هاوپەیمانی نێودەوڵەتیی: لەسەردەمی کازمیدا هەماهەنگییەکانمان لەگەڵ عێراق زیادی کردووە

عیراق

05/06/2020‌ 282 جار خوێندراوه‌ته‌وه

شارپرێس:

جەنەراڵ مایڵز کاکینز وتەبێژی هاوپەیمانی نێودەوڵەتیی دژ بە داعش جەختی کردۆتەوە کە لەدوای بوون بە سەرۆک وەزیرانی مستەفا کازمی پەیوەندییەکانی نێوان هاوپەیمانی نێودەوڵەتی و هێزە عێراقییەکان رووی لەبەهێز بوون کردووە .


وتەبێژی هاوپەیمانی نێودەوڵەتی رایگەیاند، کە هاوپەیانێتییەکەیان لەڕێگای هێرشی ئاسمانییەوە بۆسەر پێگەکانی داعش پشتیوانی هێزە عێراقییەکانیان کردووە بەجۆرێک لەمدواییەدا ٤٥ هێرشی ئاسمانیان کردۆتەوە سەر مۆڵگەکانی ئەو ڕێکخراوە تیرۆریستییە .


کاکینز لەبەشێکی تری لێدوانەکەیدا باسی لە هەماهەنگییەکانیان لەگەڵ هێزەکانی سوریای دیموکرات کردووە و رایگەیاندوە، ئەوان پشتیوانی هێزەکانی سوریای دیموکرات دەکەن بەتایبەت لەو ناوچانەی شانە نووستووەکانی ڕێکخراوی تیرۆرستی داعشی لێیە ، بۆئەوەش چەندین هێرشی ئاسمانیان کردۆتە سەر پێگەکانی ڕێکخراوی تیرۆریستی داعش لە سوریا ، بەتایبەت لەناوچەی دێرەزوور و رۆژهەڵاتی فورات.  


بەقسەی کاکینز ئامانجی سەرەکی ئەوان ئەوەیە کە بوار بۆ داعش نەرەخسێنرێت لە عێراق  وسوریا خۆی ڕێکبخاتەوە ، هەربۆیە بەردەوام دەبن لە هێرشەکانیان بۆسەر داعش تا ئەوکاتەی بەتەواوەتی لەنێو دەبرین .
سەربارەت بە شانە نووستووەکانی داعش ، کاکینز گوتویەتی ئەوان ژمارەی شانە نوستووەکانی داعش نازانن ، بەڵام گومانیان هەیە ئەو ڕێکخراوە لەئێستادا بتوانێت ناوچەیەکی تەواوەتی داگیر بکات ، بەڵکو تەنیا لەچەند ناوچەیەک بۆمب لەسەر ڕێگاکان دەچێنن .


ئەو ئاماژەی بۆ ئەوە کردووە کە ڕوون نییە کاتی پێویست بۆ کۆتایی هێنانی یەکجارەکی داعش چەندە ، بەڵام بۆ ئەو مەبەستە ئەوان لەگەڵ هێزە عێراقییەکان و هێزەکانی سوریای دیموکرات هەماهەنگی دەکەن ، بەشێوەیەک وڵاتە یەکگرتووەکانی ئەمەریکا ملیارێک دۆلاری لە یارمەتیی مرۆیی و سەربازییەکان لەو ناوچانە خەرج کردووە .


کاکینز جەختی کردۆتەوە کە دانانی مستەفا کازمی بەسەرۆک وەزیران پەیوەندی و هەماهەنگییەکانی نێوان هێزە عێراقییەکان و هاوپەیمانی نێودەوڵەتی بەهێز کردووە ، هەروەک لەماوەی هەفتەی رابردوودا هاوپەیمانێتییەکە پرۆسەیەکی سەربازی هاوبەشیان لەگەڵ هێزەکانی پیشمەرگە و هێزە عێراقییەکان ئەنجامدا .

وەرگێڕان : ئاکۆ عەبدوڵلا ئاڵی

بەپەلە