"بەخشینەوەی تۆمەتی جاسووسی"
هەڵدانەوەی دەمامك.. ماڵپەڕو پەیجی نهێنی (ڕۆژنامە)ی سەر بەشاسوار عەبدولواحید

sharpress.net

4199 جار خوێندراوه‌ته‌وه

08/05/2019‌

شارپرێس:
ئامادەكردن: نیاز سەعید عەلی
سەرەتا
ماڵپەڕو پەیجی بندیوارو نهێنیی (ڕۆژنامە) ؛ نزیكەی چوار مانگ پێش ئێستا ، لەسەرەتاكانی مانگی (١)ی (٢٠١٩)ەوە ، لەسەر تۆڕی ئینتەرنێت و تۆڕی سۆشیال میدیای فەیسبووك كرایەوە ؛ بێ ئەوەی  هیچ ئەدرێسێك و ناوی خاوەن و هیچ یەكێك لە دەستەی بەڕێوەبەری ماڵپەڕەكەی بەسەرەوە بێت ، تەنها دانانی ئیمیەڵێكی نەناسراو نەبێت ، ئەویش بۆ ناردنی نامە بۆیان .

بەڕێوەبەرانی ماڵپەڕ ، لەناو ماڵپەڕەكەدا وا بانگەشە بۆ خۆیان ئەكەن كە ؛ ( پێگەی (ڕۆژنامە) پێگەیەكی ئەلیكترۆنی ئازادی سەربەخۆیەو لەلایەن كۆمەڵێك ڕۆژنامەنوسی سەربەخۆوە كاری تێدا دەكرێت ، جەختیش لەسەر بەدواداچوونی ڕوداوو گۆڕانكارییەكان دەكاتەوەو گەیاندنی زانیاری وردو دروست بە شێوەیەكی بێلایەن و پەیڕەوكردنی بنەماكانی ئیتیكی ڕۆژنامەوانی ، بەئامانجی بەشداری كردن لەپرۆسەی كامڵكردنی چەمكی  هاوڵاتیبوون و چەسپاندنی سیستەمێكی دیموكراسی و شەفاف) . خۆناساندن بەم شێوەیەو  ڕێبازو ئاراستەی كاركردنی ئەو ماڵپەڕە ؛  لەچوار مانگی ڕابردوودا ؛ هیچ شتێك بەیەكیانەوە گرێ نادات ، ئەو خۆناساندنە  ماڵپەڕەكە ئەخاتە ژێر پرسیارو گوومان و ڕەخنەیەكی زۆرەوە ، چونكە  ئەوەی پێی ئەوترێت سەربەخۆیی و بێلایەنیی و ئیتیكی ڕۆژنامەوانیی و دیموكراسیی و شەفافیی ؛ لەو ماڵپەڕەدا بوونی نییەو پێچەوانەكەی ڕاستە.

ئەركی ماڵپەڕی (ڕۆژنامە)
پاش بەدواداچوون و هەڵسەنگاندنی بابەتە بڵاوكراوەكانی ئەو ماڵپەڕە ، دەركەوت كە كاركردن بۆ هێنانەدی دوو ئامانج ؛ كراوەتە ئەركی سەرەكیی ئەو ماڵپەڕە : 
١-ئەو ماڵپەڕە لەلایەك بووەتە میدیایەكی سێبەری ڕێكخراوەكەی شاسوار عەبدولواحیدو خراوەتەگەڕ بۆ خزمەتی سیاسەت و ڕێبازو  ڕووماڵی هەواڵەكانی ئەو ڕێكخراوە .
٢-ئەو ماڵپەڕە لەلایەكی تر  بووەتە ، ناوەندێك و سەرچاوەیەك بۆ بەڕێوەبردنی تیرۆرێكی فیكریی و مەعنەویی و شەڕی دەروونیی و بڵاوكردنەوەی پروپاگەندەو زانیاریی هەڵەو داتاشین و هەڵبەستنی  تۆمەت و  بووختانی بێ بەڵگەو بێ بنەما ، هەروەها پەلاماردان و هێرش و سووكایەتییكردن ؛ بەچەندین كەسایەتیی سیاسیی و میدیایی ، چالاكوانی مەدەنیی ، نووسەرانی ناكۆك و ڕەخنەگر ، ڕكابەرو نەیاری جیابووەوە  ؛ لەشاسوار عەبدولواحید. 
 
لەم سۆنگەیەوە تاكو ئێستا دەیان كەسایەتیی لەهەردوو ڕەگەز ، لەو بوارانەی كە ئاماژەی پێكرا ؛ بەمەبەستی لەكەداركردن و زڕاندنی ناوو ناوبانگ و پێگەو ڕۆڵ و كاراییان لەكۆمەڵگەدا ، كەوتوونەتە بەر هەڵمەتی تیرۆری فكریی و تۆمەت داتاشین و بووختان بۆ هەڵبەستن و بڵاوكردنەوەی پروپاگەندەو زانیاریی چەواشەو ناڕاست لەسەریان ، لەلایەن ئەو ماڵپەڕەو پەیجەكەی ، كە لەلایەن دارودەستەی شاسوار عەبدولواحیدەوە ئەبرێن بەڕێوە.

