بەهدینان دلێ كوردستانێ و گەوهەرێ كوردایەتیێ یە!

sharpress.net

254 جار خوێندراوه‌ته‌وه

16/08/2019‌

بونا دیاركرنا رول و گرنگیا دەڤەرا بەهدینا ن، چ دئالیێ مروڤایەتی یان ژی دئالێ ئابوری، شارستانی، كەدواری.... و ئالیێن دی دا، من بگرنگ زانی راپورتەكێ یان ژی خاندنەكا سەرپێ بدەمە سەر رول و تێگەهێن جودا جودا و نەخاسم جیوسیاسیێ دەڤەرا بەهدینان، دبیتن دئالیێ زانستی دا، ڤَێ خاندنێ بهایەكێ زانستیێ، تژی پیستێ خوە نەبیتن، لێ باوەرم دئالیێ سیاسی، جەماوەری، ژیواری و ئابوری دا، نەخاسم دتەڤن و رێكخستنێن جڤاكی و مەدەنی دا، بهایێ خوەیێ گەوهەری و تاكو زانستی ژی هەیە، چونكی ئەڤ خاندنە ژ بەرئەنجامێ ڤەرێژا خەباتەكا دویر و درێژا كریاری و كەدواریە ، چ دئالیێ خاندنێ دا یان ژی دئالیێ كریار و چالاكیێن هەمی ئالی دا، نەخاسم دئالیێ خەباتا سیاسی و سڤیلا كریاری و بێ هەمبەری دا.

ئەڤ بابەتە خال خال یان تەوەرە تەوەرە هاتیە دابەش كرن و هوناندن، وەكی تەوەرێ دێروكی و شوینواری، پێكهاتەیێ گەل، نەخاسم دئالیێ نەتەوەیی و دینی و مەزهەبی دا، تەوەرێ ئابوری و ڤەریّژا دارایی، دێروك و سەربورێ سیاسی و جەماوەری...تەوەرێن دی یێن جودا جودا، مەرەم ژی، ژڤێ خاندنێ نەكو بهادانە بدەڤەرەكێ و كێم كرنا دەڤەرەكا دییە، بەلكی روهنڤەكرن و بساخلەمی، نیشادان و بەرچاڤ گرتنا راستیەكا رەها و بەرچاڤ گرتنا بهایەكێ گەوهەریە، یێ كو هاتیە نخافتن و دهێتن بەرزەكرن و ژێبرن، ئەوا راستی ژی بیتن، بهایێن گەوهەری نەدهێنە هندا كرن و نە ژی دهێنە ژێبرن، چونكی راستیا گرنگی و مادیەتا گەوهەریا ڤێ دەڤەرێ، ئەو راستیە یا كو دبێژنێ ((بەرێ روژێ ب بێژنگێ ناهێتن گرتن ))، دبیتن رویدانێن دێروكی ژی دووبارە نەبن، لێ وێنەیێن راست و دروستێن دێروكێ ژی قیت دبن و ناهێنە نخاڤتن و بەرزە كرن، بویە راستیا كورد و كوردستانێ ناهێتن ئیسبات كرن، ئەگەر راستی و خودانیا دەڤەرا بەهدینان، وەكی خوە نەهێتن خویا كرن و پشتەڤانی كرن، لەومانێ ل ڤێرە بێ دوو دلی و گومان دێ بێژم هەڤالینا!  كوردینا! خەلكێ كوردستانێ و بنەخاسمەیی بەرپرس و خەلكێ كاربەدەست و دەستهەلاتدار، گازیەكا من بو هەوە هەیە، چی دی راستیا بەهدینان و خەلكێ بەهدینان بەرزە نەكەن، خودانیەكا وژدانی، ئەخلاقی، مروڤایەتی...پاشی وەلات پاریزی و گەل پارێزی، ل دەڤەرا بەهدینان بكەن ! بەهدینان ئەو ناڤەندە یا چار پارچەیان دكەتن ئێك پارچە !  دكەڤناری و رەسەنیا خوەدا، بێ هەمبەرە، گەل كومەكی و چەندایەتیا( نەتەوەیی، دینی، مەزهەبی، هزرو بیری...) بهاو سەنگەكێ هەم كەڤنار و هەم ژی گەوهەری هەیە، خودان جەماوەرەكی فرە ئالی و فرە چەشنیێ زەنگین و دەموكراسیە، دبهایێ خویێ ئابوری و دارایی دا، سەر و سامانەكێ زەبلاح و زەحەف هەیە، خودان كەش و هەوایەكێ نازك و نازدار ە، دخوەدا فەراشین و ساز و سازگارە، ئەو ئاخە یا دگوتنێ بەهشتا عەدەن و ئەیكا دلداریێ...لەومانێ وەكی ئەركەكێ نیشتیمانی و ئولداری و مروڤایەتی من ئەڤ ئەركە ئێخستە سەر مللێن خوە، بێ شكە ژی دێ تژی بیتن ژ كێماسی و كەچاتیێن خوە، لێ ئەركێ وان بەرێز و خاندەڤانێن هێژا و گراڤی ژی ئەوە، یێن شاشی و كەچاتیا دبینن، بهونینەكا مەعریفی و زانستی رەخنا خوە بگرن ، ئەوا دبینن كێمە تەمام بكەن، ئەوا دبینن سەهویە راستڤە بكەن...بلا مەرەما مە هەمیان ژی خزمەتەكا پاك و بێ گرێ و تێر بهایی بیتن...هەروەسانێ بەرخوەدان و راستڤەكرنێ ژی  دبابەتی دا بكەن، ئەم یەكین، ئەرك و واجیباتێن ئێك دوو تەمام دكەین، وەلاتێ مە ئێكە و دەیكا مەهەمیایە، گەلێ مەژی ئێكە و بو مە بابە...ب دل و دەرونەكێ پاك و سازیكرنەكا نمونەیی خزمەتا خو بكەین، ب بین زێرەڤانێن وەلاتێ خوە، بهاو و گەوهەرێ گەلێ خوە ، لێ خودان دەركەڤین.

