ئالا لە خوێندكارێكی چالاكەوە بۆ سیمبولی "شۆڕش"ی سودان

sharpress.net

1032 جار خوێندراوه‌ته‌وه

12/04/2019‌

شارپرێس:
بەرەبەیانی رۆژی 11ی ئەم مانگە سوپای سودان گەمارۆی باڵەخانەی سەرۆكایەتی كۆماریاندا كە عومەر بەشیر تیایدا سەرۆكایەتی دەكردو دوای چەند سەعاتێك كۆتایی بە رژێمی بەشیر هات و كودەتایەكی سەربازی دۆخێكی نوێی لەو وڵاتەدا هێنایە كایەوە.

دوای چەند ساتێك لە كودەتاكەی سودان بەشێكی زۆری خەڵكی ئەو وڵاتە رژانە سەر شەقامەكان و خۆشحاڵی خۆیان بە كۆتایی هاتنی دەسەڵاتی بەشیر دەربڕی.

لەناو جەماوەری خۆشحاڵدا كچێك بە جلێكی سپی  و روخسارێكی رووخۆشەوە دەركەوت لەسەر شان و ملی ئۆتۆمبێلێك دروشم بۆ خەڵك دەڵێتەوەو سەمایەك دەكات كە ئەو پەڕی هیوای پێوەدیارە بۆ ئایندەی ئەو وڵاتە.


ئەو كچە ناوی ئالا سەڵاحە كە تەمەنی  22 ساڵە جوڵەو دروشمەكانی لەماوەیەكی كەمدا میدیاكانی جیهانی بەخۆیەوە سەرقاڵ كردو لەئێستادا وەك سمبوڵی كودەتا یان شۆڕشی سودان دەردەكەوێت.

بەهۆی دەركەوتنە كاریگەرەكەیەوە ئالا لە تۆڕە كۆمەڵایەتییەكاندا هەرزوو ناسناوی "كنداكە"ی پێدرا كە لە مێژووی سوداندا بە مانای "ژنی ئازاو بەهێز" ناسراوە، ئەو لەناو ئاپۆڕای خۆپیشاندەران لە خەرتوومی پایتەختدا وەك رابەری خەڵك دەركەوت و دروشمی دژی بەشیر دەوتەوە.


ئالا بەشی ئەندازیاری لە زانكۆی سودانی نێودەوڵەتی تەواو كردوەو یەكێك بووە لە خوێندكارە چالاكەكانی زانكۆكەی و هەروەها لەدەرەوەش یەكێكبووە لە ژنە چالاكەكانی كۆمەڵگەی بۆ بەرگریكردن لە ژنان.

لەماوەی سێ ساڵی رابردوودا ئالا رووبەرووی چەندین ئازارو ناڕەحەتی بووەتەوە بەهۆی بەرگریكردن لە خەڵكی چەوساوەو هەژارەكان و هەروەها چەندین دیدارو چاوپێكەوتنی لەدژی دەسەڵاتدارانی ئەو وڵاتە ئەنجامداوە.

 لەوتەیەكیشدا لەبارەی كاردانەوەی دەركەوتنەكەی لە میدیاكانی جیهاندا ئالا وتی"ژنی سودان بەردەوام‌ كارا بووە لە كۆمەڵگە و گرنگی بە پرسی مافەكانی گەل و مافی ژنان داوە".

عومەر حەسەن بەشیر ساڵی 1989 بە كودەتایەك هاتە سەر دەسەڵات، بەڵام دواجار سوپای ئەو وڵاتەو وەزیری بەرگری رۆژی پێنجشەممە كودەتایان بەسەر بەشیردا كردو لە دەسەڵات دووریان خستەوە.

وەزیری بەرگری دوای كودەتاكە رایگەیاند، بۆ ماوەی دوو ساڵ ئەنجومەنێكی سەربازی بۆ بەڕێوەبردنی وڵات پێكدەهێنرێت، بەڵام لەسەر ئاستی ناوخۆی ئەو وڵاتەو جیهانیش پێشوازی لە كۆتایی دەسەڵاتی بەشیر راگەیەنراو داواشكرا لەجیاتی سوپای دەسەڵاتێكی مەدەنی دەسەڵات بگرێتە دەست.
س.هـ






ads

زۆرترین خوێندراوە

  • ڕۆژ
  • هەفتە
  • مانگ
ads
ads

ads
ads
Developed by Avesta Group and powered by Microsoft Azure

Copyright © 2015 Shar Press. all rights reserved