بەشێك لەو كەسایەتییانەی كە بەگوێرەی ئەركی دووەمی ئەم ماڵپەڕە ؛ كراونەتە ئامانج بۆ تیرۆری فكریی ؛ لەڕێگەی ئەو ماڵپەڕەوە ، تۆمەت و بووختانی جاسووسیی بێ بنەماو بێ بەڵگەیان خراوەتە پاڵ ، بریتیین لە؛ (ئارام ئەحمەد ، ڕێبوار سیوەیلیی ، فەرهاد پیرباڵ ، حەمكۆ ،كەمال ڕەووف ، مستەفای حەسەنە گەورە ، ئەحمەد میرە ، ئێڤار ئیبراهیم ، عەلی حەمەساڵح ،كەمال چۆمانیی ،  توانا عوسمان ، عارف قوربانیی ، عەزیز ڕەووف ، محەمەد هەورامیی ، نەبەز گۆران ، ئیبراهیم عەباس ، شیروان شیروانیی ، شەنكار عەبدوڵڵا ، بەهات حەسیب قەراخیی ، دەروون گێژەن ، ڕەنج سەنگاویی ، فەرمان ناشاد ،  یادگار فایەق ، سەهێن موفتیی ، بەختیار سەعید ،بەرزان حەمە عەلی ، سەباح ئەترووشیی ، نیاز سەعید عەلی و ...هتد) ،هەروەها بۆ دروستكردنی گومان و كەمكردنەوەی سەنگ و كارایی  ژمارەیەك لەهەڵسوڕاوی میدیاكار ؛ ئەو ماڵپەڕەو پەیجەكەی ، پروپاگەندەی ئەوەی لەدژیان بڵاوكردۆنەتەوە ، كە گوایە بەنهێنیی ؛ مانگانە پارە لەلێپرسراوێكی باڵا وەرئەگرن ، ئەو میدیاكارانەس بریتیین لە؛ (ئاسۆس هەردیی ،شوان محەمەد ، سەردار محەمەد ، كەمال ڕەوف ، سیروان غەریب ، محەمەد ڕەووف ، تاریق فاتیح).

شایەنی باسە دارودەستەی شاسوار ؛لەگەڵ بڵاوكردنەوەی هەر تۆمەت و بووختانێك لەماڵپەڕی (ڕۆژنامە)وە ؛ ڕاستەوخۆو بەفراوانیی ، بەسپۆنسەری گەورەوە ،لەتۆڕی كۆمەڵایەتیی فەیسبووكدا ؛ لەپەیجی ماڵپەڕی (ڕۆژنامە)و چەندین پەیجی تری بندیوارو نهێنییدا ، ئەو بووختان و تۆمەتانەیان بڵاوئەكردەوە ،هاوكات بەڕێنمایی دارودەستەكەی شاسوار  ،  داوا لە هەواداران و ئەندام و لایەنگرانی (نەوەی نوێ!) ئەكرا ؛ لایكی ئەو پۆستانە بكەن و لەڕێگەی نامەی ماسنجەرەوە ؛ لینكەكەی بۆ زۆرترین لەبەشداربووانی فەیسبووك بنێرن .  

بۆچی ئەو هەڵمەتە بچێتە خانەی 
تیرۆری فكرییەوە؟
تیرۆری فكریی ؛ یەكێكە لەجۆرەكانی تیرۆر ، دەرهاویشتەی ناكۆكیی و ململانێ و كێشەی فكریی و جیاوازیی و نەگوونجانی تێگەیشتن و دیدو جیهانبینییە ، لەنێوان بەرامبەرەكان ؛ شێوازێكی ترە لەبەرێوەبردنی ناكۆكیی و ململانێ ، ئەو كاتەی كە یەكێك لەبەرامبەرەكان ؛ بۆ سەركەوتن و زاڵبوون ، یان بۆ دەمكووتكردن و بێ دەنگكردن ، یان بۆ هەراسانكردن و جڵەوكردن و كۆنتڕۆڵكردن ، یان بۆ بەگیرهێنان و سەرنەوی پێكردنی ئەوی تر ؛ بەڕێبازێكی ناڕەواو نامرۆیی ، دوور لەهەموو بەهایەك ، هانا بۆ هەڕەشەكردن و ترساندن و تۆقاندنی بەرامبەرەكەی ئەدات و ئەیەوێت هاوسەنگیی ململانێكەی نێوانیان ؛ بەبەرژەوەندیی خۆی بگۆڕێت ، ئەمەش لە ڕێگەی بەكارهێنانی ئامرازو میكانیزمەی جۆراوجۆر ، لەنموونەی دروستكردنی سینارۆی سكاندەڵی سێكسیی ساختە بۆ بەرامبەر ، یان دروستكردن و بڵاوكردنەوەی وێنەو دۆكیۆمێنتی ساختە لەسەری ، یان دروستكردن و بڵاوكردنەوەی تۆمەت و بووختانی داتاشراو بەفراوانیی ؛ لەناو میدیاو تۆڕی سۆسیال میدیای نهێنیی و بندیواردا ، بۆ زڕاندنی ناوو ناوبانگی بەرامبەر .
 
