شارپرێس:
سەرچاوەیەكی ئاگادار باسی لەوە كردووە، لیژنەی هاوبەشی یەكێتی نیشتمانی و پارتی دیموكراتی لەسەر دابەشكردنی پۆستەكانی كەركوك دەست بە دانوستاندنەكانیان دەكەن لەگەڵ عەرەب و توركمانەكان.
ئەو سەرچاوەیە دەڵێت: لیژنەكە لەسەر بنەمای دابەشكردنی پۆستەكان، كە لە ساڵی ٢٠١١ كاری پێكراوە ، دانوستان لەگەڵ پێكهاتەكانی تری كەركوك دەكەن .
بە قسەی ئەو سەرچاوەیە لیژنە هاوبەشەكەی یەكێتی و پارتی دەیانەوێت پۆستەكان بەم شێوەیە دابەش بكرێن: پارێزگار ، بەڕێوەبەری پۆلیس ، قایمقایمی ناوەندی كەركوك بۆ كورد ، سەرۆكی ئەنجوومەنی پارێزگا بۆ توركمان ، پۆستی جێگری پارێزگار بۆ عەرەب .
سەبارەت بە دابەشكردنی پۆستەكان لەنێوان یەكێتی و پارتیش ، سەرچاوەكە دەڵێت: ڕێكەوتن كراوە پۆستی بەڕێوەبەری پۆلیس و قایمقایمی ناوەندی كەركوك بۆ پارتی بێت و سەرۆكی حكومەتی خۆجێیی كەركوكیش بۆ یەكێتی.
پێشتر یەكێتی و پارتی رایانگەیاند، گەیشتوونەتە ڕێكەوتنێك بۆ پاڵاوتنی "تەیب جەبار" بۆ پۆستی پارێزگاری كەركوك و درووستكردنی لیژنەیەك بۆ دانوستان لەگەڵ پێكهاتەكانی تری كەركوك و حكوومەتی ناوەندی لە بەغدا لەسەر چۆنێتی دابەشكردنی پۆستەكانی كەركوك.
ئامادەكردن: ئاكۆ عەبدوڵڵا ئاڵی