شارپرێس:
لیژنەی دارایی لە ئەنجوومەنی نوێنەران پشكی هەرێم لە بودجەی فیدراڵی ساڵی ٢٠٢٠ ئاشكراكرد، ئەوەش لەدوای سەردانی شاندی هەرێمی كوردستان بۆ بەغداو رێككەوتن لەگەڵ حكومەتی عێراق .
حەنین قەدۆ ئەندامی لیژنەی دارایی لەلێدوانێكدا دەڵێت: شاندی هەرێم لەگەڵ حكومەتی بەغدا ڕێكەوتوون لەسەر ئەوەی لەسەرەتای ساڵی داهاتووەوە هەرێم رۆژانە ٢٥٠ هەزار بەرمیل نەوت رادەستی كۆمپانیای نیشتمانی بەبازاڕكردنی نەوتی عێراق (سۆمۆ) بكات.
هەروەها دەڵێت: شاندی هەرێم داوایان كردووە پشكی هەرێم لە بودجەی فیدراڵی ١٤% بێت لەجیاتی ١٢،٧%"..
لەبەشێكی تری لێدوانەكەیدا قەدۆ باسی لەوە كردووە، كە شاندی هەرێم رازی بوون پشكی هەرێم ١٢،٧% بێت و نیوەی داهاتی دەروازە سنوورییەكانی هەرێمیش رادەستی بەغدا بكەنەوە و نیوەكەی تریشی بۆ حكومەتی هەرێم بێت.
بەقسەی قەدۆ دۆخی سیاسی ئێستا دەسەڵاتدارانی هەرێمی ناچاركردووە لە دۆسییە ناكۆكەكاندا سازش بۆ بەغدا بكەن .
لەساڵانی رابردوو بابەتی رادەستكردنی نەوتی هەرێم بەبەغدا یەكێك بوو لە خاڵە سەرەكییەكانی ناكۆكییەكانی نێوان هەرێم و بەغدا، بەشێوەیەك پەرلەمانتارانی عێراق هەڕەشەی ئەوەیان دەكرد، كە بەبێ رادەستكردنی نەوت بە بەغدا هەرگیز ڕیگە نادەن جارێكی تر بەغدا پشكی هەرێم رەوانە بكات .
