دوای هەڵبژاردنەکان بەقورسی باجی ئەوە دەدەن".
ئەوەش دوای ئەوە دێت کە رۆژی هەینی بەهای لیرە لەسەدا چواری بەهاکەی خۆی بەرانبەر بە دۆلار لەدەستدا ، کە ئەوەش گەورەترین دابەزینی رۆژانەی لیرەیە لەوەتی قەیرانی دراو لە تورکیا لەمانگی ئاب سەریهەڵداوە ، ئەمەش وایکردووە هاوڵاتییە تورکەکان لەترسی دابەزینی زیاتری بەهای دراوەکەیان روو لە کڕینی دراوە بیانییەکان بکەن .
هـ ـ ب