1- دێروك روناهیا روژێ و مەلحەما برینایە:-
كوردستان وارەك  و  وارگەهەكێ كەڤنار و زەنگینە، گەلێ كوردستان ژی روبیشتەیەك و گەلەكێ دێرین و خودان سەربور و سەرپێهاتیێن كەڤنار و زەنگینە،  بەهدینان ناڤێ كەڤنارترین دیانەتە و ناڤێ ئێك ژ پشكەكا پەرتوكا پیروزا ئاڤێستایێیە، ژبلی وێ ناڤ و دەربرینا پاكی و تەمیزیا ناڤەروكا دینێ مروڤایەتی و كاكلا مروڤاتیا روهن و زەلال و بێ خرشییە، دیانەتا بەهدینی دبیتن تایەكێ بنگەهی بیتن، ژ دیانەتا رەسەنا میتەرانی، هەردیسا دیانەتا پەیامبەر(زەرەدەشتی = زەرتوشتی) ناڤێ وێ بەهینانیە ، واتە چاكترینێ دینان( بهترین دین)، ئەڤ دەڤەرە دجوگرافیا خودا، دەست پێ دكەتن ژ خارییا  چیایێ شنگالێ، واتە گزیرتەیا روژئاڤایێ عێراقێ، كو دگەهیتن سەر سنورێ ئوردنا نوكە، بەرەڤ باكورێ روژهەلاتی، درێژ دبیتن تاكو كێلەشینی و سێگوشەیێ، سنورێ(ئیران، توركیا، عێراق) پێكڤە گرێدەتن( ب درێژاهیا 360كم و پانیا زێدەی 100كم) ژ سەریا شرگات تاكو دگەهیتن سنورێ جزیرا بوتان، واتە پانیەكا زورا مەزنا ئاخا كوردستانێ(میزوبوتامیا) بخوڤە دگریتن، ئەڤ هەرێمە ژ بلی دخودا كەڤناریەكا زێدە مەزن و تژی سەربور و بەرەكەتی هەیە، ئەڤ دەڤەرە مالاباتا كەڤنارترین شارستانیەت و كەڤنارترینێ دین و مەزهەب و هزروبیرایە،  دبیتن لاندكا شارستانیەت و كەڤنارترینێ بەربابكێ مروڤاتیی یە، كو دهێتن دیتن د شارستانیەتا( سومەری، ئەكەندی، ئاشوری، میدی، ئوراتویی، سوباری، كاردوكی، هیتی و هوری و گەلەك دەولەت و ئیمپراتوریەتێن كەڤنار و خودان باندورا خویا مەزنە، ل سەر ڤێ ئاخێ و بزەند و باسكێن كورێن ڤێ هەرێمێ،  ئاڤ و ئاڤاهیێن ژین و ژیارێ ئاڤا و ئاڤەدانی بوینە، بوناڤێ ئاخا بەهدینان لبن قال و قیل و لبن پاڤەزەنگ و لێكدان و پێكدانانێن دێروكێ و دناڤا سیهو سیمایێ ، ب بەرئێك كەڤتنیێن شارستانیەتی،  نەهەر بتنێ بهوژییە، بەلكی مەند و خاڤ بویە دناڤا شەر و شور و توز و دومانا دێروكێ دا، ژ بلی وێ ئەڤ هەرێمە دبیتن مەلبەندێ جیهانێ، ژبلی روژهەلات و روژئاڤایێ، باكور و باشورێ دونیایێ ل ڤێرە بنگەه و چقێ ب ئێكگەهشتنا خو پێكڤەگرێدەدەن، دبیتن هەرێمەكا زورا زەنگین، چ دئالیێ جیوسیاسی دا بیتن، یان ژی دئالیێ ئابور و سەر و سامانێ بن ئەردی و سەر ئەردی بیتن، ل ڤێ هەرێمێ ژ بلی روبارێ زیێ(بچیك و مەزن)، روكوچك، خازر، رویێ شین، خابویر...گەلەك روباریێن دی هەنە،  بنەخاسمەیی دبیتن روگەها داهوریانا هەردوو شەهمارە رویباریێن مەزن(دیجلە و فورات) ژبلی وان ژی گەلەك دەریاك و كانی و ئاڤگەهێن بوش و مەزن و ستراتیژیك بو ژیان و ئاڤدێریێ ل ڤێ هەرێمێ سەروكانی و بنگەهێ خوە وەردگرن، (( خودایێ ئونكیدو وەكی رەمزا خودیێ ئێكانە ل بەریا 3700 پ.ز ، پیروزیا خوە هەبویە، وەكی خودایێ جیهانگیری پیروزی و حەجاوی ئەركەكێ مروڤایەتی بو ! ژ هەر چار سوچێن دونیایێ خەلك دهاتن حەج و پیروزیا وی...ئونكیدو نوكەژی جهێ وی ل وانكا كەڤنە ل باكورێ روژئاڤایێ میسل ل نێزیك سكرێ میسل))، هەردیسانێ دكڤن دا، ئەلندا هزرا دین و پەرستنا خودایی ل ڤێ هەرێمێ ئاڤزسبویە و سەرهەلدایە و پاشی بەلاڤی چار كناریێن دونیایێ بویینە، وەكی دیانەتا میتەرانی، بەهدینی(زەرەدەشتی)، سائیبە المندائیە و ئیّزدایەتی و پاشی دیانەتا جوهیاتی(یەهودییەت)، دیناتە موسی پەیامبەر، پاشی مەسیحیەت و ئیسلام و بابیەت، برهوریشیال و پەل و چقێن خوڤە، كو مەزهەب و رێكێن( یارسانی، عەلەوی، ئیسماعیلی، كاكەیی، سونی(مالكی، حەمبەلی، حەنەفی..) و(شیعەتی) بهەر دووازدە مەزهەبێن خوڤە...كەواتە چاوان بەهدینان بنگەهەكێ هەری سەرەكیێ گەل و مللەتان بویە، هەر بوی رەنگی بنگەهێ دین و مەزهەبان ژی بویە، هەر بویە بەهدینان مەلبەندێ هەری مەزنێ مروڤایەتی و چەندایەتی و چلونایەتیا هزر و بیر و مەنزولگەها ئاڤاهی و تەڤن و ڤەرێژا ئاڤاهیێن پێكڤەژیانێ و دگەلك دا سەردەریكرنێ بویە، ئەڤ چەندایەتی و چونایەتا هەیی،  دبیتن ببیتن بنگەهەكێ ئارامێ گەل حەوین و گەل ژیانیێ...كوم و جوین و رەگەزێن جودا جودا و بروحا پێكڤەیی و بهەڤرایی دگەلك دا ژیانە و ئیدارە و گوزەرانی دگەلك دا كریە، بویە روحا لێبوین و ئاوایێن تێكەلی و بهەڤرا ژیانێ بخورتی  ل ڤێ هەرێمێ سەر هەلدایە و پێكڤە ژیان دوماندیە، دبیتن هەر ئەڤ ئەگەرەبن سەبر و تەحەمولا ئەیوبی ل جەم خەلكێ ڤێ دەڤەرێ بكوم ڤەگرتی و كریە خەزینە و هێڤێنی بهەڤرا ژیان و بنەكوكێ ئارام گریەكا جەسەدی و دەرونی و ڤەوژێرەكا كەلەكەبویا هزر و بیر و ئالیسەنگیا دینی و نەتەوەیی، تا كو ئەڤ هەرێمە و ئەڤ خەلكە پێكڤە و دگەلك دا بهەمی رەنگی و هەمی ئالیێن ژیانا بهەڤرایی و بهەرەوەزی پێكڤە ببەنە سەری، كورد(شەبەك و ئێزدی)، مەسیحی(پروتستاند، كاسولیك، ئەرسەدوكس – ئاشوری، كلدان، ئەرمەنی، ئاسوری، نەستوری) و گەلەك مللەت و خەلكێ دین و نەتەوە جودا وەكی ئێك گەل و ئێك مللەتی ببرایەتی و بهەڤكاری و بئارامی ژیان پێكڤە بوراندیە.

2- بەهدینان نەهەر بنگەهێ ئابوری و خەزینا جەماوەریە، بەلكی كلیلا ئێك پارچەییا كورد و كوردستانێ یە:

