دوای دەستدرێژی سەربازی بۆ سەر خۆپیشاندەران سوپای عێراق گەیشتە گۆڕەپانی تەحریر

عیراق

07/12/2019‌ 1242 جار خوێندراوه‌ته‌وه

شارپرێس:
بەگوێرەی ئاژانسی سپۆتنیكی رووسی دوای ئەوەی لەلایەن چەكدارانی نەناسراو و نیشانەشكێنەكانەوە تەقە لە خۆپیشاندەران كرا، هێزێكی سوپای عێراق گەیشتوونەتە گۆرەپانی تەحریر لەناوەراستی بەغدا .

بەگوێرەی شایەتحاڵەكان، ئەمڕۆ شەممە هێزەكانی سوپای عێراق بۆ كۆنترۆڵی دۆخی ئەمنی گەیشتوونەتە پردی سنك، ئەویش دوای ئەوەی چەند ئۆتۆمبیلێك دزەیان كردە ناوچەكە و بە فیشەكی زیندوو هێرشیان كردە سەر خۆپیشاندەران و ٦ خۆپیشاندەریان كوشت و دەیانیشیان بریندار كرد .

ئەو شایەتحاڵانە بەئاژانسی سپۆتنیكی وتووە، چەكدارە نەناسراوەكان بۆماوەی كاتژمێرێك زۆر بەچڕی تەقەیان لە خۆپیشاندەران كردووە، كە بەقسەی ئەو كەسە یەكێك لە چەكدارە دەمامكدارەكان چەكی نیشانەشكێنی پێبووە .

دوێنی بەهۆی تەقەی چەكدارە نەناسراوەكان لە خۆپیشاندەران لە نزیك پردی سنك و لەنزیك گۆڕەپانی تەحری لە ناوەراستی بەغدا  ، شەش خۆپیشاندەر گیانیان لەدەستدا و ٤٠ كەسی تریش بریندار بوون 

ئەو شایەتحاڵانە ئاماژەی بۆ ئەوە كردووە كە ئۆتۆمبێلێكی جۆری "پیك ئەپ"، كە چەند كەسێكی تێدا بووە هاتوونەتە گۆرەپانی تەحریر و داوایان كردووە لە پردی سنك بپەڕنەوە بەو بیانووەی خواردن و ژەمی ئێوارە بۆ خۆپیشاندەران دەهێنن .

 دوای ئەوەی ئۆتۆمبیلەكە گەیشتووەتە پردەكە چەند چەكدارێك دابەزیون، كە ٤ چەكی "بی كەی سی"یان پێبووە و بەشێوەیەكی هەڕەمەكی تەقەیان لە خۆپیشاندەران كردووە كە لە ئەنجامدا ژمارەیەك خۆپیشاندەر شەهید و بریندار بوون ، دواتریش چەكدارە نەناسراوەكان بەرەو شەقامی رەشید رۆیشتوون و ناوچەكەیان جێهێشتووە .

لەگەڵ بەردەوامی خۆپیشاندانەكان ، خۆپیشاندەرانی گۆرەپانی تەحریر و نزیك پردی كۆماری و سنك و ئەحرار لەلایەن خەڵكانی دەمامكردارەوە رووبەڕووی كردەوەی توندوتیژی وەك كوشتن لەڕێگای تەقەلێكردن و هێرشكردن بە گازی فرمێسكڕژێن و پەلاماردان بە چەقۆ دەبنەوە ، ئەوە جگە لە هەڕەشەكردن و رفاندنی چالاكانی خۆپیشاندانەكان .

بەگوێرەی سەرچاوەیەكی ناو كۆمسیۆنی مافی مرۆڤی عێراقیش ، تا ئێستا ژمارەی قوربانیانی خۆپیشاندانەكانی عێراق لە بەغدا و شارەكانی تری ناوەراست و باشووری عێراق گەیشتۆتە ٤٠٠ كوژراو و ١٩ هەزار بریندار.

وەرگێڕان: ئاكۆ عەبدوڵڵا ئاڵی