شارپرێس:

 وتەبێژی سەرۆکایەتی رووسیا هۆشداریدا بە وڵاتە یەکگرتووەکانی ئەمەریکا بەوەی چیتر  تەنگ بە ئێران هەڵنەچنێت و بەرەو ڕووبەڕووبوونەوەی راستەوخۆ پاڵی پێوەنەنێت ، لەبەر ئەوە ئەوە ئاکامی کارەساتباری دەبێت .

ماریا زاخارۆفا وتەبێژی سەرۆکایەتی رووسیا  لە کۆنگرەیەکی رۆژنامەوانیدا  رایگەیاند، وادیارە واشنتۆن بەئەنقەست لەڕێگای گەمارۆکان و گوشاری سەربازی و گوتاری دوژمنکارانە دژ بە ئێران دەیەوێت وا لە تاران بکات پەنا بەرێتە سەر ڕێوشوێنی تۆڵسەندنەوە ، هەروەک هۆکارێکیشە بۆ روودانی بەریەککەوتنی راستەوخۆ  ، کە ئەوەش سیاسەتێکی زۆر مەترسیدارە .

وتەبێژی سەرۆکایەتی رووسیا ئاماژەى بەوەشکرد، واشنتۆن لەڕێگای ناردنی کەشتی فرۆکەهەڵگر و  فرۆکەی مووشەکهاوێژەوە بۆ ناوچەی کەنداوی فارسی دەیەوێت رەوشەکە ئاڵۆزتر بکات ، ئەوە جگە لەوەی لێدوانی دوژمنکارانە و تۆمەتی بێبنەما ئاراستەی ئێران دەکەن وەک ئەوەی ئێران هەندێ چالاکی تێکدەرانەی لەناوچەکە کردبێت .

لەدرێژەی قسەکانیدا زاخارۆفا رونیکردوە، مۆسکۆ ئامۆژگاری واشنتۆن دەکات کە بیر لە ئاکامە چاوەروانکراوەکانی هەڵسوکەوتە دوژمنکارەکانی دژ بە ئێران بکاتەوە ".

و. ئاکۆ عەبدوڵلا ئاڵی