بەهدینان دل و ناڤكك و كاكلا كوردستانێیە، پێك دهێتن ژ روبەرەكێ زورێ مەزنێ تژی چیا و دول و نەهال و دەشت و بانیە، دناڤا هەلكەڤتێ بەهدینان دا شەهماریێن رویبارا، هورە هورا سیپان و سیپەلان، كانی و جوبار و دەریاچە و واحەیێن هین و تژی ئاڤ، دارستانەكا مشت و هەمی رەنگ، دارەبەن، كەزوان، كەڤوت، دارەمازری و بەرویی و دیندار ، كاژ و هەڤرست و سنوبەر، هەلهەلوك و گوهیشك و گرسك و بسەدان و بهەزارەها جورێ دار و باری و گژوگیایێ عەنتیكە و زور گرنگ بو ژیانێ، چ وەك خارن و ڤەخارن یان ژی وەكی داو دەرمان...ئاخا بەهدینان ژ بلی خەزینەیەكا زور و زەبلاحا سەروسامانێ بن ئەردیە، تژیە ژ سامانێ( ئاڤی، گاز و غاز، نەفت و قیر، فسفور و فوسفات، كبریت و بەرێ رەژویێ، بەروكەڤریێن( مەرمەری، گرانێت، گەچ و شویشە و فەخاری، هەمی جورێن ئاسنی، زیڤ، زێر، یورانیوم، كوبالت، ستیل و ئەلەمنیوم، زەرنیخ و مەعدەنێن هەمی جور و هەمی رەنگی...)، ئاخەكا تاكو بێژی تژی بەرەكەت و تژی داهاتێ گەوهەری، هەمی رەنگێ تەرش و كەوالی، گیاندارێن كەهی و كویڤی، هەما بێژە بەهدینان گولستانەكا مەنگا ئاژەلداری و گیانداری یە...ئاڤ و هەوایێ وێ ساز و سازگارە، هەرچار وەزرزێن سالێ ، بهار، هاڤین، پائیز، زڤستان لێهەنە و هەرئێك دبیتن سێ مەهی،  واتە دابەش بونەكا كەش و هەوایێ وەرزی بدادەڤانی دسروشتێ خوەداهەیە، د ئالیێ زمان و كولتور و فلكلور و تورەڤانیی ژی دا گەلەك زەنگین و هەمی رەنگە...تشتێ دیێ هەری زروری و ژیاری، بەهدینان ژبلی چقێ كوردستان و ناڤكا روژهەلاتا ناڤینە، چار پارچێن كوردستانێ(+) كوم (1) پێكڤە گرێ ددەتن( رۆژئاڤا، باكو، روژهەلات، باشور + كوردستانا سوڤیەتی(یەریڤان و نەگورنوگەرەباغ)) ل بەهدینان دگەهن ئێك و پێكڤە دهێنە گرێدانێ، ژ بلی وێ ژی چار دەولەتێن بزوری دروست كری(ئیران، توركیا، سوریا، عێراق) دیسان سنورێن وان یێن زوریێ ل سەر ئاخا بەهدینان هاتینە وێنە كرن، كەواتە پەیمانا(سایكسبیكویی) و( سیڤەر و لوزانێ) وەلاتێ مە، كوردستانا مە، وارگەهێ باب و كالیێن مە، بدارێ زوریێ، بێی كو رەنگ و دەنگێ مە بهێتن وەرگرتن، وەلات پارچە پارچە كریە، كوردستان دابەشی سەر چار دەولەتان كریە...كەواتە بەهدینان، دلێ كوردستانێ، ئاخا میدیا ل ڤێرە بویە چار پارچە + ئێك( دەولەتا عێراق، سوریا، توركیا، ئیران  +  كوردستانا سور)،هەر ل ڤێرە هاتیە پارچە كرن و دابەشی سەر دەولەتێن داگیر كەر كریە، هوسان زولمەكا دێروكی، غەزایەكا ئولی، غەزەبەكا نڤشی ل سەر كوردان، ل سەر گەلێن كوردستانێ ، هاتیە داسەپاندن و بڤی رەنگی جەرگێ وەلاتی، نڤش و روبیشتەیا زولال و رەسەن هاتیە دابەش كرن و ژێك پارچەكرن و لێكڤەكرن...بویە بێی بەهدینان یەكێتی و بهەڤراژیان نابە و ئەگر ببیتن ژی دێ زەحمەتی و جەڤر و جەڤایەكا زور و بزورداری ، روژ بو روژێ هەودەتن و سەرهەلدەتن و مەزن و زور و تەهلوكەداری ... ب بەردەوامیی هەبیتن و ل سەر ئێك ستویر و كویفكویی بیتن و بیتن سەرەتانەكا ئەزەلی ، بویە یێ كورد و كوردستان بڤێتن، دڤێتن خودانیێ ل بەهدینان بكەتن، ماف و حەقداریا ڤێ هەرێما گرنگ بدەتنێ.

3- ئابورێ بەهدینان سێ پشكن ژ چار پشكێن داهاتێ هەرێما كوردستانێ:

مخابن ئەم گەلەكین، ئەقلێ مە پاشی دهێتن، دكەین و ناخوین، كەدا مە نەیا مەیە، یێن بەرێ مە دخون نەكوردن، یان ژی چەتە و قوروجیێن نەیار و داگیر كەرێن وەلاتێ مەنە! مە شورەشەكا درێژ و تژی قوربانیدانیێن مەزن و فرە ئالی كر ، ل بەرئەنجامی دەركەڤت نەشورەش بو مەكری، قوربانی و كارەساتیێن شورەشێن مە نەبتنێ ئێك دەولەت دا پێ هێتن دروست كرن، بەلكی ئەگەر ساخلەمی و دلپاقژی هەبایە، چار دەولەت + ئێك دەولەت دا هێتن دروست كرن، ئیمكان هەبوینە كورد و كوردستانی ئیمپراتوریەتەكێ بڤان قوربانییان ئاڤا بكەن، ئیمپراتوریەتا مەژی دبیتن ژ كەنداڤێ و دەریا رەش و دەریا سپی، وەكی سێگوشەكا روند و موكوم شەنگەستێ ئیمپراتوریەتا خوە خورت مە دابایە ئاڤا كرن، لێ مخابن بو جاشقوروجیەتێ، مخابن بو كولاتی و جاسوسیەتێ، مخابن بو سەروكاتی و رێبەریا وێران و دووسەر و خوپەرست و دز و گەندەلا خراب، یێن شورش كری و شورەشگێر فەنابوون، هاتنە هندا كرن، ماف لێ هاتن خارن...جەرد و چەتا، ترسنوك و خوپەرستا، دووسەر و حیلەكەران...وەلات فروت، گەل دابەش و بێ هیواكرن، بێ وژدانی و بێ ئەخلاقی كر، هێزا گەل، ڤەژەنا نەتەوەیی خار و مار كرن، ب دەستدرێژیەكا ئویتەیی، ب ئەقلداریەكا سەختە و هەرمی سەردەری كرن...بویە ئەنفال، كیمیاباران، دەربەدەری، كارەسات و گرتن و هندابونەكا ئەزەلی و هەردەمی كرە بەهرا گەلێ خوە ...لەومانێ هەرچەند سالان تالانەك بسەر مەدا دهیێتن، ئەنفالەك و كارەساتەكا مەزن بەروكا مە دگریتن، رەڤ و هندا بون دبیتن نەسیبێ مە...سەدسال خەباتا سیاسی، شێست سال خەباتا چەكداری، بیست و نەهسال سال ئیدارەدانا خومالی...براستی حەیف و فهێتیە گەل دڤێ رەوشێ دا بژیتن، وەلات لبن ڤان هەمی كارەسات و مەترسیاندا گوزەرانیێ بكەتن...ئەگەر گرنگیا كەرتێ كشتوكالی و گەشت و گوزاری وەكی هەیی هاتبایە پاراستن، داهاتێ مە پێتڤی بو دەولەتەك (10)دەه ملیونی ب باشترین خودانی خودان كربایە، لێ مخابن ئەڤە نەهاتە كرن، ئەگەر پەرەپێدانا پیشەسازی و بازرگانی دیسان هاتبایە كرن، ب باوەرم دەولەتەك(20)بیست ملیون مروڤی نوكە ل وەلاتێ مە ب باشترین ژیان و سەردەری هاتبایە خودان كرن، ئەگەر وەبەرهێنانا ئەقلێ مروڤی دیسان بئاوایەكێ زانستی هاتبایە كرن، دیسانێ دەولەتەكا(20)ملیونی ل سەر ئاخا مە پێویست بو هاتبایە ئاڤەدانی كرن، ئەگەر سەرواتێن گومركی و زەریبی و سامانیێن بن ئەردی دیسان برەنگەكێ زانستی و وژدانی هاتبانە خرڤەكرن و مەزاختن دیسان دەولەتەكا(30)سیهملیونی پێویست بویە هاتبایە ئاڤەدانی كرن، بتنێ گاز و غازێن بن ئەردێ بەهدینان، خەزینەیەكا زەبلاح و بێ هەژمارە...لێ مخابن دیسان دەركرن و بكارئینانا وانان، نەوژدان، نە ئەخلاق، نەژی مروڤایەتی نە هاتینە رەچاو كرن...هەر ئەڤە بویە دزی حەلال كری، گەندەلی كریە پیشە و فسق و فەساد و دووسەری و جاسوسیەت كریە جهورەك دایە سەر لومبیزا ڤێ دەستهەلاتا خراب و تەهلیكە.

