عەبدوڵڵا ئۆجەلان چۆن وەسفی دیار غەریب-ی كردووە؟

sharpress.net

3362 جار خوێندراوه‌ته‌وه

14/07/2019‌

شارپرێس:
"تۆ یەكێكیت لەو گەنجانەی، كە جەوهەرەكەت بە پاكی ماوەتەوە و دەتوانیت ئەم جەوهەرە پاكەت بكەیت بە هێز و ئەركی ڕێبەرایەتیی بخەیتە سەر شانی خۆت".

ئەوە وەسفی عەبدوڵڵا ئۆجەلانی سەرۆكی زیندانیكراوی پارتی كرێكارانی كوردستان بۆ دیار غەریب-ی ئەندامی دەستەی بەرێوەبەری كۆماجڤاكێن كوردستان كەجەكە بووە، كە مانگی رابردوو سوپای توركیا شەهیدی كرد.

بەپێی ئاژانسی رۆژ نیوز ساڵی ١٩٩٧ و دوای دوو ساڵێك لە بەشداربوونی بۆ ناو ڕیزەكانی پارتی كرێكارانی كوردستان-پەكەكە، دیار غەریب، ئەندامی كۆنسەی سەرۆكایەتی كۆما جڤاكێن كوردستان-كەجەكە، دەبێتە یەكێك لەو كەسانەی، كە هەڵدەبژێردرێت بۆ ئەوەی بچێتە ئەكادیمیای شەهید مەعسوم كۆركماز لەشام و پەروەردەی عەبدوڵا ئۆجەلان، ڕێبەری پارتی كرێكارانی كوردستان-پەكەكە ببینێت.

شەهید دیار غەریب زیاتر لەساڵێك لە شام لەگەڵ عەبدوڵڵا ئۆجەلان داماوەتەوە و جگە لە بەشدارییكردنی لە چەندین خولی پەروەردەیی ئایدۆلۆژییدا، بۆ ماوەیەكیش وێنەگری ئۆجەلان دەبێت، ئەمەش دەبێتە زەمینەیەكی باش بۆ شەهید هەڵمەت، تا زیاتر لە فكر و فەلسەفەی ئۆجەلان تێبگات و فكری خۆی دەوڵەمەندتر بكات.

نەجیبە عومەر چالاكوانی سیاسیی و یەكێكە لە هاوڕێیانی شەهید دیار غەریب، كە ٢٣ ساڵە شەهید دیار دەناسێت و بۆ ماوەی دوو ساڵیش پێكەوە هاوسەرۆكایەتیی پارتی چارەسەردیموكراتی كوردستان-پەچەدەكە-یان كردووە، باس لەو كاتە دەكات  شەهید دیار غەریب-ی ناسیووە و دەڵێت: هەڵمەت ئەوكاتە پێشەنگایەتیی بۆڕێكخستنی خویندەڤانان و یەكێتی خوێندەڤانانی وڵاتپارێزی كوردستانی دەكرد، ڕاستە لە تەمەنێكی لاوێتییدا بوو، بەڵام تایبەتمەندێتیی شۆڕشگێڕیی و ڕابەرایەتیی تێدابوو.

ئەو هاوڕێ ٢٣ ساڵییەی شەهید دیار غەریب، باس لە تایبەتمەندییەكانی شەهید دیار غەریب دەكات و دەشڵێت: بێسنوور بەرانبەر بە هەموو كێشەكانی كۆمەڵگا خۆی بە بەرپرسیار دەبینی، قاڵبوونەوەی لە بواری كۆمەڵناسییدا وایكردبوو هەمیشە هەڵسەنگاندنی لۆژیكیی بۆ كێشەكان دەكرد، كاتێك كە هەنگاوی بۆ كارێك دەنا زۆر بە باوەڕەوە بوو، هەم باوەڕی بەو فكر و تێكۆشانە هەبوو كە تێیدا كاری دەكرد، لە هەمان كاتدا باوەڕی بە فكری خۆشی هەبوو، خاڵی زۆر گرنگ ئەوەبوو كە هەڤاڵ هەڵمەت لە بواری فكرییدا زۆر قوڵبوو، وەكو هەندێك پێشەنگی ساختە نەبوو تەنها لە بواری كردارییدایان لە بواری شكڵیدا سەركردایەتیی و ڕێبەرایەتیی بكات، بەڵكو هەڤاڵ هەڵمەت زۆر بە زانستییانە ڕێبەرایەتیی بۆ كۆمەڵگا دەكرد.

