شارپرێس:
هەموومان دەزانین راهێنانە وەرزشییەكان بەكەڵك و پێویستن بۆ تەندرووستی جەستە و بەهێزكردنی تەندرووستی دەروونی و هۆشەكیمان ، هەروەك یارمەتیدەریشە بۆ دابەزاندنی كێش.

راپۆرتێكی نوێی بەریتانی ئەوەی ئاشكراكردووە، كە زۆربەی زۆری خەڵك كاتی پێویستیان نییە و ناپڕژێنە سەر ئەوەی خوویان بدەنە یارییەكانی لەشڕێكی ، لەبەر ئەوە رۆژنامەی "زە سەن"ی بەریتانی هەندێك جوڵەی وەرزشی باس كردووە، كە سەرقاڵترین كەسیش دەتوانێت بیانكات.

كاتژمێر حەوتی بەیانی ، هەستان لەخەو و خۆلێككێشانەوە 
هەر كە لەخەو هەستای ماوەیەك لەناو جێگا خۆت لێكبكێشەوە و باڵەكانت درێژ بكە و جەستەت لێكبكێشەوە و هەناسەیەكی قوڵ بدە ، دواتریش هەردوو ئەژنۆت بەرەو سنگت بێنە .

7:30 ی بەیانی : ڕاهێنانی هەڵترووشكان لەكاتی ددان شووشتن 
ئەم راهێنانە بریتییە لە نووشتاندنەوەی هەردوو ئەژنۆ وەك ئەوەی دانیشتبی و بەبەردەوامیش گوشار بخەرە سەر هەردوو قاچت .

كاتژمێر ٩ ، خۆت دوور بگرە لەوەی بەسەر ئاسانسوار " مصعد" سەربكەویت 
توێژەران دەڵێن سەركەوتنی بەردەوام لەڕێگای قادرمەوە  دەبێتە هۆی دابەزاندنی گوشاری خوێن و ئاستی كۆلیسترۆڵ ، واشدەكات كەمەرێكی نموونەیت هەبێت 

كاتژمێر ١٠ راهێنانی دیوار 
بۆ نموونە لەكاتی چاوەرێكردنی ئامادەكردنی چا یان قاوە هەندێ راهێنانی پاڵنان بەدیوار بكە .

كاتژمێر ٢ی دوای نیوەڕۆ رۆیشتن و قسەكردن 
شارەزایان دەڵێن كێشە نییە ئەگەر لەكاتی تەلەفۆنكردندا لەسەر كورسی دابنیشی ، دەشكرێت لەوكاتەدا لەڕێگای نووشتاندنەوەی هەردوو ئەژنۆ بە گۆشەی ٩٠ ، ماسوولكەكانی ران بەهێز بكەیت.

5:30 ئێوارە :  گرنگە جار جارە هەندێ راهێنانی سووك بكەیت وەك ئەوكاتەی چاوەڕێی پاس دەكەیت .

8 ئێوارە : راهێنانی ڕیكلامەكان
لەوكاتەی لەتەلەفزیۆن سەیری بەرنامەی دڵخوازی خۆت دەكەی ، زۆر گرنگە لەكاتی هاتنی بڕگەی ڕیكلامەكان خۆت بۆ هەندێ جوڵە و ڕاهینانی ماسولكە و جەستەت تەرخان بكەیت .

9 ئێوارە : ڕاهێنانی لەشڕیكی لەگەڵ هاوڕێكانت 
لەجیاتی چوونەدەرەوە بۆ خواردنی نانی ئیوارە یان چوونە كافێ و قاوەخانەكان ، دەتوانیت پلان بۆ هەندێ راهێنانی لەشڕێكی لەگەڵ هاوڕێكانت دابنێی ، وەكو یاری ڕیشە یان ڕۆیشتن بەشێوەی گورگەلۆقە .

وەرگێران: ئاكۆ عەبدوڵڵا ئاڵی