كچان بەشووكردن ناچار دەكرێن.. لەئێران هاوسەرگیری منداڵان پەرە دەسەنێت

sharpress.net

1205 جار خوێندراوه‌ته‌وه

04/06/2019‌

شارپرێس:
ئامارە فەرمییەكان باس لەوە دەكەن، كە هاوسەرگیری منداڵان لە ئێران زۆر تەشەنەی سەندووە، بەجۆرێك ئەو كچانەی تەمەنیان ١٤ ساڵی تێنەپەراندووە ناچاردەكرێن شوو بكەن بەتایبەت لەناوچە دوورەدەستەكان .

ئامارێكی فەرمی، كە دەستەیەكی دادوەری ناوخۆیی بڵاویكردووەتەوە دەڵێت: لەپارێزگایەكی وەك هەمەدان لەماوەی ساڵی رابردوودا ١٦٠٠ حالەتی هاوسەرگیری پێشوەخت تۆماركراوە لەبەرانبەر  ٣٦ هەزار حاڵەتی هاوسەرگیری پیشوەختە لەسەرانسەری ئێران .

میدیای ناوخۆیی ئێران باس لەوە دەكەن كە لە هەرێمی زنجان نزیكەی ١٤٠٠ كچۆڵە كە تەمەنیان لە ١٤ ساڵ كەمتریش بووە هاوسەرگیرییان كردووە ، هەروەك لە باكووری خۆراسانیش زیاتر لە هەزار كچۆڵەی لەو تەمەنە بەشوو دراون .

یاسای مەدەنی ئێرانی رێگە بە دایكان و باوكان دەدەن كە كچەكانیان ئەگەر تەمەنی یاساییشی تەواو نەكردبێت بەشوو بدەن ، بەو مەرجەی پێشتر ڕێگەپێدانی دادگا وەبگرن .

بۆ راگرتنی ئەو دیاردە نەشیاوە پرۆژە یاسایەك پێشكەش بە پەرلەمانی ئێران كرا ، بەڵام زۆرینەی ئەندامانی پەرلەمان كە لە پارێزكارانن پرۆژەكەیان رەتكردەوە .

بەشوودانی منداڵان مشتومرێكی زۆری لە كۆمەڵگەی ئێرانی درووست كردووە ، بەجۆرێك لەمساڵدا چیرۆكی بەشوودانی كیژۆڵەیەكی ١١ ساڵە بە پیاوێك كە ٤٠ ساڵ لەخۆی گەورەتر بوو شەپۆلێك نارەزایەتی بەدوای خۆیدا هێنا ، بۆیە دەسەڵاتداران ناچار بوون دەستێوەردان بكەن و كچۆڵەكە بگوازنەوە بۆ ناوەندێكی چاودێری .

وەرگێران: ئاكۆ عەبدوڵڵا ئاڵی







ads
ads
Developed by Avesta Group and powered by Microsoft Azure

Copyright © 2015 Shar Press. all rights reserved