نوكە ئابورێ دەڤەرا بەهدینان دهێتن كوم كرن د چەند خال و بواران دا، زەریبە و گومرك و رسومات و سزا و عەقارات و كریێن خانوبەر و ئەرد و ملكان، دیسان پارێ ئاڤ و كەهرەب و داهاتێ ژ ڤی رەنگی...هەردیسان سەر و سامانێ گشتی و سروشتی كو دهێتن كوم كرن د داهاتێ نەفت و گاز و سامانێن دی یێن بن ئەردی و سەر ئەردی دا...دەروازەیێن سنوری، دەروازەیێ گومركا( ئیبراهیم خەلیل، دەرگەهێ پێشابویرێ(سێمالكا)، دەرگەهێ سەرزێری(كانیماسێ)، دەرگەهێ زێتێ(مێرگەسورێ)، دەرگەهێ حاجی ئومەران...هەردیسانێ سەرچاوەیێن نەفتێ، نەفتا( سحێلا، بنێ چیایێ سپی، نەفتا باعەدرێ ، شێخان، سەهل نەیناوا، تەوكێ ل(زاخو)، ل ئاكرێ و دەوروبەرێن هەولێر و گەلەك جهێن دی.

داهاتێ هەرێما كوردستانێ ل گورەی راپورت و داخویانیێن سالانە ژ سالا2015 تاكو دگەهیتن سالا2019 ل دویڤ داخویانی و رونڤەكرنێن حكومەتێ و پەرلەمانتاریێن هەرێما كوردستانێ، ئەگەر داهاتێ گشتی بدەستەكێ پاقژ و بڤەرێژەكا مروڤاتی بهێتن كوم كرن، سالانە داهات دێ گەهیتن كوژمێ(22)بیست و دوو ملیار دولارێ ئەمریكی، ل گورەی لێدوان و داخویانیێن پەرلەمانتەرێن بەهدینان و جڤاتا پارێزگەها دهوكێ، داهاتێ دهوكێ یان بەهدینان دبیتن سێكا  چارێ، یانی كوژمێ(15)پازدە ملیار  دولارێ ئەمریكی، ژ داهاتێ گشتیێ هەرێمێ كودبیتن(22)بیست و دوو ملیار دولارێ ئەمریكی، كەواتە داهاتێ دەڤەرا بەهدینان دكەتن كوژمێ سێ هەمبەری ئێكێ...كەواتە بەهدینان زەنگین ترینێ دەڤەرێن كوردستانێ یە و دبیتن زەنگینترینێ هەرێمێن جیهانێ بیتن...ئەڤەژی خالەكا دیە یا باشیا بەهدینان و لەومانێ دبێژم یێ حوكمی ل بەهدینان بكەتن، حاكمێ كوردستانێیە و یێ حوكمێ كوردستانێ بكەتن حاكمێ هەمی جیهانێیە.

دبیتن هندەك بێژن ئەڤ ژمارەیە دراست نینن یان ژی جهێ گومانێنە، راستە رەنگە بنێزیكاتی هاتبنە داناندن، لێ ئەم دكارین پێوەرەكێ دی بینینە مەیدانێ، دسەروكانیێن فەرمی دا هاتیە راگەهاندن، ل هەرێمی زێدەی(50)پێنجی هزار ملیونێر و زێدەی(30)سیه ملیاردێر ل هەرێما كوردستانێ هەنە و گەلەك كومپانیێن وەهمی و قاچاغ و مشەخور و تەمبەل هەنە و داهاتێ  هندەكان ژوان زێدەی(50)پێنجی ملیار دولارێ ئەمریكیە و بەلكی داهاتێ هندەكان دگەهیتن(100) سەد ملیار دولارێ ئەمریكی، ئەرێ گەلا ئەڤ زەنگینە ژ كیڤە هاتینە و چاوان ئەڤ رەسیدێ زەبلاح كوم ڤەكریە، پسیار ئەوە ئەرێ ئەڤ پارەیە ئەگەر ژ داهاتێ گشتی نەبیتن پا ئەڤ پارەیە ژ كیڤە هاتیە!!

بلا ئەم وێ ژی لبیرا خو بینین، ل دەمێ كونفرانسێ سالانەیێ شەفاییا جیهانی ل سللا2017 ل هەولێرێ هاتیە گرێدان، وەسان داخویانی هاتە دانێ و دا دیار كرن، ژ سالا 2003 تاكو  2017 ئێك ترلیون پارێ عێراقێ هاتیە دزین،(700)حەفت سەد ملیار دولارێ ئەمریكی بەرپرسیارێن بەغدایێ دزینە و(300)ملیار هەشت بەرپرسێن كوردی دزینە، هەردیسانێ هاتە دیار كرن دناڤبەرا ڤان سالان دا، ئەگەر دابەشكرنەكا مروڤاتی هاتبایە كرن، هەر تاكەكێ عێراقی دڤیا رەسیدێ وی یێ بانكی ببایە (23)بیست و سێ ملیون دولارێ ئەمریكی، كەواتە هەر تاكەكێ عێراقی بیست و سێ ملیون دولارێ وی  یێ ئەمریكی هاتیە دزین...هەوە هەمیان گوهلێ بویە، ل دەمێ حەفتیەكێ گازا بوریا (زاخو – سلوپی) راوەستیایی، بو قیرەقیرا وەزیرێ سامانێن سروشتی و گووت هەر روژێ ئەم(37)سیهوحەفت ملیون دولارێ ئەمریكی زیانێ دبینین.

4- خەباتا سیاسی بلا ژناڤا چاردیواران دەربكەڤیتن و بەهدینان ب بیتن واحەیەكا دیموكراسی:-

