شارپرێس:
وەڵامداونەوەی ئەنجوومەنی باڵای هەڵبژاردنەكانی توركیا بۆ داواكارییەكەی پارتی داد و گەشەپێدان و بڕیاردان بەهەڵوەشاندنەوەی ئەنجامی هەڵبژاردنەكان و بەڕێوەچوونی هەڵبژاردنێكی نوێ بۆ شارەوانی ئەو شارە ، راستەوخۆ كاریگەرییەكانی لەسەر ئابووری توركیا دەركەوتن
دوای ئەوەی رەجەب ئۆزێل نوێنەری پارتی داد و گەشەپێدان لە ئەنجوومەنی باڵای هەڵبژاردنەكانی توركیا لەڕێگای تویتەرەوە بڕیارەكەی ئەو ئەنجوومەنەی بڵاو كردەوە ، بەوەی گوشارەكانی رەجەب تەیب ئەردۆغان بۆسەر ئەنجوومەنی باڵای هەڵبژاردنەكانی توركیا بەرهەمی خۆی چنیوەتەوە ، ئەوە بووە هۆی ئەوەی بەهای لیرەی توركی زیاتر داببەزێت .
ئاژانسی "بلۆمبێرگ"ی ئەمەریكی باسی لەوە كردووە كە بڕیاری ئەنجوومەنی باڵای هەڵبژاردنەكانی توركیا بۆ هەڵوەشاندنەوەی ئەنجامی هەڵبژاردنە شارەوانییەكەی ئیستەنبوڵ بۆتە هۆی دابەزینی بەهای لیرە ، ئەوەش بەهۆی مەترسی وەبەرهێنەران لە ناسەقامگیری سیاسی و دەستبەردار بوون لە لیرە لەترسی زیاتر لەدەستدانی بەهاكەی.
بلۆمبێرگ لەسەر زاری ئیلیا غۆفشتاین شارەزای دراوەكان لە " ستاندارد چارتەرد" دەڵێت : " ئەوەی روودەدات جارێكی تر ڕەوشی فشەڵ و ناجێگیری دامەزراوە دیموكراتییەكان وەبیر وەبەرهێنەران دەهێنێتەوە" وەك هۆشدارییەك لە دەرچوونی سەرمایە لەو وڵاتە.
دوای بڕیاری ئەنجوومەنەكە لیرە ٣% بەهاكەی لەدەستدا ، ئەوەش وایكرد لەماوەی ٧ مانگدا نرخی ئەو دراوە بۆ نزمترین ئاست دابەزێت .
پارتی گەلی كۆماری كە بەهێزترین پارتی ئۆپۆزیسیۆنی ئەو وڵاتەیە و لە هەڵبژاردنە شارەوانییەكانی ئەو وڵاتە بەجیاوازییەكی كەم شارەوانی ئیستەنبووڵی بردەوە ، ئەو بڕیارەی بە "دیكاتاتۆرییەتی ئاشكرا " وەسف كرد.
تائێستا ڕوون نییە كە پارتی گەلی كۆماری و لایەنگرەكانی چۆن وەڵامی ئەو بڕیارە دەدەنەوە، بەتایبەت كە ئێستا گومان لە بێلایەنی ئەنجوومەنی باڵای هەڵبژاردنەكان هەیە بەوەی سەر بە پارتی دادوگەشەپێدان نەبێت ، ئەو پارتەی چەندین ساڵە دەستی بەسەر دامەزراوەی سەرۆكایەتیدا گرتووە ، دەستیش لە بانكی ناوەندی و دادگاكان و دامەزراوەكانی تریش وەردەدات.
لای خۆشییەوە ئۆنوورسال ئەدیجوزیل جێگری پارتی گەلی كۆماری لە تویتێكدا دەڵێت " ئەو ڕژێمەی ویستی گەل رەت دەكاتەوە و یاساكان پشتگوێ دەخات ، نە رژێمێكی دیموكراتییە و نە شەرعیشە ، ئەو دیموكراتییەتی ئاشكرایە".
دۆڕاندنی ئیستەنبوڵ بۆ ئەردۆغان كە لە نەوەدەكانی سەدەی رابردووەوە سەرۆكایەتی شارەوانی ئەو شارەی وەرگرتووە و هەڵمەتێكی گەورەی هەڵبژاردنی بۆ بەڕێوەبرد ، شۆكهێنەر بوو ،هەروەك لەوەتەی قەیرانی قوڵی دراو لە ساڵی رابردووەوە هاتۆتە ئاراوە، ئەوە یەكەم تاقیكردنەوەی هەڵبژاردن بوو بۆی .
وەرگێڕان: ئاكۆ عەبدوڵلا ئاڵی