بۆچی پێویستە ڕەخنەو پرسیار
ئاراستەی شاسوار عەبدولواحید بكرێت؟
زۆرینەی ئەوانەی كە دارودەستەی شاسوار ، ئەیانخاتە خانەی دوژمن و نەیاری سەرسەختی خۆی ؛ ئەوانەن كە ڕەخنە لەشاسوار ئەگرن و ئەیخەنە بەردەمی پرسیاری جدیی گرنگ و دەمامكەكانی سەری هەڵئەدەنەوەو هۆشداریی ئەدەن لەسەر هەر جموجۆڵ و هەنگاوو نمایش و مانۆڕێكی  ناوبراو ، كە ئامانجی شاراوەی بەبەرژەوەندیی مەتریالیی تایبەتیی خۆی تیایە ، یان ئەوانەن كە لە هەر سێ كایەی بزنس و میدیاو كاری سیاسییدا ؛  كاریان لەگەڵی كردووەو لێی دردۆنگ و بەگوومان و نائومێد بوون ، یان متمانەیان پێی نەماوە ، هەستیان بەسیناریۆ شاراوەكانی شانۆگەریی و دركیان بەگەمەو مانۆڕە جۆراوجۆرەكانی كردووە ، یان  دوای هەنگاوە تەمومژاویی و  گووماناوییەكانی  نەكەوتوون ، یان ئەوانەن كە لەبواری میدیاو كاری سیاسیی ؛ ئامادەنەبوون ببنە هاوكارو هاوبەشێكی ڕووكەش لەگەڵیدا ، یان ئەوانەن كە شاسوار بەڕكابەرو كۆسپی بەردەمی خۆی زانییون ، یان ئەوانەن كە لەبەر هۆكاری تری تایبەت ،  لەلایەن دارودەستەی شاسوارەوە ؛ خراونەتە ناو لیستی ڕەش و كراونەتە ئامانج بۆ تۆمەت و بووختان هەڵبەستن و ناوزڕاندن .

شاسوار وەكو هەر تاكێكی ئاسایی كۆمەڵگە ؛ چ بۆ ژیانی تایبەتیی خۆی ، چ بۆ شێوازی بیركردنەوەو بیروباوەڕ و حەزو ڕەفتارو ویست و هەڵوێستەكانی خۆی ؛ زۆر ئازادەو خۆی لێی بەرپرسیارە ، لەڕووی لێپرسینەوەو بەدواداچوون ؛ كەس  بۆی نییە دەستبخاتە  ناو كاروباری تایبەتیی ناوبراو و بەزۆر سەپاندنی هیچ جۆرە بیروباوەرو ڕەفتارو هەڵوێستێكی جیاوازتر بەسەریدا ، چونكە هیچ یەكێك لەو تایبەتمەندییە خۆیی و خەسڵەتە كەسێتییانەی خودی شاسوار ، كە تەنها پەیوەندیی بەخودی خۆیەوە هەیە ؛ ناچێتە چوارچێوەی پێكدادان و كارلێككردن و پێشێلكردن و دژایەتییكردن ، لەگەڵ كایە گشتییەكان و سیستەمی گشتیی و بەرژەوەندییە گشتیی و بەها باڵاكانی كۆمەڵگە . 

بەڵام ئەگەر بیركردنەوەو ئیرادەو  ئاراستەی كاركردن و هەنگاوو ڕەفتارو و هەڵوێستەكانی  شاسوار ؛ سنووری سروشتیی ژیانی كەسایەتیی خۆی تێپەڕاند ؛ بەرەو  هەوڵدان و هەنگاونان بۆ كاركردن لەپێناوی جڵەوگیریی كۆمەڵگەو كاركردن بۆ بەرژەوەندیی تایبەتیی خۆی ، لەناو كایەو  جوومگە سەرەكیی و گشتییەكانی كۆمەڵگە ، ئەوا تووشی بەریەككەوتن و كاردانەوەو كێشمەكێش و ناكۆكیی و ململانێ ئەبێت ؛ لەگەڵ ئەوانی تر لەناو كۆمەڵگەو هەموو تاكێكی كۆمەڵگە ؛ مافی خۆیەتی ڕەخنەو پرسیاری ئاراستە بكات و ڕووبەڕووی ببێتەوە . 