خەباتا سیاسی ل سەر پێگەهەكێ فكرا نەتەوەیی و حزبی و جەماوەری...نەخاسم ژبو رزگاریا گەلان و داناندنا ستاویەكێ حكومی و دەولتداری هاتیە توخ كرن د دەستپێكا سەدێ بیستێ دا، نەخاسم دناڤبەرا شەرێ جیهانیێ ئێك و دووێ دا، كوردستان ژی وەكی پارچەیەكا دانەبری ژ روژهەلاتا ناڤین و دونیا خەباتا سیاسی و بنەخاسمەیی ترێ ل باشور، ل سالێن بیستان و بسەردا ژ سەدێ بیستێ دەست بخەباتا خویا سیاسی و رێكخراوەیی كرن، راستە دەڤەرا بەهدینان و نەخاسم ل دوماهیك سالێن دەستهەلاتا ئیمپراتوریەتا ئوسمانلی، نەهەر هاتبویە پشت گوه هاڤێتن، بەلكی دشەرەنیخ و دناڤا لێكدانێت لەشكەری دا هاتبویە وێران كرن و سەروسیمێ باژرڤانیێ لڤێ دەڤەرێ هاتبویە ژێبرن و چ نەكرن، هەژاری و نەداری ببوسیمایەكێ زیق و شەقەكا نەعلەتی، نەهەر ئاستێ زانین و مەعیشەتی هاتبویە خارێ، بەلكی ئاستێ جڤاكی و دەرونی و روخسارێ بەشەری گەلەك دابەزیبو خارێ و شورببو كەڤتبو ناڤا ئەردی، رەوشا دەست و دارێ ریڤەبەری ژی توخ ببو بو رەوشا عەشائیرییا دەمارگیری، ئەوا جهێ مخابنیێ ژی، عەشائیرێن كوردستانێ و نەخاسم ل بەهدینان دخرابترینێ دوخێ خوەدا دەرباز دبوون، بنەكوك و بنەسترێ كوردەواری و وارڤینی بتەمامی ژناڤ هاتبویە هەلاندن، ل گورەی داگیركاری و ژبونا راوروت كرنا خەلكێ كوردستانێ سستەمێ عەشائیری هاتبویە دیزاین كرن، مەرەم و مەقسەد بتنێ ئەو بوینە خەرج و خەراجان بو دەولەتێ وەربگرن و مللەتی رویس و برسی بكەن، هەمی زاخا مروڤایەتی و گەل پەرستی و نیشتیمان پەروەری بتەمامی ژێ هاتبونە دادوتن و خالی كرن، گەلەكێ بێ سەروەر و نیشتیمانەكێ چولەوار ل پاش خودا هێلابو، هەیی و نەییێ وان بزاڤ و راكرن بو، بتنێ بو پاریەكێ نانی و تێر كرنا زكەكێ برسی، داهات و پەرەپێدان و رەسەنی نەمابون و هاتبونە چ نەكرن.
ل دەمەكی ئنگلیز هاتیە دەڤەرێ و پویرەیێ ئوسمانلیان ل سەر سەركەڤتیان دهاتە لیًكڤەكرن، ل دەڤ هندەكا بتنێ دین یێ چویی بو، بو ئیمپراتوریەتێ نور نورا گری بو! بو هندەكان ژی ئنگلیز و هەڤپەیمانی دەیك و باب بون و بوێ هزرێ بون ئنگلیز و هەڤپەیمانی دێ بەهشتەكێ بو دەنە ئاڤاكرن، ئەوا راستی بیتن ل سالا1916ز مەسترین دەلیڤا دەولەتداریێ بو گەلێ كورد هاتە رەخساندن، ل وی دەمی نەتورك، نەعەرب، نەفارس دحالێ دا نەبون، لێ ئەگەر دەنگەكێ كوردی ل ڤێرە و ل درا هەنێ بلند ب بیتن ژی، تێرا هندێ نەدكرن دەولەتا خو دروست بكەن، دیسان ل سالا1917ز دیسان دەرفەتەكا دی دا كورد و ئەرمەنان و گازیا وان هاتە كرن، هەرئێك ژ ڤان گەلان دكاریتن دەولەتا خو بتەنا سەرێ خوە دروست بكەتن یان ژی دەولەتەكا هەڤپشك و بهەڤرایی بو خو دروست بكەن، لێ مخابن دیسان ئەڤ هەلە ژی نەهاتە وەرگرت و هاتە هندا كرن...ئەو بو ل سالێن1923 و بسەردا گەلێ عەرەبی شیا دەولەتێن خوە دروست بكەتن و بونە خودانێ(17)هەڤدە دەولەتان، گەلێ توركیا دیسان دەولەتا خویا توركچی ل ئەنادولێ راگەهاند و ل ئیرانێ ژی دەولەتا فارسی هاتە دروست كرن، گەلێ ئەرمەن هاتە ئیبادە كرن، گەلێ كورد ژی بو پر و پەیسك و تورك و فارس و عەرەبان دەولەتا خو ل سەر پشتا وانان دا ئاڤاكرن و ئەو بخو ژ مافێ دەولەتداریێ هاتنە مەحروم كرن...دكەش و هەوایەكێ نەگونجایی و برێك و رێبارێن نەتەندروست و دویر بنەمایكێن زانستی و بدەست و تبل و شیرەتێن ڤی داگیركەری و داگیركەرێ دی...هندەك حزب و كومەلە و رێكخراوێن سیاسی ل كوردستانێ هاتنە دروست كرن، وەكی كورد تەعلی و تەرەقی، خوییبوون، كومەلا دار كەر، هیوا، شورەش، لیژنا ئازادی، تاكو راگەهاندنا كومارا مهاباتێ ئەو بو ل گورەی ریتمێ حزبا دیموكراتا رۆژهەلات( ل ئیرانێ)، ل عێراقێ ژی ل سالا1946 پارتی دیموكراتی كورد و پاشی بو پارتی دیموكراسی كوردستان هاتە دامەزراندن، لێ ئەو رەوشا خرابا عەشائیری و دەستێوەردانێن بنەزانین و نەخومالی...سەرەرایی كومكرن و رێكخستنا خەلكەكێ زور، لێ بنەكوكێن رێكخستنەكا جەماوەری و ل گورە زانست و پرەنسپەكێ ژیاری و خومالی رێكخستن نەهاتە كرن، بویە دەردێ نیفاق و ئێشا ژێكچون و هندا كرنێ بەربو گیانێ وان، بونە دوو بال، بالێ عەشائیری و لەشكەری بسەروكاتیا مەلا مستەفایی و بالێ روشنفكری و مەكتەب سیاسی ب سەروكاتیا ئیبراهیم ئەحمەد و پشكا زورا مەكتەبسیاسی و كادرێن سیاسی و پیشەیی...د ئەگەرا ڤێ نیفاق و بێ تفاقیا بویی بالەكی خودا دگەل ئیرانێ و بالەكی ژی خودا دگەل رژێما عێراقی و پاشی تەسلیم بوون...د سەر وێ شورەشا مەزنا ئەیلولێ دا، ئەگەر شور بیتن...لێ دەرئەنجام بو ئەو ل سالا1975 و رێك دپەیمانا جەزائیرێ دا، ئیتفاق ل ناڤبەرا سەدام و مەحەمەد رەزاپەهلەوی دا هاتە كرن، بناڤ دەستكاتیا هەواری بومیدینەن سەوكێ وی دەمی یێ جەزائیرێ و ئەو بو عێراقێ داگەریان بو ئیرنێ كرن، ل سەر هندەك ژ ئاخا خوە و ئیرانێ ژی هەمبەری وێ دەست ژ پشتەڤانیا كوردان بەردا.
بڤی رەنگی شورەشا كوردی شكەستنەكا دی تومار كر و ب سەدان هزار خەلكێ كوردستانێ ئاوارەی ئیرانێ بون، بسەدان هزار پێشمەرگە و چەكدارێ كوردی دیسان چەكێ خوە رادەستی رژێما عێراقێ كرن و شورەشا كوردی بو ئاش بەتالی.
5- سەردەمێ پاش شكەستنێ و قوناغەكا دیا خەباتێ:
شكەستنا سالا1975 كارەساتەك و مالوێرانیەكا دی بو،  بو كوردان و بو خەلكێ كوردستانێ، كورد وەكی ئاخ و وەكی نەتەوە و مروڤ ژبلی كەڤناری و بها و مەغازایەكێ مەزنێ دێروكی و شوینەواری و هزری و دینداری هەیە، خودان شارستانیەت و خودان راستیەكا دینی و ئەرزشی و مروڤاتیی زور بهادار و گەوهەرییە، لێ ل پاش بسەرداگرتنا ئەسەكندەرێ مەقدونی و بنەخاسمەیی ترێ لپاش ڤەكرن و ئەنفالێن جزیرەیا عەرەبی و بەلاڤ بونا هزرا بیابانێ هشك و زەها ژ بیر و هزر و كەدوارێ مروڤایەتی، نەهەر ئاخا كوردان هاتیە داگیر كرن، بەلكی دین و نەتەوە و روبیشتەیا كوردان ژی هاتیە دەستەسەركرن و شێواندن، ئەڤ داگیركاریا بكولاتیا 1400سالان، ئاخاوەلاتی پارچە پارچە كر، نەژاد هەلشكافت و ئالزین و شێل و بێلی دروبیشتەیا كوردان دا دروست كرن، تاكو گەهشتیە وی رادەی ئیسلاما عەرەبی(17) دەولەت و پاشی(22)دەولەتێن عەرەبی دروست كرین، ئیسلاما توركی ل سەر ئاخەكا داگیر كری دەولەتا تورك بینا كری، ئیسلاما فارسی دەولەتا ئیرانێ دروست كری، لێ رەبەنێن كورد ژی ژار و پەریشان و بخولیسەری بوینە هەسپێ تروادەیی ، بو ڤان سێ نەتەوەیەێن داگیر كەر و زالم...بویە زولم ل سەر مە بدوماهیك ناهێتن ئیلا یەكێتی و ستاتویەكێ كوردی و كوردستانی و بدل و دەرونەكا هزری و زەلال ل سەر ئاخا میزوبوتامیان ئاڤەدانی بكەیین...ئەگەرێن داگیركاریێن دێروكی ل سەر كوردان گەلەكن، گرنگترینێ وان نەبونا ئیتفاقێ، نەبونا هزرەكا زولالا خومالی، هندا كرنا زاخا رەگەزی، تێكەلی بونا روبیشتەیەكا زەغل و فاسد، ئاخەكا بەرفرهە و ب پیت و بەرەكەت و تژی سامانێن سروستی، سنورەكێ بەرفرهە و نەپاوان كری، دابرینا كوردان ژ دەربازگەهێن دەریایی، ڤەقەتاندنا سەروسیماێن شارستانیەتێ، قوتبری كرن و هەرماندنا دین و دیانەتا كوردان، ڤەگەڤزاندن و قەتلازیا كنیاتێ ئابورەكێ بهێز و خومالی، شەلاندنا كوردان ژ چەك و فابریقەیێن چەكی و گەلەك ئەگەریێن دی....!
