شارپرێس:
بەپرسیکى پارتى دیموکراتى کوردستان لە موسڵ رایده‌گه‌ێنێت  به‌پێی به‌ركه‌وته‌ی هه‌ڵبژاردن حزبەکەى 40 پۆستی به‌رده‌كه‌وێت و تاوه‌كو ئێستاش كۆمه‌ڵێك له‌و پۆستانەی‌ وه‌رگرتووه‌ و ئه‌وانه‌ی دیكه‌ش وه‌رده‌گرێت.

محیه‌دین مزووری، به‌رپرسی په‌یوه‌ندییه‌كانی لقی 14ی پارتی له‌ مووسڵ بەپێگەى فەرمى حزبەکەى راگەیاندوە، به‌پێی به‌ركه‌وته‌ی هه‌ڵبژاردن 30%ی پۆسته‌كانی ئیداره‌ی مووسڵ به‌ر پارتی ده‌كه‌ون كه‌ ده‌كاته‌ 40 پۆستی جۆراوجۆر.

ئاماژەى بەوەشکردوە،  تاوه‌كو ئێستاش پۆستی جێگری پارێزگار و به‌ڕێوەبه‌ری ته‌ندروستی و هاوكاری پارێزگار بۆ كاروباری ئیداری و به‌ڕێوەبه‌ری ئاو و كشتوكاڵ و به‌ڕێوەبه‌ری پۆلیسی گومرگ و به‌ڕێوەبه‌ری ناسنامه‌ و پاسپۆرتمان وه‌رگرتووه‌ و به‌رده‌وامیشین له‌ وه‌رگرتنی پۆستەکانی دیکەی بەرکەوتەی هەڵبژاردنی پارتی دیموکراتی کوردستان.

 بەرپرسەکەى پارتى روونیکردوەتەوە، به‌هۆی هاتنی پارێزگاری نوێوە ئه‌وانه‌ی دیكه‌یان وه‌رنه‌گرتووه‌، به‌ڵام قسه‌یان له‌گه‌ڵ كردووه‌ و ئه‌وانیش هه‌مووی وه‌رده‌گرن، چونكه‌ بەوتەى خۆى ئه‌وانه‌ مافی حزبەکەیەتى له‌ ئیداره‌ی پارێزگای مووسڵ.

لە ساڵى ٢٠١٤ کاتێک داعش موسڵى گرت ئەو شارە بەتەواوەتى کەوتە دەست داعش و هیچ ئیدارەیەکى حکومەتى عێراقى لێ نەما کە پێش داعش پارتى چەندین پۆستى لەو شارە هەبوو،ئیستا لەدواى کۆنترۆڵکردنەوەى شارەکەو گەڕانەوەى ئیدارەى بۆ موسڵ پارتى داواى پۆستەکانى دەکاتەوە.
س.هـ