شارپرێس:
لێکۆڵینەوەیەکی نوێی ئەمەریکی کە لەسەر ٣٠٠٠ کەس کراوە کە لەنەخۆشخانەکانی ئەمەریکا چارەسەرکراون ، دەریخستووە کەسانی پێگەیشتوو ( ١٨ بۆ ٣٤ ساڵ) ئەوانەی بەدەست قەڵەوی و نەخۆشیی شەکرە و بەرزبوونەوەی پەستانی خوێنەوە دەناڵێنن ، لەکاتی تووشبوونیان بە ڤایرۆسی کۆڕۆنا ،  بەراورد بە کەسانی تر زیاتر ئەگەری گیانلەدەستدانیان هەیە و زیاتر پێویستیان بە هەناسەدانی دەستکرد دەبێت .

لێکۆڵینەوەکە ئەوەیشی پیشانداوە کە کەسانی رەشپێست و ئەمەریکییە بەرەگەز لاتینییەکان لە رەگەزەکانی تر زیاتر ڤایرۆسەکە زیانی پێگەیاندوون، بەشێوەیەک ژمارەی گەنجەکانیان ئەوانەی لەنەخۆشخانەکاندا چارەسەریا بۆکراوە گەیشتۆتە ٥٧٪ ، جگە لەوەی رەشپێست و لاتینییەکان ئەوانەی بەهۆی ڤایرۆسەکەوە گیانیان لەدەستداوە یان پێویستیان بە ئۆکسجینی دەستکرد بووە گەیشتۆتە ٤٩٪ لەکاتێکدا ئەوان ڕێژەی ٣٣٪ی خەڵکی ئەمەریکی پێکدەهێنن .

بەشێکی تری لێکۆڵینەوەکە ئاماژەی بۆ ئەوە کردووە کە ئەو گەنجانەی بەدەست نەخۆشییەکانی (قەڵەوی لەڕاددەبەدەر و شەکرە و بەرزەپەستانی خوێن)ەوە دەناڵێنن، ئەوە بەگوێرەی لێکۆڵەران بەهەمان ئەندازەی کەسانی پێگەیشتووی چینە تەمەنەکانی (٣٥ بۆ ٦٤ ساڵ) مەترسیی گیان لەدەستدانیانیان هەیە یان پێویستیان بە ئامێری هەناسەدانی دەستکرد دەبێت .

ئەو لێکۆڵینەوەیە دەچێتە پاڵ ئەو زنجیرە لێکۆڵینەوانەی تر کە ئاماژە بۆ ئەوە دەکەن کەسانی قەڵەو لەکەسانی تر زیاتر مەترسیی لێکەوتەکانی ڤایرۆسی کۆڕۆنایان لەسەر دەبێت .

وەرگێڕان : ئاکۆ ئاڵی