لێ سەبارەت ئەگەرێن شكەستنا شورەشا ئەیلولێ، بمن وەرە دناڤا ڤان خالان دا دهێنە كوم كرن:
ا- پارتی دیموكراتی كوردستان دناڤا ستاتویەكێ كوردی و كوردستانی دا خوستارە نەكر و لادان هاتنە دروست كرن، هەردیسان مایتێكرن و تەحسین ژی هاتنە سەپاندنێ و نەخاسم ژلایێ دوژمنێن ئەقلیمی ڤە و بنەخاسمەیی ترێ مایتێكرنا دەولەت و شاهێ ئیرانێ، كو بابەكێ فاسد و فاسق بویە بو كوردان.
ب- رێباز و رێڤەچونا شورەشێ ل سەرخێمەێن عەشائیری و دەمارگیری و هشك باوەریێ هاتنە خوجهكرن و برێداچونێن شاش و شەخصەنەكری بونە سەرمەشق و سەركێش و بویە دكتتاتوریەتا تەك بنەمالیێ بو سەمیانەكێ نەئاقلدار و كەڤنە شوپی.
ج- چین و سەركێشیا حەكیم و روشمبیر و شاسواریا سەركێشی هاتبو تەپەسەر كرن و ژناڤ برن و بێ باندور كرن، ئەقداریا چیایی و شڤانیا رێلی ب بوسەمیانەكێ بێ گوه و بێ باوەر، دهشك باوەری و كەڤنە شوپیا خوەدا كەمارەكا كەڤناری و كەڤنە شوپی وەكی سەوداسەرەكێ نەلمنێ و نەلتەیێ..بێ ئاگاهاهیەكا مستی سەركێشیەكا كاروانیەكێ تەرابەرا كر ی،  شكەستن وەكی هێڤێن قەبیل كرن.
د- ژبلی ئەوا دگوتنێ شورەش، لەشكەرەكێ مەزنێ چەكادار ل خوە كوم كربویە، شیان و ئابورەكێ باش ژی كربویە زەخیرە، زەخیرەیێ بیر و باوەران ژی برەنگەكی ژ رەنگان یێ كێم نەبو، لێ سەركێشیا ئویتەیی و خرش و كەڤنە هشكیێ دەرفەتێن وەرگرتنا هەل و فورسەتان ژ دەستدان و ئێدی شورەش بمەخزایێ خوەیێ ئەسلی و بژارتەیی نەما و هەرفین بو جهگرێ شورەشێ و ئاش بەتلی كرن.
ه – بونا پاراستنا ئاخ و گەلێ بەهدینان زور گرنگە هێلا(حەمرین – چیایێ شنگال) بهێتن پاراستن، ژ بەركو( وانە(ناحیا وانكێ) دلێ ڤێ هێلا بەرگریێ یە، بویە یێ وانك ددەستێ وی دابیتن هەم دێ ڤێ هێلێ پارێزیتن و هەم ژی دێ میسل پارێزیتن,
گەلەك ئەگەر و خیًمەیێن دی یێن شكەستنێ هەبوینە، لێ بمن وەرە ئەگەرێن ناڤەكی و توخمە جینی بتنیً دناڤا ڤان چار خالان دا دهێنە كوم ڤەكرن و پاوان كرن و ناخازیتن ئەگەرێن دی یێن لاوەكی بەحسێ ل سەر بكەین.
پشتی ل سالا1964 – 1966ز، دەستەیا(م.س) هاتیە رویت كرن و ئاوارە كرن، ئەوێن مایی ژی دناڤا دەستسەریەكا هزری و دەرونی دا ژیان دكر، بویە خوسەریا خوە برەنگەكی ژ رەنگان ژ دەست دابویە، لێ كادر و كەسایەتیێن خودان باندورێ خوەیێ بجەسارەت ژی هەرمابوینە و دبەرخوەدانەكا هزری و جەستەیی و دەرونی دا ڤەژەنا خوە پێشدا دبر و مژویلی خەباتكا بێ وچان بوینە، ژ بلی حزبا شویعی كو وانان بمخابنی ورەوشیانێن خوە ،  نەهەر وندا كربوینە، بەلكی واقعێ تەسلیمبون و خوبدەستدانێ قەبول كربویە، ژ بەر وێ ئەم بەحسا وانان ناكەین(دگەل رێزەكا مەزن بو وان ئەندام و كەسانێن خو ژ دەست نەدایین)، لێ هەر ل بەریا شكەستنا كارەساتا جەزائیرێ، بزاڤ و رێڤەچونێن سیاسی و حزبی و بازنەیێن روشمبیری دبزڤین و خوساخكرنەكا بێ هەمبەری دا خەبات و تێكوشانا خوە دمەشاند، بازنەیێن ستێركا سور دبزڤینەكا مەزن دا خەبات دكرن، لێ پاشی بونە پارچەیەك ژ كومەلێ و دیسان حزبا سوشیالست و تێكوشانا رەنجبەران ژی بزاڤێن وان دهاتنە مەیزاندن، پاسوك و ئالایی شورەش و زەحمەتكێشان ژی بزاڤ و چالاكیێن وان برەنگەكی ژ رەنگان دهاتن دیتن، لێ ل دەمەكی و نەخاسم ل پاش سالا1975ز، یەكێتی نیشتیمانی كوردستان وەكی پارتیەكا خودان هێز و سەربور خودا مەیدانا شورەشێ...ئەگەر سەهو نەبم ئێكەمین كومجڤینا وان ل شامێ بویە، ئەڤ بەرێزە تێدا دئامادەبون(( مام جەلال، ناوشێروان مستەفا، عادل موراد، فوئاد مەعسوم، شیخ موس، عبدالرزاق فەیلی...))، وەكی رەحمەتی (عادل مورادی) بو مە ڤەگێرایی، ئەڤ خرڤەبونە ل سەر داخازیا مام جەلال بویە، پشتی خرڤەبوین مەرەما كومبونێ هاتیە روهونڤەكرن، مام جەلال هزرا داناندنا حزبەكا سیاسی دایە بەرچاڤێن وانان، داخازا پێشنیارا ناڤێ ڤێ رێكخستنا سیاسی هاتیە كرن ژ لایێ مام جەلالی...كاك عادل موراد دبێژیتن من ئێكەمین پێشنیار دایە كومبونێ، ئەم ناڤ لێبكەین(بەرەی گەل، الجبهە الشعبیە)، لێ گوت كاك نەوشێروان ئێكسەر نەرازیبون دا دیار كرن و گوت، بڤی ناڤی هێشتا ئەم ژ دایك نەبوین دێ كەڤینە بن رەخنەیەكا هەرفتی و دێ بێ ناڤ بین، چونكی ئەڤە حزبا(نائیف حەواتمێیە)، گوت ئەوی پێشنیار كر، ناڤی بكەین، یەكێتی نیشتیمانی كوردستان(ینك)، دیسان رەش نڤێسەك ژی وەكی بەرنامە ژ پاخلا خو دەرئینا و دا دەستێ مام جەلالی...ئەو بو ئەڤ ناڤەیە هاتە پەسند كرن.
6- یەكێتی نیشتیمانی كوردستان دناڤبەرا شكەستن و سەركەڤتنان دا، نویخازی و بنەما پێویستە:
دبیتن بو من نەبیتن بەحسا (ینك) بكەم، چ وەك دێروك و چ وەك فكرە، چونكی نەدامەزرێنەری وێمە و نەژی خەباتكەرێ وان بویمە، لێ وەك كوردەك و وەكی ئاگەهدارەك و وەكی روشنفكرەك(ئەگەر نەیی سەهوبم)، دبیتن من دەلیڤە هەبیتن ئاگەهداریا خو بینم زمان، مام جەلال و خەباتگێر و تێكوشەرێن ڤێ حزبێ، كەڤتنە ناڤا بزاڤ و لێگەرهانان و سەرهەلبون كومڤەكرن، خەبات و بەرخوەدان كرن، ل بەغدایێ، ل تەهرانێ، ل ئەوروپا و ئەمریكا، ل ئەنقەرە و ل شامێ، بو سلێمانیێ، كەركوكێ، خانەقین، هەولێرێ، دهوكێ...لێ دەرگەه و رێكا پێكگەهشتنێ بتنێ بو بەهدینان، تێكوشەر(ئیبراهیم عەزو) دەردێ وی ل بەهدینان بو، دكتور خالد، عەلی عەسكەری، حوسێن بابە شێخ...مەرەم و تێگەهشتنا وان ل بەهدینان شوپا خەباتا وان دەست پێ دكر، كارەساتا هەكاری، كومكوژیا دەرپوش كری ل بانەهیا بەهدینان هاتیە برێڤەچون و قەتلازی كرن، باش ل بیرا منە ئەز قوتابی بوم ل پولا پێنجێ سەرەتایی، دگوتن مەلایی چوون و ئەڤە جەلالی هاتن، بەلێ ئێكەمین مەفرەزەیا رێكخستی دوارێ هزروبیر و چەكێ شورەشێ دا، ئەو بو دگوتن عەلی عەسكەری(سەركردێ خوشەویست ل دەڤ خەلكێ بەهدینان..) هاتیە و دێ شورەشەكا نوی كەتن و دگوتن ئەڤە كوردە و كورێ كوردستانێ یە و بتنێ دێ ئەو كوردینیێ كەتن، دەنگێ وی دەنگڤەدانا هاتنا وی دگەل دكتور خالد و حوسێن بابەشیخی...ببو چیروكا هەمی مالان، بەحس و حیكایەتێن وان و دلوڤانی و شارەزاییا وان وەكی راستیەكێ بتابلویەكێ وەهمی هاتبویە هەلاویستن ل سەر دەرازینكا هەر مالەكێ..ئەو ژی راستە ئێكەمین هاتنا وان بو دەڤەرا بەهدینان شاشتی دروست بو، نەناس كرن هەبو! پلان و دوژمنكاری ژی هەبو، یا ژ هەمیان نەخوشترێ ل دەمێ كوشتنا وان... ناڤ و ناڤلێكرنێن خراب و نەژ هەژی پێرا ڤەهاندن، نەخاسم ل دەمێ ژ نشكەكێ مە گوهلێ بوی (مەلا ماتور) خوتەسلیم كر و بو جاش، ئەڤە بو وی دەمی هەم دەربەیەكێ خراب بو، هەم ژی شاشیەكا كەشەفرێت بو...!!