لەم سۆنگەیەوە پێویستە هەڵوێستە لەسەر میكانیزمەو ئامرازو ئاراستەی كاركردنی شاسوار بكرێت و لێی نەگەڕێن ؛ بەبێ پرسیارو ڕەخنەو ڕووبەڕووبوونەوەو هەڵسەنگاندن تێپەڕێت ، لەسەر ئەو بنەمایەی كە ناوبراو ؛ ئەیەوێت خەونی بوونە ڕابەری گەورەو كاریزما ؛ لەڕێگەی پرۆژەكانی بزنس و میدیاو سۆشیال میدیاو كاری سیاسییەوە  بهێنێتەدی ، هەر بۆیە بۆ كاركردن بۆ هێنانەدی ئەو ئامانجە ؛ كەوتۆتە دژایەتیی و ڕكابەریی و بەڕێوەبردنی  ناكۆكیی و ململانێیەكی سەخت و توند لەگەڵ هەموواندا ، لەدوا هەنگاویدا كەوتۆتە بانگەشەی ڕەتكردنەوەی هەمووان و خۆ بەئەلتەرناتیڤزان بەسەر هەموواندا ، ناوبراو بۆ جڵەوگیریی دەسەڵاتی سیاسیی ، خەیاڵ و هیواو ئاواتەكانی خۆی ؛ لەسەر مانۆڕو گەمەو پیلان و سیناریۆكان  هەڵئەچنێت ، كەوتۆتە داڕشتنی یۆتوبیایەكی تری ئەفسووناویی و بانگەشەكردنی دیماگۆكییانە بۆی .

(بەندە) ئەوە چوارەمین ساڵە ، بەردەوام لەچەندین ڕۆژنامەو ماڵپەڕو تۆڕی كۆمەڵایەتیی فەیسبووكدا ؛ هەڵوێستەم لەسەر كارو جموجۆڵەكانی شاسوار ؛ لەناو كایەو جوومگە گشتییەكانی كۆمەڵگەدا كردووە ، لەم ڕووەوە بەردەوامم لەبڵاوكردنەوەی چەندین وتارو نووسین ؛ لەسەر ئاراستەی كاركردنی ، پرۆژەكانی ، چۆنیەتی هاتنی بۆ نێو بواری بزنس ، لەسەر میدیاكەی ، دواتریش لەسەر كارە سیاسییەكەی ، نەك لەسەر لایەنی كەسایەتیی و ژیانی تایبەتیی خۆی ، ئەمە سەرەڕای ئاراستەكردنی ژمارەیەك پرسیار بە كۆمێنت ، بۆ ناوبراو بەناوی خۆمەوە لەپەیجەكەیدا ؛ كەچی نەك جورئەتی نەكردوە ، وەڵامی  كۆمێنتەكان بداتەوە ، بەڵكو بلۆكی كردووم ، تاكو ئێستاش وەڵامی تەنها وتارێكیشی نەداومەتەوە ، ئەمە لەكاتێكدا كۆی وتارو كۆمێنتەكانی (بەندە) بۆ ناوبراو ؛ بەزمانی گوڵ و دوور لەسووكایەتیی و زمانی زبر نووسراوە .

 دارودەستەكەی شاسوار بۆ چەند جارێك ، لەڕێگەی ئەكاونتی بندیوارو نهێنییەوە ، لەتۆڕی كۆمەڵایەتیی فەیسبووك ؛ بەزمانی هەڕەشە ، داوای ڕاگرتنی نووسینیان لێ كردووم لەدژی ناوبراو ، پووختەو پەیامی هەڕەشەكەیان  بەم جۆرە بووە ؛ ئەگەر بێ دەنگ نەبم و ڕانەوەستم لەنووسین لەدژی شاسوارو نەوەی نوێ!! ؛ ئەوا لەبەرامبەرداو  لەمیدیاو سۆشیال میدیادا ؛ چاوەڕێی كاردانەوەو وەڵامی توندی ئەوان بم .

(بەندە) هیچ گرنگییەكم بەو هەڕەشەو گووشارانە نەداوەو سڵم نەكردۆتەوە ، بەردەوام بوومم و ئەبم ؛ لەنووسینی ڕەخنەیی و ئاراستەكردنی پرسیار لێی ؛ دوا جار لەڕۆژی (٢٦/١/٢٠١٩) دا ؛ دوایین وتارم لەسەر ناوبراو ، لەماڵپەڕی ڕۆژنامەی (ئاوێنە)و واڵی فەیسبووكەكەم  بڵاوكردەوە ، بەناوونیشانی ؛ (لێی گەڕێن لە كەناڵی ئێن ئار تی ، لەخاوەنەكەی لێ مەگەڕێن).

