شارپرێس:
ئەو دوو حاڵەتەی لەماوەی كەمتر لە هەفتەیەكدا لە لوبنان روویدا نیگەرانی سەبارەت بە بەرزبوونەوەی حاڵەتەكانی خۆكوشتن لەناوچەی رۆژهەڵاتی ناوەراست زیادكردووە، كە ئەویش دەچێتە چوارچێوەی بەرزبوونەوەی ترسناكی دیاردەی خۆكوشتن لە جیهاندا .
ژمارەیەك زانای كۆمەڵناس وایدەبینن بەرزبوونەوەی حاڵەتەكانی خۆكوشتن بەهۆی گوشارە كۆمەڵایەتی و ئابوورییەكانەوەیە .
راپۆرتەكانی ئەمدواییە پشتگیری ئەو شیكردنەوەیەی زانا كۆمەڵناسەكان دەكەن بەشێوەیەك ژمارەو ئامارەكان ئاماژە بۆ بەرزبوونەوەی حاڵەتەكانی خۆكوشتن دەكەن لەو وڵاتانەی داهاتی تاك تێیاندا نزمە، یان مامناوەندە بەراورد بە وڵاتانی تر .
لەنوێترین راپۆرتدا، رێكخراوی تەندروستی جیهانیدا ئاماژە بۆ ئەوە كراوە، كە حاڵەتەكانی خۆكوشتن لە وڵاتانی كەم داهاتو داهات مامناوەند گەیشتووەتە ٧٩% هەموو حاڵەتەكانی خۆكوشتن لە جیهاندا .
راپۆرتەكە باسی لەوەش كردووە، كە ساڵانە نزیكەی ٨٠٠ هەزار كەس لە جیهاندا خۆیان دەكوژن .
بەو مانایە لە هەر ٤٠ چركەدا كەسێك لە جیهاندا خۆی دەكوژێت، بەوەش ژمارەی ئەوانەی خۆیان دەكوژن لە ژمارەی ئەوانە زیاترە، كە بەهۆی شەڕ و شۆڕشەكانەوە دەكوژرێن .
راپۆرتەكەی ڕێكخراوی تەندروستی جیهانی باس لەوە دەكات، كە ژمارەیەكی زۆری خەڵكیش ساڵانە هەوڵ دەدەن خۆیان بكوژن، بەڵام سەركەوتوو نابن .
بەوپێیە خۆكوشتن بۆ ئەوانەی تەمەنیان لەنێوان ١٥ بۆ ٢٩ ساڵیدایە دووەم هۆكاری مردنە لەجیهاندا .
وەرگێران: ئاكۆ عەبدوڵلا ئاڵی