مە گوت ئەم بەحسا دێروك و خرەپشانێن(ینك) ناكەین و نەكارێ مەیە، لێ ئەم دكارین بێژین پشكا هەری زورا بەهدینان و بنەخاسمەیی چینا تێگەهشتی و روشنفكر خودابویە دگەل(ینك) ببون بالێ جەلالی، ئەو ژی راستە(ینك) بدرێژاهیا دێروكا خوە ل بەهدینان توشی زولم و كوشتن و چ نەكرنێ ب بوون،  گەلەك زەخمەتی و دەردێن مەزن دیتن...لێ ئەو ژی یاراستە(ینك) هەر ل كەڤن و تاكو نوكەژی ل هەر باژێرەكی، ل هەرگوندەكی، ل هەرتاخەكی، ل هەرمالەكێ دا ، ل بەهدینان هەیە، ئەگەر وەكی ئەندامبون ژی نەبیتن وەكی فكر و رامان هەریا ئامادەیە، لێ دەردێن وان ژی بەردەوام هەبوینە، دەردێ وان یێ هەری مەزن، دەردێ بێ سەریێ بو، دەردێ پێشەنگیێ بو...بتنێ ئەو دەم نەبیتن یێ هەڤال(حسن كویستانی) بەرپرسێ حزبی ل بەهدینان، كاك(رێباز) بەرپرسیارێ عەسكەری ل بەهدینان، (سەرچل قەزاز) بەرپرسێ پەیوەندیێن(ینك)بو ل توركیا...ئەز دكارم بێژم ل ڤی دەمی باشترین خودانی ل(ینك)هەبویە، باشترین تاقیكرن ژی بو(ینك)دیسان ئەڤ سەردەمە بویە...!
نوكە ژی ئەم ل سەردەمەكی دژین، خەریكە باش و خرابی بشەفای دیار و بەرچاڤن، ل بەهدینان شاشیێن مەزن هەنە، ب سەرداگرتنا هەمی ئالیی هەیە، گەندەلی هەیە، جاسوسیەت هەیە، دەستێوەردانا بیانی هەیە، دەستهەلاتا داگیركەری هەیە، خوسەپاندن هەیە، ترسنوكی و خاڤی هەیە، گەل بێ مورالە، ئوپوزیسیون نەمایە و زور لاواز و بێ هێزە، تەنها هێز، تەنها ركابەری، تەنها باوەری...هەمی چاڤ و هەمی هزر چاڤەرێی(ینك) دكەن، ل بەهدینان( مام جەلال ) یێ ساخە، كاك(نەوشێروان) جودا نەبویە، هاوپەیمانی چاڤەرێی سەروبەر كرنا ناڤ مالا(ینك) دكەتن، گازیەك هەیە و بانگینا خوە بلند دكەتن و دبێژیتن، ها سەروك كومار(دكتور بەرهەم سالح) ، مالباتا تالەبانی، فوئاد مەعسوم، كاك كوسرەت، (م.س)، سەركرد و كاربەستێن ڤێ حزبێ...شەهیدێن رێكا ئازادیێ، پێشمەرگێن كولنەدەر، كەس و كارێن شەهید و ئەنفالبوی و خەلكێ گرتی و بەرزە و خەباتگێرێن دلسوز و دلوڤان...وەرن لێك كوم ببن، جەندەكێ ئێكەتیا خو لێ خودان دەركەڤن و برینێن وێ دەرمان بكەن، خودانیێ ل بەهدینان بكەن، مافێ خەلكێ بەهدینان بدروستی بدەنێ...نابیتن مافێن خەلكێ بەهدینان گرێدایی دەنگێن وان بكەن، ئەرێ ما هوین زولم و چونەكرنا بەهدینان و بنەخاسمەیی ل سەر حزبا خو نابینن، ئەرێ ما هوین ڤێ تەزویرا زەبلاح نابینن، ئەرێ ما هوین ڤان رەشوە و بەرتیل و ئیمتیازاتێن مەزن دژی خوە نابینن...هوین بزان و هوین پشت راستی ژی بن، هوین بێ بەهدینان نابنە سەروك و بەرپرسیارێن باشور، ئەگەر هوین هندەك بەرپرسیاری و سەروكاتیان ژی وەربگرن، هوین بتنێ رەمزن و بتنێ هندەك ئیمتیازێن مادی و كێم دێ وەرگرن..ئەما وەكی گەوهەر و وەكی راستی، بێ بەهدینان سەروكاتی نابە ل باشور و ل كوردستانێ و هەركەسێ بەهدینان وەربگریتن، كوردستان یاویە و دبیتن ژی سەروكاتیا جیهانی ژی دیسان هەر یا وی بیتن...!!
7- گرنگی و بردنا (وەرگرتنا) بەهدینان دناڤا ڤان خالان دا دهێتن دیتن:
ا. شوینوارێن بەهدینان وەكی هەلكەڤت و وەكی سنور بدروستاهی بهێنە دیار كرن و فەهم كرن، گرنگی بكەڤنار و شوینەوارێن وانان بهێتن دانێ، نەبتنێ دئالیێ شوینواری بتنێ دا، بەلكی وەكی شوناس و وەكی زمان و وەكی ئول و روبیشتە بتەمی بهێنە فەهم كرن، خەمەكا باش ژی بهێتن خارن ژ فلكولور و كەلتوری و تێگەهێ هەمی ئالیێ بەهدینان چ وەك ئەخلاق یان ژی وەكی وژدان و ئالیێن دی.
ب. ب ئالیێ كێم یافەرە(ینك) مەلبەندەكێ سەركردایەتیێ ل بەهدینان ئاڤا بكەتن و كەسانێن پسپور و خودان باندور ژ خەلكێ بەهدینان بخو لێ بهێنە دامەزراندن، هەردیسانێ گرنگە(7 تا 8) مەلبەندێن حزبی یێن (ینك) ب پشتەڤانیا دارایی و مەعنەوی بهێنە دامەزراندن و پشتەڤانی كرن، نەخاسم بڤی رەنگی( مەلبەندێ دهوك، مەلبەندێ زانكویی، مەلبەندێ ئامێدی، مەلبەندێ زاخو، مەلبەندێ شەنگال، مەلبەندێ دەشتا نەیناوا، مەلبەندێ ئاكرێ، مەلبەندێ پیشەكار و زانستڤانیی...)، هەردیسان یا فەرە هەرئێك ژ سەركومار، سكرتێرێ گشتی، سەروكا پەرلەمانی، هەرئێك ژ جێگرێ سەروكێ هەرێم و جڤاتا وەزیران نڤێسینگەه و نوێنە و شیرەتكارێن خوە ل بەهدینان هەبن...یا ژ هەمیان گرنگترێ ڤەكرنا (ئەكادیمیا دیراسات و ستراتیژیەتا كوردستان ) بناڤێ( مام جەلال) ل بەهدینان بهێتن ڤەكرن، تشتێ دی كو فەرە بهێتن كرن، یەكێتی وەكی حزب نابیتن بیر و خەباتێ بكەتن، بەلی سەردەریا(ینك) دڤێتن سەروكانیا خوە وەربگریتن، ژ هزرا چاك و گوتن و كریارێن چاك، واتە(ینك) كێشەیا نیشتیمانی دانیتن پێشیێ، پاشی كێشەیا مروڤاتی و نەتەوەیی و دینی و مەزهەبی...پاشی خزبایەتیێ بكەتن، چونكی مام جەلال نەهەر مللكێ(ینك)بویە،  بەلكی مللكێ هەمی كوردستانیان بویە.
ج. ینك دڤێتن گرنگیەكا مەزن و هەمی ئالی بدەتن پارێزگها نەیناوا و نەخاسم شەنگال و دەشتا نەیناوا، بنەخاسمەیی ترێ رەوشا پێكهاتیەیان وەكی پێكهاتییەكێ روحی و ژیانی لێ تەماشا بكەتن و خودانیێ لێ بكەتن.
د. ژمارا خەلكێ مەیێ كورد ل سوریی و لوبنانێ زێدەی(7)حەفت ملیون كەسایە، دیسان هەژمارا خەلكێ مە لباكوری دسەر(25)بیست و پێن ملیون كەسان دایە، ژبلی وێ ئەڤ  دوو هەرێمە هەم بو مە دەرگەهن، هەم ژی كویراتیا ستراتیژیە ژ هەمی ئالیەكی بو باشوری، لەومانێ یافەرە گرنگیەكا ژیاری و پێكڤەیێ و كارەكێ سرت و بلەز ژی تێدا بهێتن كرن، نوینەرایەتیێن زیرەك و پسپوری ژی لێ بهێنە دامەزراندن، ئەڤە دێ بیتن رەوتەكێ پێشدا چونا(ینك) نەبتنێ ژ ئابیێ جەماوەری و حزبی، بەلكی ژ ئالیێ ئابوری، دبلوماسی، لەشكەری، زانستی..بهەمی ئالیڤە، چونكی خەلكێ مە لباكور و روژئاڤا دەولەتەكە دناڤا دەولەتەكا دی دا، بو راكرن و ئاڤاكرنا ژێرخانا باشوری، ئەم پێویستی پسپوریا وانین نەخاسم درویێ كشتوكالی، مەرداری و ئاژەلداری، كەشتیاری و هاڤینە هەواری، پیشەیی و پیشەسازی....هتد.