داتاشینی بووختان؛
تەنها بژاردەی دارودەستەی شاسوار
وەك ئاماژەی پێكرا ، لەم دواییانەدا دارو دەستەی شاسوار دەستیان كردووە بە بەرێوەبردنی هەڵمەتێكی ناوزڕاندن و تۆمەت هەڵبەستن ؛ بۆ ئەو كەسانەی كە خراونەتە لیستی ڕەش و خانەی نەیاری شاسوارو ڕێكخراوە سیاسییەكەیەوە ، (بەندە) یەكێكە لەو كەسانەی كە كەوتمە بەردەمی ئەو هەڵمەتی بووختان داتاشینەی دارودەستەكەی شاسوار .

دارودەستەكەی شاسوار گووشارێكی دەروونی زۆریان لەسەر بوو ؛ بۆ وەڵامدانەوەی وتارو  كۆمێنتەكانی (بەندە) لەسەر پۆستەكانی شاسوار لەپەیجەكەیدا ، چەندین كەس بەكۆمێنت بۆیان نووسیووە ؛ بۆ وەڵامی (نیاز سەعید) نادەیتەوە؟ 

دەرەنجام دارودەستەكەی ؛ هەستان بەبڵاوكردنەوەی بووختانێك ، ئەویش زۆر سادەو كرچ و كاڵ ، بەنەزانیی و بەشپرزەیی ، بێ بەڵگە و بێ ناوەرۆك ؛ لەماڵپەڕو پەیجی بندیوارو نهێنیی (ڕۆژنامە)دا ، گوایە (بەندە) كار بۆ دەزگای (پاراستن)ی پارتی ئەكەم و ئیشە ڕاسپێردراوەكەم لەلایەن (پاراستن)ەوە ؛ بریتیی لەكۆكردنەوەی ناوی ئەو نووسەرانەی كە ڕەخنەگرو ناڕازین لەپارتی .

ئەم بووختانە بەساویلكەیی و بێ ئاگایی و ناهوشیاریی داتاشراوە ،  وەك ئەوەی كە نووسەرە ڕەخنەگرەكانی پارتی ؛ نەناسراو بن و لەشوێنی نادیارو تاریكدا ، بەدزییەوە  شەوانە لەسەر دیوارەكان ؛ نووسینەكانیان بە بێ ناو ، یان بەناوی نهێنییەوە بڵاوبكەنەوەو من بۆیان بدۆزمەوە!!

بەهۆی شپرزەیی و هەڵەشەیی ، هەروەها بەهۆی نەزانیی و بێ ئاگایی ؛ دارودەستەكەی شاسوار  لەم بووختان داتاشینەدا ؛ كەوتوونەتە هەڵەیەكی گەورەو زەقەوە ؛ ئەویش ئەوەیە كە هیچ دەزگایەكی هەواڵگریی پێویستی بەوە نییە ؛ كەسێك ڕابسپێرێت بۆ كۆكردنەوەی ناوی ئەو نووسەرانەی كە دژی دەسەڵاتن ، یان لەدژی ئەو پارتەن ، كە خاوەنی دەزگا هەواڵگرییەكەیە ، چونكە لەناو هەیكەلی دامودەزگایی و سیستەمی كارگێڕیی هەموو دەزگایەكی هەواڵگرییدا ؛ بەشێكی گرنگ و گەورە هەیە ، تایبەتە بە كۆكردنەوەی هەواڵ و زانیاریی و دۆكیۆمێنتی ئاشكرا ؛ كە ستافێكی شارەزا بەرێوەی ئەبەن ، كارمەندانی ئەم بەشە ؛ ڕۆژانە لەسەرچاوە ئاشكراكانی میدیاو سۆشیال میدیادا  ؛ لەناو ڕۆژنامەو گۆڤارو كتێب و ماڵپەڕی ئینتەرنێت و تۆڕەكانی سۆشیال میدیاو  كەناڵەكانی تەلەفزیۆن و ڕادیۆ ؛ سۆراخ و بەدواداچوون ئەكەن بۆ كۆكردنەوەی زانیاریی و هەواڵ و دۆكیۆمێنتی بڵاوكراوە ، لەم چوارچێوەیەدا ؛ ئەگەر دەزگایەكی هەواڵگریی پێویستی بەناسین و دەستنیشانكردن و زانینی ناوی نووسەرە ڕەخنەگرەكانی دەسەڵات و پارتە سیاسییە فەرمانڕەواكە بێت ؛ هیچ پێویستی بەوە نییە كەسێك بەتایبەتیی ڕابسپێرێت ، بۆ كۆكردنەوەی زانیارییەكی ئاشكرا ؛ لەنموونەی زانینی ناوی ئەو نووسەرانەی كە ڕەخنەگرو نەیارن و وتارو نووسین بڵاوئەكەنەوە ، لەدژی دەسەڵات و پارتە فەرمانڕەواكە ، بەڵكو لەم كاتەدا ئەو دەزگا هەواڵگرییە لەڕێگەی كارمەندانی ستافی بەشی هەواڵی ئاشكراوە ؛ وردتر و تێروتەسەلتر ، بەبەڵگەوە ؛ ئەتوانێت ئەو كارە جێبەجێبكات ، بەئاسانیی و بێ ماندووبوون و بەخۆڕایی .

