شارپرێس:
ڕێكخراوی لێبووردنی نێودەوڵەتی داوای لە دەسەڵاتدارانی ئێران كرد دەستبەرداری سیاسەتی تەنگپێهەڵچنینو دەستگیركردنی ئەو چالاكوانانە بێت، لەبواری بەرگریكردن لەمافەكانی مرۆڤ و مافەكانی ژنان كاردەكەن ، تەنیا لەبەر ئەوەی بەشێوەیەكی ئاشتیانە نارەزایەتیان لەبەرانبەر ئەو یاسایانە دەربڕیوە جیاكاری و سووكایەتییان تێدایە لەبارەی پۆشینی سەرپۆش لە ئێران.
ڕێكخراوەكە داوای لە دەسەڵاتدارانی ئێران كردووە، كە دەستبەجێ و بێ شەرت و مەرج ئەو چالاكوانە ئافرەتانە ئازاد بكات، رایگەیاندووە، دڵنیا بووینەتەوە هەردوو ژنە چالاكوانی بواری مافەكانی ژنان یاسەمین ئاریانی و مونیرە عریشاهی هەفتەی رابردوو دەستگیر كراون ، هەروەك ویدا موەحەدیش، كە پێشتر لە ئۆكتۆبەری ساڵی ٢٠١٨ دەستگیر كرابوو بەساڵێك حوكم دراوە ، ئەوەش تەنیا لەبەر ئەوەی بەشێوەیەكی ئاشتیانە نارەزایەتی بەرانبەر بە پۆشینی سەرپۆش دەربڕیوە.
ماجدالینا مەغریبی یاریدەدەری نووسینگەی هەرێمی بۆ رۆژهەڵاتی ناوەراست و باكووری ئەفریقیا دەڵێت: "وادیارە دەسەڵاتدارانی ئێرانی هێرشێكی تەندیان دەستپێكردووە لەبەرانبەر زیادبوونی ئەو تەحەدایەی كچان و ژنانی ئێرانی دژ یاساكانی ناچاریانەی پۆشینی سەرپۆش دەستیان داوەتێ ، ئەوەش لەپێناو ترسناندن و بێدەنگكردن و ملكەچپێكردنیان".
ڕێكخراوەكە ئەوەشی راگەیاندووە، كە دەزگای هەواڵگری و ئاسایشی ئێران لەڕێگای تەلەفۆنەوە هەڕەشەی لە ئافرەتانی چالاكوان دەكەن و هۆشداری ئەوەیان پێدەدەن كە ئەگەر بێت و لەسەر ئەو جۆرە چالاكییانە بەردەوام بن ئەوە دەستگیر دەكرێن .
وەرگێڕان: ئاكۆ عەبدوڵڵا ئاڵی