گوتنەكا فەر:
دبیتن وەسان هزر بهێتن كرن ئەڤ بابەتە خاندنەكا حەزییە بەریا خاندنەكا زانستی بیتن، براستی ژی دبیتن راست بیتن، لێ حەزكرن شەهیێ ڤەدكەتن و پالدانێ دروست دكەتن، مروڤی  بەرەڤ ئارمانجێ  پالددەتن تاكو بچیتن بو ئارمانجێ ، یاراستترێ ژی رەوشا كوردستانێ و هەرێما باشور ب نەخاسمەییترێ، هەرێما بەهدینان دلوڤانی و خاستەكا مجدا خاندنەكا بحەزژێكرن بو دڤێتن، چونكی ژ بلی سەروسیمایێ بەهدینان دهێتن شێواندن، ب بەردەوامی دەلیڤە لێ دهێنە هنداكرن، داگیركاری لێ بەردەوامە، عەرەب كرن و توركچیاتی روژ بو روژێ لێ مشە و بەرفرهە دبیتن، كێشەیێن مروڤی و نەتەوەیی و دینی و هزری خەریكە برەنگەكێ تژی مەترسی بكەڤنە دەورانەكا تەهلیكەكری، پرسا وژدان و ئەخلاقی دهێتنە سەختە كرن، ئەڤ ئابورێ مەزن، سەروسامانێ مروڤی بهەروەیی دهێتن هندا كرن و بهروەیی بهەدەردان دچیتن، خەریكە تەڤلی هەڤیەكا مەزن و تژی ئالی و ئەنترنەڤی دروست ب بیتن، كێشەیا چین و تەخ و ئالیان جەوسەسە و پرتی بەلاڤ بوینە...كورت و كرمانج بەهدینان خودانی دڤێتن و چاڤدێری دڤێتن، خودانەكێ ئەمین و دلوڤان... بەریا كو كێشەیا وێ زانستی بیتن، وژدان و ئەخلاك و مروڤاتی بو پێویستە تاكو نیشتیمان پاراستی بیتن و گەل پەروەر بیتن، خودانی پێ لازمە.
سەبارەت(ینك) چ وەكی دەربرین، چ ژی وەكی ناڤ و ناڤەروك و برێدا چوون، ئەز بەحسا(ینك)بگشتی ناكەم، بەلكی بەحسا یەنەكا بەهدینان دكەم، سەرباری وان رەخنە و بێ دەنگی و كێم و كاسێن هەیی(بەحسا وێ  ژی ناكەم)، بەلكی رەوشا وێ دشوپینم، ینك ژبلی سالا1991-1992 زێدەی وێ دەستهەلات و بەرپرسیار نەبویە ل بەهدینان، بەلكی بەهدینان هەر وەك سەردەمێ حزبا قائید و بائید، سەروكێ قوماندار و حزبا قائیدە، بەلكی دزور دەلیڤ و سەردەمان ژی دا تەهلوكەتر و خرابترێیە، ژ بەر وێ ل بەهدانان سەهما یەك سەروك و یەك حزب خانەیەكا جهگرتی وەرگرتیە و بویە هەلامەت...ینك ژی یان ئوپوزیسیونە یان ژی مالباتا ئوپوزیسیونێیە، جار كوشتینە و جاران ژی دگرتینە، جار قاچاغن و جاران ژی دبرسینە، درەوشەكا دەرونی و هزری و پەلەراوكێ دا دژین، دتەپەسەرن و د دەربەدەرن و باشترین سەروسیمایێ وان، باشترین رەوش و فورسەتێن وان ئەون بێ دەنگ بن، خو تێنەگەهینن، چونكی دبەرهنگاری و بزاڤێن ئوپوزیسیون بونا وان دا، رەوشا وان ژ هەمی ئالیەكی كێمترێ نابیتن ژ رەوشا ئوپوزیسیونەكا بێ پشت و بێ پەناگەه، لەومان دبیتن بێ دەنگی و چاڤەرێ كرنا وان باشترین دەرمان بیتن بو دەردێ وان.

سەید ئەكرم






ads

زۆرترین خوێندراوە

  • ڕۆژ
  • هەفتە
  • مانگ
ads
ads

ads
ads
Developed by Avesta Group and powered by Microsoft Azure

Copyright © 2015 Shar Press. all rights reserved