شارپرێس: 
تەكنەلۆژیای نەوەی پێنجەمی ئینتەرنێت G5 دەتوانێت، كاریگەری لەسەر گەلێك لەكەرتە جۆراوجۆرەكان دابنێت، كە یەكێك لەوانە كەرتی كشتوكاڵە ، بەهۆی ئەوەی نەوەی پێنجەمی ئینتەرنێت ١٠٠ جار لەنەوەی جوارەمی ئینتەرنێت بەهێز ترە  ئەوەش وادەكات، كە درووستكردنی پەیوەندی لەنێوان ئامێر و ئامرازە تەكنەلۆژییەكان زۆر خێراتر و ئاسانتر بیت .

تەكنەلۆژیای G5 بۆ گواستنەوەی زانیارییەكان لە ئامێرەكانی هەستپێكردن لە دوورەوە  و فرۆكە بێفرۆكەوانە كشتووكاڵییەكانەوە گەلێك سەركەوتووو نموونەییە ، ئەوەش ئەو ئامێر و ئامرازانەن كە جوتیارەكان لەكاری رۆژانەیاندا زۆر بەكاری دەهێنن .

فرۆكە بێفرۆكەوانە كشتووكاڵییەكان كە تەكنەلۆژیای G5 بەكاردەهێنن یارمەتیدەرە لە بەرهەمهینانی پەتاتە لە هۆڵەندا ، بەڵام لە یابان ئامێری هەستپیكردن لە دوورەوە تەكنەلۆژیای G5 بەكاردەهێنیت بۆ چاودێریكردنی پلەی گەرمی ئاو و زانینی بڕی خوێ لە كێڵگەكانی بەخیوكردنی جوێچكە ماسی .

ئەپڵیكەیشنیك بۆ چاودێرییكردنی ماڵات
لە مانگی ئازارد بەریتانیا ئەپڵیكەیشنێكی بۆناو مۆبایلە زیرەكەكان خستە بەردەست جوتیاران  كە لەڕێگایەوە دەتوانن چاودێری  مانگاكانیان بكەن و رۆژانەش زانیارییەكانی لەسەر تەندرووستی و هەڵسوكەوتی مانگاكان نوێ دەكاتەوە .

ئەو سیستەمە لە ناوەندی "Agri-Epi" لە سومرست لە بەریتانیا لەسەر مانگاكان تاقیكراوەتەوە ، بەشێكی لەلایەن حكوومەتی بەریتانییەوە پارەدار كراوە و " كۆمپانیای تەكنەلۆژی سیسكۆ " پاڵپشتیی پرۆژەكەی كردووە ، بەجۆرێك گەردانەیەكی ئامادەكراو بە تەكنەلۆژیای "5G" لە گەردنی مانگاكان دەكرێت و ئەویش هەموو زانیارییەكان هەر لە خواردنیان و شێوازی نووستنیان دەگوازێتەوە بۆ ئەو ئەپڵیكەیشنەی ناو مۆبایلە زیرەكەكە ، ئەوەش وادەكات جوتیارەكان سات بەسات ئاگاداری مانگاكانیان ببن و ئەوانیش ئەو زانیارییانە بدەنە پزیشكی ماڵاتیی یان پسپۆڕی بواری خۆراكی.

دۆنكان فۆربس بەڕێوەبەری پرۆژەكە گوتوویەتی " ئەوە وامانلێدەكات دڵنیابین لەوەی كە ئایا مانگاكان دڵخۆش و ساغن و بەشێوەیەكی ئاسایی هەڵسوكەوت دەكەن ، ئەوە سەرباری ئەوەی ئەگەر هات و نەخۆش بوون یان پێویستییان بە پشكنین بوو ئەوە پێشوەختە هۆشداریی دەداتە خاوەنەكەی ، یارمەتیدەریشە بۆ  رێكخستنی سیستەمی ئاودێریی وبەخێوكردنی مەڕ و ماڵات".

تەكنیكەكانی زیادكردنی بەرهەم
ڕێكخراوی خۆراك و كشتوكاڵی سەر بەنەتەوە یەكگرتووەكان "فاو" پێشبینی دەكات بەهۆی ئەوەی ژمارەی دانیشتوانی جیهان زۆر بەخێرایی زیاد دەكات ، ئەوە وادەكات لەساڵی ٢٠٥٠ بە بەراورد بە ساڵی ٢٠٠٩ هەسارەی زەوی پێویستی بەوە بێت ٧٠% خۆراكی زیاتر بەرهەم بهێنێت.

بەگوێرەی ئەو راپۆرتانەی لەلایەن ڕێكخراوی فاوەوە دەرچووە  بۆ وەڵامدانەوەی پێداویستییە نوێكانی  بەرهەمهێنان ، جوتیاران پێویستییان بە تەكنیكی نوێ هەیە تا وا لەو زەوییە كشتووكاڵییە كەمبەرهەمانە بكەن بە ژمارەیەكی كەمتری دەستی كار بەرهەمێكی زۆرتر بدات بەدەستەوە .

ساڵی ٢٠١٧ پرۆژەی GRural First  یەكەم پرۆژە بووە لە جیهاندا كە بتوانێت بەپشتبەستن بە ئامێر بچێنیت و بەرهەمیش كۆبكاتەوە بێئەوەی پیویستی بە ڕەگەزی مرۆیی هەبێت ، بەجۆرێك تراكتۆرە كشتووكاڵییە نوێكان كە بێشۆفێر كار دەكەن دەتوانن زەوییەكە بكێڵن و تۆوەكەی پێوە بچێنن ، دواتریش لەلایەن فرۆكە بێفرۆكەوانە كشتووكاڵییەكانیشەوە لەڕێگای ئامێری هەستپێكردنەوە چاودێریی دەكرێن ، هەر لەلایەن ئامێرە تەكنەلۆژییەكانیشەوە هەڵسەنگاندن بۆ بڕی پەین و دەرمانە دژە مێرووەكان دەكرێت .

پرۆژەكە كە ناوی " فاندی فری" لێنراوە توانی یەكەم بەرهەمی بەسەركەوتووی لەساڵی ٢٠١٨ كۆبكاتەوە ، بەڵام ئیستا واخەریكە لەڕێگای تەكنەلۆژیای نەوەی پێنجەمی ئینتەرنێت "5G" زۆر دوورتر لەوە بروات، بەجۆرێك كار بكات لەسەر  زیادبوونی وردیی و لێهاتووی لە ڕشاندنی بەرهەمەكان.

جۆناسان جیل توێژەر لە زانكۆی هاربەر ئادمز  دەڵێت " ئەو تەكنیكە نوێیە نەوەك پارێزگاریی لە بەرهەمە كشتووكاییەكان دەكات ، بەڵكو ئاسانكارییشە بۆ ئەوانەی خەریكی كشتوكاڵن " .

وەرگیران : ئاكۆ عەبدوڵڵا ئاڵی