شارپرێس:
نەخۆشییەکانی پووک کاریگەرییان لەسەر تەندرووستی دەم و
ددانەکان هەیە ، لە دیارترین نیشانەکانی نەخۆشی پووک بریتییە لە هەڵاوسانی پووک و
هەستەوەری ددان و بۆنی ناخۆشی ناو دەم .
لەپێناو دوورکەوتنەوە لە نەخۆشییەکانی پووک پێگەی
"لایف سترۆنگ" کۆمەڵێک چارەسەری جۆراوجۆری پێشنیاز کردووە کە دەکرێت
لەماڵەوە پەیرەویان لێبکرێت بەمجۆرەی خوارەوە :
رۆژانە ددانەکانت بشۆ بۆماوەی ٣ بۆ ٤ خولەک ، واباشترە
دوای هەموو ژەمێک یان ژەمێکی سووک ددانەکان بشۆردرێت .
بۆ رزگاربوون لە بەکتریا و ئەو تەنۆکە بچووکانەی خواردن
کە لەناو دەمدا دەمێنێتەوە دەبێت برێکی زۆر ئاو بخورێتەوە و گیراوەی ددان شوشتن
بەکاربهێنرێت ، هەربۆیە لەدوای گەڕان بەدوای گیراوەکانی دەم و ددان شووشتن بەدوای پێکهاتەلانی وەک (cetylpridinium
chloride) و (domiphen) بگەڕێین کە کلسی ددانەکان لادەبات .
تەنیا بۆماوەی سێ مانگ فڵچەی ددان سووشتن بەکاربهێنە و بیگۆڕە
بەیەکێکی تر ، هەوڵ بدە فڵچەیەکی زیادەت هەبێت و لەناو مێزی نووسینگەکەت یان لەناو ئۆتۆمبێلەکەت
هەڵیبگرە بۆئەوەی لەکاتی گەشتکردن یان بزربوونی ئەوەی تر لەبەردەستدابێت .
لەیادت نەچێت لەکاتی ددان شوشتندا بە فڵچەکان پووکت بشۆی
بۆئەوەی ئەو ماددەیەی بە پوکەوە نیشتووە لابچێت ، چونکە ئەو هەنگاوە سووڕی خوێن
چالاک دەکات و ئۆکسجینێکی زیاتر دەگەیەنێت
پووک ، بەوەش تەندرووستتر و بەهێزتر دەبێت .
هەوڵ بدە لەڕێگای دەستکەوتنی بڕێکی زۆرتر لە
ڤیتامین" د " لەناو سیستەمی خۆراکی و خواردنەوەی شیر و خواردنی ئەو خواردنانەی دەوڵەمەندن بە کالیسیۆم
وەک ماست و پەنیر و بادەم ددانەکانت بەهێزتر بکەیت.
وەرگێران: ئاکۆ عەبدوڵلا ئاڵی