دەزگای هەواڵگریی ؛ كە سەرچاوەی نهێنیی (جاسووس) دروست ئەكات ، بۆ ئەوەیە كە زانیاریی و هەواڵ و دۆكیۆمێنتە بڵاونەكراوەو نهێنییەكان بەدەستبهێنێت ؛ نەك ئەو هەواڵ و زانیاریی و دۆكیۆمێنتە ئاشكرایانەی كە بەئاسانیی و بەخۆڕایی و بە بێ گرفت ؛ لەمیدیاو سۆشیال میدیادا بڵاوئەكرێتەوە !! .

ئازایەتیی بووختان داتاشین!

ئەم تۆمەت و بووختانە بێ بنەمایە ، هیچ ئازایەتییەكی تیا نییە ، هەموو كەسێك ئەتوانێت ؛ ماڵپەڕو ئەكاونتێك ، یان پەیجێك لەفەیسبووكدا بكاتەوەو بەئارەزووی خۆی تۆمەت و بووختان بۆ نەیارەكانی دروست بكات .

دارودەستەی شاسوار عبدولواحید ؛ ئەو كاتە ئەیانتوانی ئازایەتی خۆیان پیشان بدەن ؛ كە بەكۆمێنت لەپەیجەكەی شاسواردا ؛ داوام لێكرد ، بەرنامەیەكی ڕاستەوخۆی دووقۆڵیی لەسەر كۆی پرۆژەكانی ، لەكەناڵەكەی خۆیەوە ئەنجام بدەین و وەڵامیان نەدامەوە ، ئەو كاتە ئەیانتوانی ئازایەتیی پیشان بدەن كە وەڵامی كۆمێنت و وتارەكانی (بەندە)یان بدایەتەوە ، یان بەبەڵگە بیانسەلماندایە ؛ كە من كار بۆ (پاراستن)ی پارتی ئەكەم ، یان بەهەمان شێوە تۆمەت و بووختانەكانی تریان لەسەر هەموو ئەو كەسانەی تر بسەلماندایە ، كە لەماڵپەڕو پەیجی (ڕۆژنامە)ەوە پەلاماریان داون و بەجاسووسی ئەم دەزگاو ئەو دەزگا لە قەڵەمیانداون ؛ مەردایەتیی و ئازایەتیی و شۆرەسواریی ئەوەیە كە بەڵگەی یەكلاكەرەوەی بەهێزو ڕاست و ساغ ، لەسەر (بەندە)و ئەوانی تریشان ؛ لەكەناڵی (ئێن ئار تی) بەئاشكرا بڵاو بكردایەتەوە ، بەئێستاشەوە داوایان لێ ئەكەم مەرد بن و بێ منەت بن ، هەرچی بەڵگەیەكیان لایە لەسەر (بەندە) ، ئەگەر زۆر بچووكیش بێت ؛ با لەكەناڵی (ئێن ئار تی)ەوە بیخەنەڕوو .

(بەندە) و ئەوان جیاوازین ؛ من بە ناوی ئاشكرای خۆم و بەزمانی نەرم و دوور لەسووكایەتیی و تۆمەت هەڵبەستن ؛ ڕووبەڕوویان ئەبمەوە ، كەچی ئەوانیش لەبن  دیوارداو بەناوی نهێنیی و بەزمانی تۆمەت و بووختان داتاشین ؛ ڕووبەڕووی (بەندە)و نەیارانیان ئەبنەوە. 

پێویستیی وەڵام بۆ تۆمەتی داتاشراو!
كاتێك كەسێك ، یان لایەنێك ، بەپلان ئەكرێتە ئامانج ؛ تۆمەت ، یان بووختانێكی داتاشراو و هەڵبەستراوی لەمیدیا ، یان لەسۆشیال میدیا ؛ لەدژی بڵاوئەكرێتەوە ، دوو بژاردە هەیە لەبەردەمی ئەو كەسە ، یان بۆ ئەو لایەنەی كە بووختان و تۆمەتەكەی بۆ هەڵبەستراوە ، ئەبێت بەناچاریی ؛ یەكێكیان هەڵبژێرێت ، ئەو دوو بژاردەیەش بریتیین لە :
١-هەڵبژاردنی هەڵوێستی وەڵامنەدانەوە و بێ دەنگیی ؛ ئەویش بۆ چەند ئامانجێك ؛ یەكێكیان بۆ خۆپاراستن لەكاردانەوەی زیاترو كەمكردنەوەی ڕووبەری بڵاوبوونەوەی بووختانەكە ، یان بۆ كپبوونەوەو خامۆش بوونی بووختانەكە ، یان بۆ نادیدەكردن و بەهەند وەرنەگرتنی بووختانەكەو پشتگوێخستنی ، یان بۆ خۆ گێلكردن لە بووختانەكەو هتد...
٢-هەڵبژاردنی هەڵوێستی وەڵامدانەوە ؛ لەسەر ئەو بنەمایەی كە بەشێك لەكۆمەڵگە ، دیدو بۆچوونی وایە ؛ ئەگەر بووختانێكی هەڵبەستراو ، یان تۆمەتێكی داتاشراوی بڵاوكراوە لەسەر كەسێك ، یان لایەنێك ؛ بێ وەڵام مایەوە ، ئەوا ئەو بێ وەڵامییە ؛ ئەبێتە نیشانەی ڕاستیی بووختان ، یان ڕاستیی تۆمەتەكە .

