شارپرێس:
كەشتیگەلی دەریایی سەربازیی بەچەكێكی كاریگەر هەژمار دەكرێت ئەگەر بێت و هەر وڵاتێك خاوەنی بێت ئەوە توانایەكی گەورە بەهێزە سەربازییەكەی دەبەخشێت .
بەگوێرەی گۆڤاری " ناشیۆناڵ ئینترێست "، لەجیهاندا پێنج وڵات خاوەنی بەهێزترین كەشتیگەلی سەربازین، كە ئەوانیش ئەمەریكا و چین و روسیا و بەریتانیا و یابانن .
ریزبەندی بەهێزترین كەشتیگەلە سەربازییەكان بەگوێرەی گۆڤارە ئەمەریكییەكە بەمجۆرەیە :
ئەمەریكا
ئەمەریكا بەهێزترین كەشتیگەلی جەنگی هەیە لەجیهاندا، بەجۆرێك كەشتیگەلەكە لە ٢٨٨ پارچەی دەریایی پێكهاتووە لەوانە ١٠ كەشتی فرۆكەهەڵگر و ٢٢ كۆرڤێت و ٦٢ كەشتی هێرشبەر و ١٧ فرقاتە و ٧٢ ژێردەریایی .
راپۆرتەكە ئاماژەی بۆ ئەوە كردووە، كە كەشتی و پارچە دەریاییەكانی تری سوپای ئەمەریكا لە زەریای هێمن و زەریای ئەتڵەسی و زەریای هیندی و دەریای ناوەراست و كەنداوی فارسی جێگیرن، هەروەك هێزەكە لە ١٠٩ هەزار سەرباز پێكهاتووە.
چین
لەگەڵ هەڵكشانی گەشەی ئابووری چین كەشتیگەلی جەنگی چینیش بەرەوپێشچوونێكی گەورەی بەخۆوە بینیوە، كە لەئێستادا لە كەشتییەكی فرۆكەهەڵگر و ٣ كەشتی دابەزاندنی جەنگی و ٢٥ كەشتی هێرشبەر و ٤٢ فرقاتە و ٨ ژێردەریایی، كە بە وزەی ناوەكی كار دەكەن ، لەگەڵ ٥٢ ژێردەریایی، كە بە وزەی كارەبا كار دەكەن .
روسیا
روسیا خۆی بەهێزێكی دەریایی گەورە هەژمار ناكات، بەڵام خاوەنی كەشتیگەلێكی جەنگی گەورەیە، كە لە ٧٩ پارچەی دەریایی گەورە پێكهاتووە لەوانە كەشتییەكی فرۆكەهەڵگرو ٥ كۆرڤێت و ١٣ كەشتی هێرشبەر و ٥٢ ژێردەریایی .
لەئێستادا روسیا كار لەسەر پێشخستنی كەشتیگەلە جەنگییەكەی‌و پڕچەككردنی بەچەكی ورد و كاریگەر دەكات .
بەریتانیا
هاوشان لەگەڵ كەمكردنەوەی سەرجەم بەشەكانی هێزە چەكدارەكانی بەریتانیا كەشتیگەلی جەنگی بەریتانیاش رووی لە بچووكبوونەوە كردووە، بەجۆرێك ئێستا لە ٤ كەشتی دابەزاندنی سەربازی و ١٩ فرقاتە و كەشتی هێرشبەر و ٧ ژێردەریایی، كە بە وزەی ناوەكی كار دەكات، لەگەڵ ٤ ژێردەریایی كە بەمووشەكی بالیستی پڕچەككراون .
ژاپۆن
لەریزبەندی پێنج كەشتیگەلییە جەنگییە بەهێزەكەی جیهان كەشتیگەلی ژاپۆن لەڕیزی دواوەدایە، كە لە ١١٤ پارچەی دەریایی پێكهاتووە لەناویاندا ٤٦ كەشتی هێرشبەر و ١٦ ژێردەریایی .
وەرگێڕان : ئاكۆ عەبدوڵڵا ئاڵی
