شارپرێس: ساد (THAAD) كورتكراوی ـ Terminal High Altitude Area Defense واتا سیستەمی بەرگری لەناوچە ئاستبەرزەكان دەگەیەنێت . سیستەمی" THAAD" بەوە جیادەكرێتەوە، كە دەكرێت لەجێگایەكەوە بۆ جێگایەكی تر بگوزرێتەوە ، واتە سیستەمیكی جێگیر نییە . بەگوێرەی پێگەی "Missile Threat" ، " THAAD" توانای ئەوەی هەیە ڕێگری لەو مووشەكانە بكات، كە لە دووری ٢٠٠ كیلۆمەترەوە لەناوەوەو دەرەوەی بەرگە هەوای زەوییەوە دێن ، بەوەش كاریگەرییەكانی چەكی كۆكوژ كەمدەكاتەوە پێشئەوەی بگاتە سەر زەوی ئەو توانایەی ساد بۆ ڕێگریكردن لە مووشەكەكان لەناوەوە و لەدەرەوەی بەرگە هەوای زەوی ، وای لە سیستەمەكە كردووە ببێتە بەشێكی گرنگ لەچوارچێوەی چەمكی بەرگری مووشەكیی ، هەروەك توانیویەتی خاسییەتەكانی هەردوو سیستەمی بەرگری exo-atmospheric Aegis بۆ ڕێگری لە مووشەكەكان لە دەرەوەی بەرگە هەوای زەوی و سیستەمی بەرگری Patriot بۆ ڕێگری لە مووشەكەكان لە ناوەوەی بەرگە هەوای زەوی لەخۆیدا كۆبكاتەوە. سیستەمەكە بەهۆی بوونی تەكنەلۆژیای پێشكەوتووی لەدوورەوە هەستپێكردن تییدا كە بە مانگە دەستكردەكانەوە بەستراوەتەوە ، دەتوانێت ئامانجە راستەقینەكان و ئامانجە ساختەكان لەیەكتر جیابكاتەوە ، ئەوەش وایلێدەكات بەپێی دواین گۆرانكارییەكان لەكاتی ئاراستەكردنیشیدا دووبارە ئاراستەكەی بگۆردرێتەوە . پێكهاتەكانی سیستەمەكە سیستەمەكە لە چوار بەشی سەرەكیی پێكهاتووە كە هاوێژەر ( سەكۆی هاویشتن )و مووشەكی رێگری و رادار و یەكەی كۆنترۆڵی مووشەكەكانن . سەكۆی هاویشتن لەسەر پشتی گالیسكەیەكی سەربازی جێگیر دەكرێت بۆ گواستنەوە و هەڵگرتنی ، كە هەر سەكۆیەك ٨ مووشەكی لەسەرە ، بەشێوەیەك پێكهاتەی ئێستای سوپاكان بۆ سیستەمی ساد وایە كە لە ٦ سەكۆی هاویشتن و ٤٨ مووشەی رێگرتن پیكدێت . كابینەی كۆنترۆڵ و بەڕێوەبردنی جەنگ و پەیوەندییەكان (C2BMC) زانیارییەكانی ناوچە هەرێمییەكانی تر وەردەگرێت و ئەو زانیاریانەی لە ئامێرەكانی هەستپێكردن لە دوورەوە لە سیستەمی "Aegis وPatriot" وە دێن ، كۆدەكاتەوە . سیستەمی كۆنترۆڵكردنی هاویشتنی مووشەكەكان بە بڕبرەی پشتی پەیوەندییە تەلدار و بێتەلەكان و ئیدارەدانی ئەو داتاو زانیاریانە دادەنرێت كە لە مانگە دەستكردەكان و ئەو ئامێرانەی هەستپێكردنەوە دین كە لە ناوچەكانی تر جێگیركراون . سیستەمی " THAAD" راداری (AN/TPY-2) بەكاردەهێنێت كە لەلایەن هێزی دەریایی ئەمەریكییەوە پشتی پێدەبەسترێت و توانای گواستنەوەی هەیە ، ئەو رادارەش لەدووری ١٠٠٠ كیلۆمەترەوە توانای بەدواكەوتنی مووشەكەكانی دوژمنی هەیە. ئامادەكردن: ئاكۆ عەبدوڵڵا ئاڵی