بژاردەی هەڵوێستی وەڵامدانەوەش لەمیدیاو سۆشیال میدیادا ؛ دوو میكانیزمەی هەیە ، بەمجۆرە :
یەكەم / وەڵامدانەوەی ڕاستەوخۆ ؛ ئەویش بەئاشكراو بەزمانی لۆژیك ، دوور لەكاردانەوەی توندو  بەكارهێنانی زمانی زبرو ڕەق ، هەروەها خۆ بەدوورگرتن لەئاراستەكردنی بووختان و تۆمەتێكی هاوشێوە ؛ بۆ كەسی بووختانكەری بەرامبەر . 

دووەم/وەڵامدانەوەی ناڕاستەوخۆ ؛ بەنهێنیی و لەبندیوارداو بەزمانی توندو داتاشینی بووختان و تۆمەتی خراپترو هەوڵدان بۆ ناوزڕاندنی كەسی بووختانكەری بەرامبەر .

لەم سۆنگەیەوە (بەندە) لەبەرامبەر بووختانێكی داتاشراوی دارودەستەكەی شاسوار عەبدولواحید ؛ بژاردەی وەڵامدانەوەم ، بەشێوەی ڕاستەوخۆو بەئاشكرا هەڵبژارد ، ئەویش بەزمانێكی نەرم و هێمن ؛ دوور لەهەڵبەستنی بووختان و سووكایەتییكردن بەكەسایەتیی ناوبراو ، هەروەها لەپاڵ ئەم وەڵامەدا ؛ تۆماری سكاڵا لەسەر خاوەنی ماڵپەڕی (رۆژنامە) ؛ پاش دۆزینەوەی و بەدەستهێنانی چەندین دۆكیۆمێنتی گرنگ و یەكلاكەرەوە.

دۆكیۆمێنت و پۆست دۆكیۆمێنت!!
ئەو كاتەی كە هەواڵی بووختان داتاشینەكەی خۆمم لەپەیجی نهێنیی و بندیواری (ڕۆژنامە)دا خوێندەوە ، یەكسەر بەلێكدانەوەو شیكردنەوەی ئەو گریمان و ئەگەرانەی كە خستمە بەر تاوتوێكردن و هەڵسەنگاندن ؛ نزیكبوومەوە لەدەستنیشانكردنی خاوەنی ئەو ماڵپەڕو پەیجە ، بەتایبەتیی كە لەڕێگەی بابەتە بڵاوكراوەكانیانەوە ؛ سۆراخ و بەدواداچوونێكی خێرام كرد ، بۆ تێگەیشتن و ناسینی ئاراستەو پەیام و ئامانجی ئەم ماڵپەڕو پەیجە نهێنیی و بندیوارەكەی .

پاش دروستبوونی جۆرێك لەدڵنیایی لەدەستنیشانكردنی خاوەنی ماڵپەڕو پەیجەكە ، (بەندە) لەڕێگەی ماسنجەری پەیجی (ڕۆژنامە)ەوە لەفەیسبووك ،چەند نامەیەكم بۆ خاوەن و بەڕێوەبەری ئەم پەیجە نارد ، تیایدا نووسیوومە ؛( سڵاو كاك .....ئەم بووختان و تۆمەت هەڵبەستنەت بۆ بەندە پێشبینیكراو بوو ، دڵنیابە ئەم تۆمەتەو هەر تۆمەتێكی تریش هەڵببەستیت ، ناتوانیت ڕامبگریت لە نووسینی وتار لەسەر هەموو چالاكیی و پرۆژە گووماناوییەكانت ، ئەشتاندۆزمەوە بەبەڵگەوە ، ئەوسا بەیاسا رووبەڕووتان ئەبمەوە ، دڵنیابن هەموو مولاحەقەیەكی یاسایی پێویستان لەبەرامبەر ئەكەم لەسەر ئەو بووختانە ، بزانن من ئەوانی تر نیم بێ دەنگ بم ، من لەهەوڵی ئەوەدام بەسەر كۆمپیوتەرەكەوە بتانگرم ، ئەوسا بەرەو دادگاو یاسا ، تەنها مەسەلەكە كاتەو هیچی تر) .

