توركیا هۆشداریی ده‌دات به‌ هاووڵاتییانی له‌ كاتی گه‌شتكردنیان بۆ ئیتاڵیا و عێراق

عیراق

26/02/2020‌ 267 جار خوێندراوه‌ته‌وه

شارپرێس:
وه‌زاره‌تی ده‌ره‌وه‌ی توركیا داوای له‌ هاووڵاتییانی ده‌كات، ئه‌گه‌ر ناچار نه‌بن سه‌ردانی ئه‌و ناوچانه‌ی هه‌ریه‌ك له‌ عێراق و ئیتاڵیا نه‌كه‌ن، كه‌ ڤایرۆسی نوێی كۆرۆنا (كۆڤید-١٩)ی تیایاندا تۆماركراوه‌.

وه‌زاره‌تی ده‌ره‌وه‌ی توركیا له‌ راگه‌یه‌نراوێكدا رایگه‌یاندووه‌، له‌ ئیتاڵیا هه‌ڵكشان له‌ ژماره‌ی حاڵه‌ته‌كانی تووشبوون به‌ ڤایرۆسی كۆرۆنا و مردن به‌هۆی تووشبوون به‌ ڤایرۆسه‌كه‌، زیادیكردووه‌.

ئاماژه‌ی به‌وه‌شكردووه‌، "به‌ گرنگییه‌وه‌ ئامۆژگاریی هاووڵاتییانی توركیا ده‌كه‌ین كه‌ ئه‌گه‌ر ناچار نه‌بن گه‌شت بۆ ئەو ناوچانه‌ی ئیتاڵیا نه‌كه‌ن كه‌ حاڵه‌ته‌كانی تووشبوون به‌ ڤایرۆسی كۆرۆنایان تیایاندا تۆماركراوه‌".

هه‌روه‌ها داوا له‌ هاووڵاتییانی توركیا كراوه‌ كه‌ لە ئیتاڵیان یان ناچارن گه‌شت بۆ ئه‌و وڵاته‌ بكه‌ن، گرنگی زۆر به‌ ته‌ندروستییان بده‌ن و بایه‌خ به‌ راگه‌یه‌نراو و هۆشدارییه‌كانی هه‌ریه‌ك له‌ باڵیۆزخانه‌ی توركیا له‌ رۆما، كۆنسولخانه‌ی توركیا له‌ میلان و كاربه‌ده‌سته‌ فه‌رمییه‌كانی ئیتاڵیا و رێكخراوی ته‌ندروستی جیهانی بده‌ن.

له‌لایه‌كی دیكه‌وه‌ وه‌زاره‌ته‌كه‌ هۆشدارییه‌كی له‌باره‌ی گه‌شتكردن بۆ عێراق بڵاوكردووه‌ته‌وه‌ و ئاماژه‌ی به‌وه‌كردووه‌ ژماره‌ی حاڵه‌ته‌كانی تووشبوون به‌ ڤایرۆسی نوێی كۆرۆنا (كۆڤید-١٩) روو له‌ زیادبوونه‌.

له‌ هۆشدارییه‌كه‌دا هاتووه‌،"هاووڵاتییانمان ئه‌گه‌ر ناچار نه‌بوون، گه‌شت بۆ ئه‌و ناوچانه‌ی عێراق نه‌كه‌ن كه‌ حاڵه‌ته‌كانی تووشبوون به‌ كۆرۆنایان تیایاندا تۆماركراوه‌، نه‌كه‌ن و ئه‌گه‌ر گه‌شتیان بۆ عێراق كرد خۆیان له‌و ناوچانه‌ به‌دوور بگرن كه‌ حاڵه‌ته‌كانی تووشبوون به‌ ڤایرۆسه‌كه‌ تیایندا تۆماركراوه‌".

هه‌روه‌ها داوا له‌ هاووڵاتییانی توركیا كراوه‌ كه‌ لە عێراقن یان ناچارن گه‌شت بۆ ئه‌و وڵاته‌ بكه‌ن، گرنگی زۆر به‌ ته‌ندروستییان بده‌ن و بایه‌خ به‌ راگه‌یه‌نراو و هۆشدارییه‌كانی هه‌ریه‌ك له‌ باڵیۆزخانه‌ی توركیا له‌ به‌غدا، كۆنسولخانه‌ی توركیا له‌ هه‌ولێر و كاربه‌ده‌سته‌ فه‌رمییه‌كانی عێراق و رێكخراوی ته‌ندروستی جیهانی بده‌ن.

بەپەلە