شارپرێس:
فالح ئەلساری سەرۆكی كوتلەی رەوتی حیكمە لەناو ئەنجوومەنی نوێنەران بەشێوەیەكی فەرمی محەمەد حەلبووسی سەرۆكی ئەنجوومەنی نوێنەرانی ئاگادار كردەوە لەوەی كوتلەكەیان دەبێتە كوتلەیەكی ئۆپۆزیسیۆنی .
ساری لە نووسراوێكدا كە ئاراستەی حەلبووسی كردووە و بەرواری (١٧ی حوزەیرانی ٢٠١٩)ی بەسەرەوە دەڵێت: ئاگادارتان دەكەینەوە، كە كوتلەی پەرلەمانی حیكمە بەرەو ئۆپۆزیسیۆنێكی سیاسی دەچێت ، داواتان لێدەكەین بەپێی یاسا پشت بەوە ببەستن و لەناو ئەنجوومەنی نوێنەرانیشدا لەسەر ئەو بنەمایە مامەڵە لەگەڵ كوتلەكەمان بكەن.
پێشتر رەوتی حیكمەی نیشتمانی رایگەیاند ، كە دەبێت بە بەرهەڵستكارێكی سیاسی حكومەتەكەی عادل عەبدول مەهدی سەرۆك وەزیری عێراق ، ئەوە دوای دوو رۆژ لە راگەیاندنی هاوپەیمانی نوسر بەسەرۆكایەتی حەیدەر عەبدای بەوەی دەبن بە ئۆپۆزیسیۆنێكی هەسەنگێنەری حكومەت.
رەوتی حیكمە لەم كابینەیە یەكەم لایەنە ، كە ئۆپۆزسیۆنی خۆی راگەیاندووە، كە لەكابینەكانی پێشوو بەشداری لەحكومەت نەكردووە.
هـ ـ ح