شارپرێس:
ناوەندی ئاشتەوایی روسیا لە سوریا رایگەیاند، سوپای ئەمەریكا لەسەرەتای ساڵی نوێوە بە ١٣ كاروان، كە زیاتر لە ٣٠٠ بارهەڵگر چەك و تەقەمەنی و پێداویستی سەربازیان لە عێراقەوە رەوانەی رۆژئاوای كوردستان كردووە .
بەقسەی لیوا ئۆلیگ جۆراڤلۆڤ سەرۆكی ناوەندە ڕوسییەكە ئەو چەك و تەقەمەنی و كەلوپەلە سەربازییانەی ئەمەریكا رەوانەی رۆژئاوای كوردستانیان دەكات دژی بە هێزە سەربازییەكانی توركیا و خەڵكی مەدەنی ناوچەكە بەكاردەهێنرێن.
لەبەشێكی تری قسەكانیدا ئەو بەرپرسە سەربازییە روسە باسی لەوە كردووە، كە فەرماندەی هێزەكانی ئەمەریكا لەناوچەكە پرۆسەی دابینكردنی چڕوپڕی ناوچەكانی رۆژئاوای كوردستان بە چەك و تەقەمەنی بەڕێوە دەبات، بەجۆرێك تەنیا لەسەرەتای ساڵی ٢٠٢٠ وە لەڕێگای ١٣ كاروانی سەربازییەوە زیاتر لە ٣٠٠ بارهەڵگر چەك و تەقەمەنیان بەهەموو جۆرە چەك و چۆڵێك و پێداویستی سەربازی گەیاندووەتە رۆژئاوای كوردستان.
هەروەها جەختیشیكردووەتەوە، كە ئەو چەكە ئەمەریكییانە لەكاتی رووبەڕووبوونەوە و بەیەكدادانەكاندا لەلایەن گرووپە چەكدارییەكانی رۆژهەڵاتی فوڕاتەوە دژ بە یەكە سەربازییەكانی توركیا و خەڵكی مەدەنی ناوچەكە بەكاردەهێنرێن.
وەرگێران: ئاكۆ عەبدوڵڵا ئاڵی