شارپرێس:
چاك شۆمەر سەرۆكی دیموكراتەكان لەئەنجوومەنی پیرانی ئەمەریكی لە نامەیەكیدا بۆ سەرۆكی نووسینگەكانی لێكۆڵینەوەی فیدراڵی و لیژنەی بازرگانی فیدراڵی، هۆشداریدەدات لەو مەترسیانەی ئەپڵیكەیشنی "FaceApp" لەسەر ئاسایشی نەتەوەیی ئەمەریكا دروستیدەكات .
شۆمەر لە تویتێكیدا دەڵێت: ئەپڵیكەیشنی "FaceApp" تەكنەلۆژیا بەكاردەهێنێت بۆ گۆرینی وێنەی بەكارهێنەرانی و وایانلێدەكات بچووكتر، یان بەتەمەنتر بن ، یان رەگەزیان بگۆڕێت ، لەگەڵ ئەوەشدا بۆ بەكارهێنانی ئەو ئەپڵیكەیشنە دەبێت مافی ئەوە بە كۆمپانیاكە ببەخشی دەستی بگات بە هەموو وێنە و داتا كەسییەكانت بێ هیچ كۆت و بەندێك .
بەقسەی سیناتۆرەكە ئەپڵیكەیشنی "FaceApp" هەڕەشەیە لەسەر ئاسایشی نەتەوەیی ئەمەریكا و تایبەتمەندی ملیۆنان هاوڵاتی ئەمەریكی .
شۆمەر داوای لە "FBI" كردووە بزانێت، كە چۆن دەبێت زانیاریی كەسیی ملیۆنان هاوڵاتیی ئەمەریكی لەلای ئەپڵیكەیشنی فەیس ئەپ بكەوێتە دەست حكومەتی روسیا یان ئەو رێكخراوانەی سەر بە روسیان .
ئەپڵیكەیشنی "FaceApp" لەلایەن كۆمپانیای Wireless Labی روسییەوە پەرەیپێدراوە و بۆ گۆڕینی ڕواڵەتی خەڵك بەكاردەهێنرێت ، بەشێوەیەك دەتوانرێت وا لە سیمای كەسەكە بكرێت بچووكتر یان بەتەمەنتر دەربكەوێت .
سەرەرای ئەو رەخنانەی لێیدەگیرێن و ئەو مەترسیانەی شارەزایانی بواری ئاسایشی ئەلیكترۆنی لەبارەیەوە باسی دەكەن ، بەڵام ئەو ئەپڵیكەیشنە لەماوەیەكی كەمدا وەك ئاگری ناو پووش بەخێرایی لەجیهاندا بڵاوبۆوە .
وەرگێڕان: ئاكۆ عەبدوڵلا ئاڵی
