گفتوگۆ نهێنییەکانى هەرێم و بەغدا لەسەر بودجەى ٢٠٢٠ بەردەوامە

sharpress.net

353 جار خوێندراوه‌ته‌وه

11/09/2019‌

شارپرێس:
نوێنەری حكومەتی هەرێمی كوردستان لە بەغدا رایگەیاند، گفتوگۆكانی نێوان هەرێمی كوردستان و بەغدا لە ڕێگەی چەند تیمێكی تایبەتمەندەوە بەردەوامن و هەنگاوی باشیان ناوە و پێشوەچوون و لێكتێگەیشتنی زۆر باش لە گفتوگۆكاندا هەیە.

فارس عیسا، نوێنەرى حکومەتى هەرێم لە بەغدا ڕاگەیاند: "چەند تیمێكی تایبەتمەند لە هەرێمی كوردستان دروست كراون و لەبارەی هەموو دۆسیەكانەوە گفتوگۆی بەردەوام لەگەڵ بەغدا دەكرێت، لەوانە بودجە و نەوت و ماددەی 140، بەڵام لە ڕاگەیاندنەكاندا ئاماژەی پێ ناكرێت و گفتوگۆكانیش بەردەوام دەبن، تاوەكو دەگەنە ڕێككەوتن".

ئاماژەى بەوەشکرد، هەنگاوی باش نراوە و گفتوگۆكان پێشوەچوونی باشیان بەخۆوە بینیوە، بۆیە گەشبینین بتوانن تاوەكو بودجە ڕەوانەی پەرلەمان دەكرێت، بگەنە ڕێككەوتن".

نوێنەری حكوومەتی هەرێمی كوردستان لە بەغدا رونیشیکردەوە، لەو كۆبوونەوەیەی لە نێوان حكومەتی هەرێم و فراكسیۆنەکانی كورددا بەڕێوە چوو، هەموو داتا و زانیارییان پێ درا بۆ ئەوەی بتوانن باشتر داكۆكی لە مافی كورد بكەن و بڕیارە لیژنەیەكی هاوبەشیش لە نێوان پەرلەمانی كوردستان و فراكسیۆنەکانی كورد لە پەرلەمانی عێراقدا دروست بكرێت بۆ ئەوەی هەماهەنگییەكی باش هەبێت.

پێشتریش جەمال كۆچەر، ئەندامی لیژنەی دارایی پەرلەمانی عێراق رایگەیاندبوو، گفتوگۆكانی حكومەتی هەرێمی كوردستان و بەغدا لەبارەی پشكی هەرێمی كوردستان لە پڕۆژەیاسای بودجەی گشتی عێراق بۆ ساڵی داهاتوو بەردەوامن و شاندیش بەردەوام سەردانی بەغدا دەكەن و گفتوگۆ لەو بارەیەوە دەكەن.

ئەو پەرلەمانتارە رونیشیکردەوە، كە ئەوەی باشە لە راگەیاندنەكان باس ناكرێت، تاوەكو دەگەنە رێككەوتن، چونكە من پێم باش نییە هەموو شتێك لە راگەیاندن باس بكرێت.

س.هـ






ads

زۆرترین خوێندراوە

  • ڕۆژ
  • هەفتە
  • مانگ
ads
ads

ads
ads
Developed by Avesta Group and powered by Microsoft Azure

Copyright © 2015 Shar Press. all rights reserved