شارپرێس:
وتەبێژی فراكسیۆنی پارتی دیموكراتی كوردستان لە ئەنجومەنی نوێنەرانی عێراق رایگەیاند، لە ئێستادا عێراق كێشەی گەورەی هەیە لە یاسای هەڵبژاردندا و لەسەر چۆنیەتی دابەشكردنی بازنەكانی هەڵبژاردنیش گرفت زۆرە، بۆیە هیچ هەڵبژاردنێك ناكرێت.
ئارام ناجی باڵەتەیی، وتەبێژی فراكسیۆنی پارتی بۆ میدیای حیزبەكەی وتی: ئەو ناكۆكی و كێشانەی لە یاسای هەڵبژاردندا هەن، كێشەی كۆن و قووڵن لە نێوان لایەنە سیاسییەكانی عێراقدا و هەندێك لایەن پێیان وایە هەڵبژاردن لەسەر ئاستی پارێزگا بێت و هەندێكی دیكەش پێیان باشە بكرێتە چەندین بازنە.
وتیشی: ئەوە لەلایەك، لە لایەكی ترەوە ڕەخنەی زۆر لەسەر كۆمسیۆنی هەڵبژاردن لەسەر دانانی كادری ناوەندی هەیە و ئەم كۆمسیۆنە شارەزاییەكی باشیان نییە، بۆیە كێشە كەوتووەتە نێوان لایەنە سیاسییەكانەوە.
مستەفا كازمی، سەرۆكوەزیرانی عێراق، رۆژی ٦/٦/٢٠٢١ـی دیاری كردووە بۆ هەڵبژاردنی پێشوەختە، هەندێك لایەنی عێراقی دەڵێن: دەبێت هەڵبژاردن زووتر لە كاتی خۆی بكرێت.
لەو بارەیەشەوە باڵەتەیی دەڵێت: جگە لەم كێشانە، عێراق كێشەی دارایی هەیە و كەوتووەتە قەیرانێكی قووڵەوە، بۆیە ناتوانێت هەڵبژاردن لەمساڵدا بكات.
هـ ـ ح
