گرنگترین رێنمایی بۆ خۆپاراستن لە پێوەدانى ئاژەڵە خشۆکەکان لە وەزرى هاویندا

هەمەڕەنگ

08/06/2019‌ 1517 جار خوێندراوه‌ته‌وه

شارپرێس:

له‌ وه‌رزى گه‌رما و هاويندا رووداوه‌كانى پێوه‌دانى مار و دووپشك زۆر ده‌بن هه‌ر بۆيه‌ خۆپارێزى و ئاشنابوون به‌ فرياگوزارييه‌ سه‌ره‌تاييه‌كان له‌ حاڵه‌تى پێوه‌دانى مار و دووپشكدا زۆر پێويسته‌.

پێوه‌دانى مار:
هه‌رچه‌نده‌ پێوه‌دانى هه‌موو جۆره ‌مارێك زيانبه‌خش نييه‌، به‌ڵام ده‌بێ پێوه‌دانى مار به‌هه‌ند هه‌ڵبگێرێت و فرياگوزارى سه‌ره‌تايى پێويستى بۆ بكرێت كه‌ خۆى له‌م خاڵانه‌دا ده‌بينيته‌وه‌:

• هێمن به‌و به‌بير خۆتى بێنه‌وه‌ كه‌ هه‌موو پێوه‌دانێكى مار كوشنده‌ نييه‌.

• به‌پێى توانا كه‌سى مارانگاز نابێ زۆر جووڵه‌ بكات، ته‌نها ئه‌گه‌ر به‌دواى كه‌سێكدا بگه‌ڕێت كه‌ يارمه‌تى بدات. 

• لادانى جلوبه‌رگ و خشڵ له‌و شوێنه‌ى كه‌ مار پێوه‌يداوه‌، چونكه‌ ئه‌و شوێنه‌ ده‌ئاوسێت.

• دانانى به‌سته‌رێكى توند له‌سه‌ر‌ شوێنى پێوه‌دانه‌كه‌، به‌ڵام ئه‌گه‌ر شوێنى پێوه‌دانه‌ له‌سه‌ر يان له‌ مل بوو ئه‌وا ده‌بێ گوشارى به‌رده‌وام بخرێته‌ سه‌ر شوێنه‌كه‌ به‌ڵام نابێ كاربكاته‌ جووڵه‌ى سنگ و هه‌ناسه‌.

• راكشان و هێشتنه‌وه‌ى شوێنى پێوه‌دان له‌ ئاستى جه‌سته‌دا، چونكه‌ به‌رزكردنه‌وه‌ى شوێنى پێوه‌دان ده‌بێته‌ هۆى بڵاوبوونه‌وه‌ى ژه‌هر به‌ به‌شه‌كانى ترى جه‌سته‌ و نزمكردنى شوێنى پێوه‌دانه‌كه‌ش ئاوسان زياتر ده‌كات.

• خۆت به‌دوورگرتن‌ له‌ به‌كارهێنانى ئازارشكێنه‌كان و ئه‌سپرين.

• هه‌وڵى كردنه‌وه‌ى شوێنى پێوه‌دانه‌كه‌ مه‌ده‌ به‌ چه‌قۆ يان مژينى ژه‌هره‌كه‌، چونكه‌ له‌وانه‌يه‌ زيانى زياتر به‌ مارانگازه‌كه‌ بگه‌يه‌نێت.

• گه‌ياندنى نه‌خۆشه‌كه‌ بۆ به‌شى فرياگوزارى نه‌خۆشخانه‌ بۆ وه‌رگرتنى چاره‌سه‌رى پێويست.
پێوه‌دانى دووپشك:

زۆربه‌ى پێوه‌دانانه‌كانى دووپشك پێويستى به‌ چاره‌سه‌رێكى ئاسان هه‌يه‌ كه‌ بريتييه‌ له‌:

• شووشتنى شوێنى پێوه‌دانه‌كه‌ به‌ ئاو و سابوون و لادانى جلوبورگ و خشڵه‌كان، چونكه‌ شوێنى پێوه‌دانه‌كه‌ ده‌ئاوسێ و بوونى خشڵ رێگه‌ له‌ ئاوسانى شوێنه‌كه‌ ده‌گرێ.

• پاراستنى هێمنى و نه‌شڵه‌ژان و دووركه‌وتنه‌وه‌ له‌ دروستكردنى قه‌ره‌باڵغى و ده‌نگه‌ده‌نگ له‌ ده‌روبه‌رى كه‌سى پێوه‌دراو بۆئه‌وه‌ى په‌ستانى خوێنى به‌رز نه‌بێته‌وه‌ و ژه‌هره‌كه‌ به‌خێرايى به‌ له‌شيدا بڵاونه‌بێته‌وه‌.

• دانانى به‌فر به‌شێوه‌يه‌كى پچڕ پچڕ له‌سه‌ر شوێنى پێوه‌دانه‌كه‌، ماوه‌ى ده‌ خوله‌ك دابندرێت، پاشان ده‌ خوله‌ك چاوه‌ڕێ بكرێت و ئينجا دووباره‌ به‌فره‌كه‌ دابندرێته‌وه‌.

• پێدانى ده‌نكێك يان دوو ده‌نك پاراسيتامۆڵ هه‌ر چوار كاتژمێر جارێك و دووركه‌وتنه‌وه‌ له‌ پێدانى ئه‌سپرين و ئيبۆپرۆفين، چونكه‌ له‌وانه‌يه‌ ببێته‌ هۆى كاريگه‌ريى لاوه‌كى.

• خۆبه‌دوورگرتن له‌ كردنه‌وه‌ى برينه‌كه‌ يان مژينى ژه‌هره‌كه‌.

• گه‌ياندنى نه‌خۆشه‌كه‌ بۆ به‌شى فرياگوزارى نه‌خۆشخانه‌ بۆ وه‌رگرتنى چاره‌سه‌رى پێويست.

وەرگیراوە لە k.ct

س.هـ