نەجیبە عومەر، لەمڕووەوە زیاتر باس دەكات، هەڵمەت تایبەتمەندیی مامۆستای هەبوو، كە فێركەربوو، دەیویست هەموو كەسێك لە دەوروبەری خۆیدا فێر بكات، لە فێركردنی مرۆڤەكاندا هیچ كاتێك بێزار نەدەبوو، خاوەن پشوودرێژییەكی زۆر بوو، خۆشی وتەیەكی هەبوو دەیوت 'تێكۆشانی دیموكراتیی پێویستی بە پشوودرێژییە'، ڕێبەر ئاپۆش هەڵسەنگاندنێكی وەهای هەیە، كە دەڵێت دیموكراسییەت زۆر بە درەنگ دروست دەبێت، بەڵام زۆر بە درەنگییش هەڵدەوەشێتەوە، دیكتاتۆریەت درەنگ دروست دەبێت بەڵام زوو هەڵدەوەشێتەوە، هەڤاڵ هەڵمەتیش بێگومان لە ئایدۆلۆژیا و فكر و فەلسەفەی ڕێبەر ئاپۆدا زۆر بە باشی خۆی قاڵكردبووەوە.

نەجیبە عومەر، باس لە تێڕوانینی عەبدوڵا ئۆجەلان، ڕێبەری پەكەكە دەكات لەسەر شەهید دیار غەریب، كە هیوایەكی زۆری لە كەساییەتی هەڵمەت-دا كۆكردبووە و دەڵێت: چەندین جار ڕێبەر ئاپۆ بە هەڵمەتی وتووە 'تۆ دەتوانیت پێشەنگایەتییەكی بەهێز بكەیت، وەكو گەنجێك دەتوانیت باری گرانی ئەم تێكۆشانە بخەیتە سەر شانی خۆت، تۆیەكێكیت لەو گەنجانەی، كە جەوهەرەكەت بە پاكی ماوەتەوە و دەتوانیت ئەم جەوهەرە پاكەت بكەیت بە هێز بۆ ئەوەی ئەركی ڕێبەرایەتیی و پێشەنگایەتیی بخەیتە سەرشانت' كاتێكیش هەڵمەت دەبێتە  وێنەگری ئاپۆ.

دیار غەریب، یەكەم پێشەنگی تێكۆشانی گەلی كورد نییە، كە بە دەستی پیلانگێڕان دەگاتە كاروانی نەمران، بەڵكو لە ساڵی ١٩٩٦-دا بە دەستی پارتی دیموكراتی كوردستان-عێراق، كاوە عەلی ساڵح ناسراو بە  سیروان لەكاتێكدا ئامادەكاری بۆ دامەزراندنی یەكێتیی نەتەوەیی دیموكراتی كوردستان دەكرد، لە چەمی ڕەزان لە سلێمانی شەهیدكرا.

بەوتەی نەجیبە عومەر، عەبدوڵا ئۆجەلان زۆر كاریگەربووە بە شەهیدكردنی شەهید دكتۆر سیروان و هەمیشە وتوویەتی چۆن دەبێت باشووری كوردستان ببێت بە مەیدانێك، كە بە بەردەوام سەركردە ڕاستەقیینەكان تێیدا لەناوبچن، ئەوەش وایكردووە هیوایەكی زۆر لە كەسایەتیی شەهید دیار غەریب-دا كۆبكاتەوە و ئەركی پێشەنگایەتیی پێ بسپێرێت.

ئەو چالاكوانە سیاسییە ئاماژە بە هەوڵەكانی شەهید دیار غەریب دەكات بۆیەكخستنی نێوماڵی كورد و دەڵێت: هەڤاڵ هەڵمەت لە بوونیادنانی یەكێتی نەتەوەییدا تەنیا دروشمی نەدەوت، بەڵكو لەبەر ئەوەی یەكێتیی نەتەوەیی بە قووڵیی لە كەساییەتی خۆیدا دروستكردبوو، پێی وابوو ئەو هێزەی كەڕۆحیشی بە داگیركەرانەوە گرێدراوە دەتوانێت بە تێكۆشانی ماوە درێژ ئەو ئەقڵییەتە بگۆڕێت، چونكە باوەڕی بە سەركەوتن هەبوو، ئەم باوەڕییەش لەڕۆحی ئێمەی قوتابییەكانی هەڤاڵ هەڵمەتدا چێندراوە، بۆیە شەهیدبوونی هەڤاڵ هەڵمەت دەبێت بە قۆناغێكی نوێ بۆ دەستپێكردنی شۆڕش لە ئاستێكی بڵند-دا و سەرەنجام سەركەوتنی شۆڕش.

هـ ـ ح






ads

زۆرترین خوێندراوە

  • ڕۆژ
  • هەفتە
  • مانگ
ads
ads

ads
ads
Developed by Avesta Group and powered by Microsoft Azure

Copyright © 2015 Shar Press. all rights reserved