چەكەكانی ئەمریكا چۆن دەگەنە سوریا؟

مەلەفی تایبەت

26/02/2020‌ 1801 جار خوێندراوه‌ته‌وه

شارپرێس:
بەو ناونیشانەی سەرەوە، گۆڤاری (غازیتا رو) راپۆرتێكی بڵاوكردووەتەوە دەربارەی ئەو پێشێلكارییە مەترسیدارانەی لە تۆماری ئەو چەكانەی ئەمریكادا هاتووە، كە  ڕادەستی هاوپەیمانەكانی كردووە لە سوریا و گەیشتنی بەدەست تیرۆریستەكان.

بەپێی راپۆرتەكە، سوپای ئەمریكا نەیتوانیوە بەدواداچوون بۆ ئەو چەكانە بكات، كە ناردویەتی بۆ هاوپەیمانەكانی لە جەنگی دژی داعشدا لە سوریا.

بەگوێرەی راپۆرتێكی پەنتاگۆن، كۆت و بەندی ورد لەسەر ئەو چەكانە نەبووە، كە نرخەكەی نزیكەی 715 ملیۆن دۆلار بووە و پێشێلكاری لەنێو بە كۆگا كردنیدا كراوە و سەدان و هەزاران پارچە چەك ونن، یاخود دزارون.

بۆ نموونە، نزیكەی 4100 پارچە چەك لە كۆگا نەپارێزراوەكانی بنكەی سەربازی ئەمریكا لە كوێت دانراوە و بەگوێرەی پێشێلكاریەكانی ڕیسای بەكۆگا كردنی چەك، هەندێكیان لەناوچوون.

راپۆرتەكەی پەنتاگۆن ئاماژە بۆ ئەوەش دەكات فەرمانبەرەكان ئەو كەلوپەلانەیان نەفرۆشتوە، یان خولاویان بۆ نەركردووە، كە بە دەستیان گەیشتووە، ئەمەش بووەتەمایەی پڕبوونی جبەخانەكان و پێشێلكاری لە رێكخستنی تۆمارەكانی چەك و بە فیرۆچوونی و دووسەریی لە فرۆشتنیدا، بەم شێوەیە، هەزاران پارچە چەك روبەروی لەناوچوون بووەتەوە.

دیارە ئەمە جاری یەكەم نییە پەنتاگۆن روبەروی كێشەی ئەژماركردنی چەك و رادەستكردن و فرۆشتن دەبێتەوە، لەساڵی 2017شدا پەنتاگۆن دانی بەوەدانا 90%ی ئەو چەكانەی لەحەشارگەكانی داعشدا دەستی بەسەردا گرتووە، پێشتر ئەمریكا رادەستی هاوپەیمانەكانی كردووە لە سوریا.

روسیاش لای خۆیەوە زۆربەی جار ئاماژە بۆ ئەوە دەكات ئەو چەكە ئەمریكییانەی دەچێتە خاكی سوریا دژی مەدەنییەكان و سوپای سوریا بەكاردەهێنرێت. 

بەگوێرەی قسەی سەرۆكی ناوەندی روسیا بۆ ئاشتەوایی نێوان لایەنە دژەكانی سوریا، چەكە ئەمریكییەكان لەسەرجەم شوێنەكانی ئەو دیو فورات بەكاردەهێنرێت و دۆخەكەش لە ناوچەكانی باكووری رۆژهەڵاتی سوریا زیاتر ئالۆز دەبێت بەهۆی ئەوەی چەكی زیاتر دەگاتە ئەم ناوچانە.

سەرچاوە: RT.Arabic
وەرگێڕان: حلمی رەسول رەزا