دارودەستەی شاسوار لەوەڵامی نامەكاندا ؛ وا خۆیان نیشان ئەدا كە ئەوان بێلایەنن و پەیوەندییان بەهیچ لایەكەوە نییە .

بەتێپەڕبوونی چەند ڕۆژێك ؛ سەرەداوی گرنگ دەستكەوت و سەرەداوەكە نزیك بووەوە لەكەسێكی زۆر نزیك و دەستڕۆیشتووی خاوەن پلەو پۆست لای شاسوار عەبدولواحید ، لەبەر هەندێك هۆكارو بۆ هێشتنەوەی نهێنییەكانی ئەو كەیسە لەبەر ڕێكاری یاسایی ، لێرەدا ڕێ بەخۆم نادەم هەموو دۆكیۆمێنت و وردەكاریی بخەمەڕوو ، بەڵام لەنزیكترین دەرفەتدا ، هەموو دۆكیۆمێنتەكان و زانیاریی ورد ، لەچوارچێوەی سكاڵایەكی تۆماركراودا ، بەپشتیوانیی (پۆست دۆكیۆمێنت!!) ؛ ئەخەمە بەردەمی دەسەڵاتی دادوەریی بۆ لێكۆڵینەوەیەكی دادپەروەرانە ، شایەنی باسە دۆكیۆمێنتەكان ؛ بریتیین لەژمارەیەك دۆكیۆمێنتی زۆر بەهێزی یەكلاكەرەوەی دوور لەگوومان و لاوازیی و  ساختەكاریی ؛ لە(دەنگ ، وێنە ، نووسراو ،دۆكیۆمێنت و ............ی زۆر گرنگتر  لەدۆكیۆمێنت ؛ كە بەندە ناوم ناوە پۆست دۆكیۆمێنت !! ) .

ئەستەمە بتواندرێت ڕاستیی دۆكیۆمێنتەكان ، بەتایبەتیی ڕاستیی ڕەهای  (پۆست دۆكیۆمێنت!!) ؛ ڕەتبكرێتەوەو نادیدە بكرێت .
بۆ ئەوانەشی كە چاوەڕێی بڵاوكردنەوەی دۆكیۆمێنتەكان ئەكەن ، لەگەڵ ئەم وتارەدا ، ئەمەوێت پێیان بڵێم ، بەداخەوە لەبەر ڕێكاریی یاسایی و پاش ڕاوێژكردن بەچەند كەسێكی شارەزای یاسایی و جەختكردنیان  لەبەرپرسیاربوونم لەڕووی یاساییەوە ؛ ئەگەر دۆكیۆمێنتەكان بەر  لەپێشكەشكردنی سكاڵاو تەواوبوونی پرۆسەی لێكۆڵینەوە بڵاوبكەمەوە ، بۆیە ناتوانم دۆكیۆمێنتەكان بڵاوبكەمەوە ، بەڵام هەموو ئەو بەڕێزانەی كە ئاماژەم بەناوەكانیان كردوەو بووختانی جاسووسییان لەو ماڵپەڕو پەیجەوە بۆ داتاشراوە ، هەروەها هەر كەسێكی تر ؛ بێجگە لەو ناوانە ، ئەگەر بەئامانج كراوە لەلایەن ماڵپەڕو پەیجی (ڕۆژنامە) ەوە ؛ بۆ تۆمەت و ناوزڕاندن و بووختانی جۆراوجۆر ، ئەوا لێرەوە بەهەموویان ڕائەگەێنم ؛ ئەتوانن بەچەشنی (بەندە) ،  پشت بەهەموو زانیاریی و دۆكیۆمێنتەكانی لای (بەندە) ببەستن ، ئامادەم بۆ هەموو هاوكاریی و هەماهەنگییەك لەگەڵ بەڕێزیان ، بۆ تۆماری سكاڵای یاسایی ؛ لەسەر دارودەستەی شاسوار عەبدولواحید.

لەكۆتاییدا ئەمەوێت ئەو  ڕاستییە دووپات بكەمەوە ؛ ئەم كەیسەی (بەندە) ، نە لەدوور ، نە لەنزیك ؛ هیچ پەیوەندییەكی بە ڕەوتی لێكۆڵێنەوەی دەستگیركراوەكانی ئەم كەیسەی دوایی كەسە نزیكەكانی شاسوارەوە نییەو كەیسەكە زۆر جیاوازە ،چ لە ڕووی جۆری دۆكیۆمێنت ،چ لەڕووی ناوەرۆك و جۆری سكاڵا .






ads
ads
Developed by Avesta Group and powered by Microsoft Azure

Copyright © 2015 Shar Press. all rights reserved