شارپرێس:
وەزارەتی دارایی و ئابوری حكومەتی هەرێمی كوردستان چەند توێژێك لە دانەوی پێشینەكانی هاوسەرگیری و خانووبەرەو نیشتەجێكردن دەبەخشێت لەوانەش شەهیدی شەڕی دژی داعش.
بەپێی نوسراوێكی وەزارەتی دارایی و ئابوری كە واژۆی رێباز حەملان وەزیری دارایی لەسەرە هاتووە، ئەو پێشینانەی كە وەرگیراون لەلایەن هاوسەری (شەهیدان و بێ سەروشوێنانی پێشمەرگە و هێزەكانی ئاسایشی ناوخۆ و پاسەوانی سنور و هاوڵاتییانی خۆبەخش و فەرمانبەرانی ڕاژەی شارستانی) و لە سەنگەرەكانی دژ بە چەكدارانی داعش شەهیدبوون یان بێ سەروشوێن بوون، لە قەرزەكانی (هاوسەرگیری و خانوبەرە و نیشتەجێبوون) دەبەخشرێن.
ئاماژە بەوەشكراوە، هاوسەری شەهیدان و بێ سەروشوێنكراوانی جەنگی دژبە داعش كە پێشینەی هاوسەرگیرییان وەرگرتووە لە دانەوەی قەرزی هاوسەرگیری دەبەخشرێن.
هەروەها ئەوانەی كە قیستی یەكەمی پێشینەی سندوقی نیشتەجێبوونیان وەرگرتووە و قیستەكانی دیكەیان وەرنەگرتووە، لە قیستی یەكەم دەبەخشرێن و لەكاتی ئاساییبوونەوەی بارودۆخی دارایی قیستەكانی دیكەشیان پێ دەدرێت و بە هەمان شێوە لە دانەوەی پێشینەكانیش دەبەخشرێن.
لە نوسراوەكەدا ئەوەش هاتووە ئەو توێژانە كە داواكاری پێشینەی خانوبەرەیان پێشكەشكردوە و رەزامەندییان لەسەر دراوە دوای ئاساییبوونەوەی بارودۆخی دارایی هەرێم پێشینەكانیان بۆ خەرجدەكرێت و بە هەمان شێوە لە دانەوەی پێشینەكان دەبەخشرێن.
بەپێی نوسراوەكەی وەزارەتی دارایی بڕیارەكە لە ئەمڕۆ هەینی 11ی نیسانی ٢٠١٩وە دەچێتە بواری جێبەجێكردنەوە.
س.هـ