شارپرێس:
سەرچاوەیەكی ئاگاداری كوردی باس لەوردەكاری رێكەوتنێكی نوێ دەكات لەنێوان پارتی دیموكارتی كوردستان و بەرەی رزگاكردن بەسەرۆكایەتی ئوسامە نوجەیفی بۆ دانانی سنوورێك بۆ باڵادەستی پارتەكانی نزیك لەئێران لە نەینەوا و ناوچە كێشەلەسەرەكان .
ئەو سەرچاوەیە، كە داوای كردووە ناوەكەی ئاشكرا نەكرێت لەلێدوانێكدا وتی: بەرەی رزگاركردن بەسەرۆكایەتی ئوسامە نوجەیفی لەلایەن پارتی دیموكراتی كوردستانەوەو خودی مەسعود بارزانییەوە پشتیوانی دەكرێت.
سەرچاوەكە وتیشی: رێكەوتنێكی رانەگەیەنراو لەنێوان هەردوولا هەیە بۆ ئەوەی لەدوای هەڵبژاردن هاوپەیمانی دروست بكەن و پۆستەكانی پارێزگای نەینەوا لەنێوان خۆیاندا دابەش بكەن.
لەبەشێكی تری قسەكانیدا سەرچاوەكە وتی: لەیەك تێگەیشتنێك هەیە بۆ ئەوەی دەستەبەری ئەوە بكرێت تا لەهەڵبژاردنی داهاتووی ئەنجوومەنی پارێزگاكاندا دەنگی ئەو دوو لایەنە پەرش و بڵاونەبێت چەند پاڵێوراوێكی دیاریكراو بۆ چەند جێگایەكی ناوچە كێشەلەسەرەكان دابنرێت.
هەروەها سەرچاوەكە ئاماژەی بەوەش كرد، كە ئەو رێكەوتنە لەژێر چاودێری ئەمەریكییەكان كراوە و وەك هەوڵێكە بۆ رووبەڕووبوونەوە و دانانی سنوورێك بۆ هەژموون و باڵادەستی پارتەكانی نزیك لە ئێران لە پارێزگاكە .
رۆژی ١٤ی ئەیلوولی ٢٠١٩ لەشاری بەغدا، ئوسامە نوجەیفی سەرۆكی هاوپەیمانی بڕیاری عێراقی پارتێكی نوێی بەناوی بەرەی رزگاركردن و پەرەپێدان راگەیاند و كۆنگرەی یەكەمیشی بە بەشداری چەندین كەسایەتی سیاسی و ئەكادیمی و سەرۆك هۆز و نوێنەری ڕێكخراوەكانی كۆمەڵگەی مەدەنی بەست .
ئامادەكردن: ئاكۆ عەبدوڵڵا ئاڵی