شارپرێس:
هەڵبژاردنەكانی بزووتنەوەی گۆڕان بۆ خانەی راپەڕاندن و رێكخەری گشتی دەستیپێكردو میدیای ئەو بزووتنەوەش ناوی كاندیدەكان بۆ پۆستی رێكخەری گشتی و ئەندامانی خانەی راپەڕاندن ئاشكراكرد.
هەڵبژاردنی رێكخەری گشتی و ئەندامانی خانەی راپەڕاندنی بزووتنەوەی گۆڕان دەستیپێكرد و بەپێی زانیارییەكان هەریەك لە عومەر سەید عەلی و شۆرش حاجی خۆیان بۆ رێكخەری گشتی بزووتنەوەی گۆڕان كاندید كردووە.
لەلایەكی دیكەوە، ١٣ كەسیش بۆ شەش ئەندامی خانەی راپەڕاندن كێبڕكێ دەكەن و یەكێك لە ئەندامەكانی خانەی راپەڕاندنیش، كە سكرتێری جفاتی گشتییە، پێرێ هەڵبژێردراو راستەوخۆ بووە ئەندامی خانەی راپەڕاندن.
هەر بەپێی زانیارییەكان هەریەك لە عەدنان عوسمان و زمناكۆ جەلال خۆیان بۆ سكرتێری جڤاتی نیشتمانی و ئاسۆ رەحیم و شەماڵ عەبدول وەفا كاندیدی كاروباری باژێروانەكانن و دەرباز محەمەد و گەیلان شێخ عومەر كاندیدی كاروباری ژوورەكانن و جەلال جەوهەر كاندیدی كاروباری فراكسیۆنەكانە.
هاوكات هەریەك لە برزۆ مەجید، مونیرە عوسمان، عومەر حەمە حوسێن، قارەمان قادر كاندیدی سكرتێری كاروباری خەڵكن.
ئەمە لەكاتێكدایە هەریەك كاوە عەبدوڵا و ئاوارە سلێمان كشاونەتەوە لە خۆكاندیدكردن.
خانەی راپەڕاندنی بزوتنەوەی گۆڕان پێكدێت لە حەوت كەس، كە بریتیین لە رێكخەری گشتی و سكرتێری جڤاتی نیشتمانی و سكرتێری جڤاتی گشتی و سكرتێری فراكسیۆنەكان و سكرتێری باژێڕوانەكان و سكرتێری ژورەكان و سكرتێری خەڵك.
هـ ـ ح
