ئەردۆغان تووڕەیە: سکی خەڵکمان تێرکرد ئەوەش ئەنجامەکەیەتی

جیهان

17/05/2019‌ 5281 جار خوێندراوه‌ته‌وه

شارپرێس:
رەجەب تەیب ئەردۆغانی سەرۆک کۆماری تورکیا بێزاری خۆی بە ئەنجامی هەڵبژاردنەکانی ئەم دواییەی شاره‌وانییه‌كانی توركیا دەردەبرێت و دەڵێت حزبەکەمان سکی خەڵکی تێرکرد ، بەڵام ئەوان لە ئەستەنبوڵ دەنگیان بە ئۆپۆزیسیۆندا.

رۆژنامەی رۆژانەی "جمهورییەت',  باس لەوە دەکات کە لەکۆبوونەوەیەکی نێوان ئەردۆغان و بەرپرسانی پارتی داد و گەشەپێدانی دەسەڵاتدار لەسەر  دەنگدانی دەنگدەرانی کورد لە ئەستەنبوڵ بە پاڵێوراوی ئۆپۆزیسیۆن ، ئەردۆغان گوتوویەتی " چەند دەنگمان لە سوڵتان بیلی بەدەستهێناوە ؟ گەلێک خزمەتگوزاریمان پیشکەشی ئەوێ کردووە ، بەڵام لەگەڵ ئەوەشدا ئۆپۆزیسیۆن ١٥%دەنگەکانی لەوێ بەدەستهێناوە".

گوتووشیەتی " چیتر سەیری سکی خەڵک ناکەین ، بەڵکو سەیری سەرەکانیان دەکەین ... سکی هەموو کەسمان تێر کرد ، ئەوەش ئەنجامەکەیەتی ".

بەپێی قسەی رۆژنامەکە لەکۆبوونەوەی ئەردۆغان و بەرپرسانی پارتەکەیدا، ئەردۆغان گوتوویەتی " خواردنتان بەخەڵک بەخشی ، هەموو پێداویستییەکانتان بۆ پڕکردنەوە ، بەڵام هێشتا ئامادە نین دەنگتان بدەنێ".

ئەو لێدوانەی ئردۆغان توورەیی و بێزاریەکی فراوانی لە تۆڕە کۆمەڵایەتییەکان درووست کردووە ، بەجۆرێک بەکارهێنەرانی ئەو تۆرە کۆمەڵایەتییانە دەڵێن " سوڵتان ئێمەی تێر نەکردووە ، بەڵکو ئەوان زیاتر دەوڵەمەندتر بوون و ژمارەی هەژارەکانیش زیاتر بووە".

بەپێی داتافەرمییەکان ملیۆنان هاوڵاتی تورک لەژێر هێڵی هەژارییەوە دەژین ، داتاکانی پەیمانگای ئاماری تورکی دەڵێت لە مانگی شوباتی ساڵی ٢٠١٩ ژمارەی بێکارەکان لە تورکیا گەیشتۆتە ٤،٧٣ ملیۆن کەس ، ئەوەش بەڕێژەی ١،٣٧ لەهەمان مانگی ساڵی پێشووتر زیاترە.

لەگەڵ نارەزایەتییە ناوخۆیی و نێودەوڵەتییەکان ، بەڵام کۆمسیۆنی باڵای هەڵبژاردنەکانی تورکیا بڕیاریدا کە دووبارە پرۆسەی دەنگدان بۆ شارەوانی ئیستەنبوڵ بەرێوە بچێتەوە ، کە پیشتر ئەکرەم ئیمام ئۆغڵو پاڵیوراوی پارت گەلی کۆماری سەرکەوتنی بەدەستهینابوو.

بۆیە وابڕیارە رۆژی ٣ی کانوونی دووەمی ساڵی ٢٠٢٠ جارێکی تر هەڵبژاردن بۆ شارەوانی ئیستەنبوڵ بکرێتەوە ، چاودێرانیش پێیان وایە بەهۆی ئەو هەموو توورەیی و بێزارییەی خەڵک لە سیاسەتەکانی پارتی داد و گەشەپێدان هەیە ، ئەنجامەکان لە بەرژەوەندی پارتە ئۆپۆزیسیۆنەکان دووبارە ببێتەوە.

وەرگێرانی: ئاکۆ عەبدوڵلا ئاڵی