بایدن بەڕاوێژ لەگەڵ ڕوسیا ڕێنمایی تازەی سەبارەت بەسوریا گەڵاڵەكردوە

مەلەفی تایبەت

18/02/2021‌ 2174 جار خوێندراوه‌ته‌وه

شارپرێس:

سەرچاوەیەكی ئاگاداری نزیك لەسەركردایەتی باڵای ڕوسیا ئاشكرایكردوە، ئیدارە تازەكەی ئەمریكا بەسەرۆكایەتی جۆ بایدن بەڕاوێژ لەگەڵ ڕوسیا چەند ڕێنماییەكی تازەی سەبارەت بەچۆنێتی مامەڵەكردن لەگەڵ پرسی سوریادا ده‌ركردوە.

سەرچاوەكە ئەوەشی دوپاتكردۆتەوە، ئەمریكاو ڕوسیا لەوبارەوە بیروڕایان ئاڵوگۆڕكردوەو لەپەیوەندی بەردەوامدان سەبارەت بەچۆنێتی مامەڵەكردن لەگەڵ پرسی سوریا لەقۆناغی ئایندەدا.

ڕامی شاعر كە دبلۆماتكارێكی نزیكە لەسەركردایەتی ڕوسیا، لەوتارێكیدا كە لەپێگەی ئەلیكترۆنی (ڕوسیای ئەمڕۆ)دا بڵاویكردۆتەوە، تیشكی خستۆتەسەر ستراتیژیەتێكی تازە كە وردە وردە خەریكە لای جۆ بایدنی سەرۆكی ئەمریكا گەڵاڵە دەبێت سەبارەت بەچەند پرسێكی جۆراوجۆرو بەتایبەتیش پرسی سوریا.

شاعر ئاماژەی بەوەشكردوە، جۆ بایدن چەند ڕێنماییەكی تازەی سەبارەت بەسوریا دەركردوە، بەو ئامانجەی ڕۆڵی واشنتۆن كاراترو فراوانتر بكات لەمامەڵەكردن لەگەڵ ئەو دۆسییانەدا، هەروەها بەشدارییەكی كاریگەریشی هەبێت لەچارەسەركردنی چەند پرسێكی جۆراوجۆری ڕۆژهەڵاتی ناوەڕاست‌و ناوچەكانی دیكەی جیهان.

دبلۆماتكاری ناوبراو ئەوەشی ڕونكردۆتەوە، ئەو ڕێنماییە تازانە بریتین لەپێكهێنانی چەند تیمێكی پسپۆڕو شارەزا كە بتوانن ڕۆڵە پێشەنگە دبلۆماتییەكەی ویلایەتە یەكگرتوەكانی ئەمریكا لەسەر ئاستی نێودەوڵەتی بەهێزبكەنەوە، ئەمەش دوای ئەوەی ئەو ڕۆڵە دبلۆماتییە لەسەردەمی ئیدارەكەی دۆناڵد ترەمپدا تاڕادەیەك لاوازی تێكەوتوە.

ئەو دبلۆماتكارە كە نزیكە لەوەزارەتی دەرەوەی ڕوسیا ئاشكرایكردوە، لەم ماوەی پێشودا ئیدارەی بایدن سەبارەت بەپرسی سوریا ڕاوێژیان لەگەڵ سەركردایەتی باڵای ڕوسیا كردوە.

شاعر لەمیانەی قسەكانیدا ئەوەشی وتوە، پەیوەندی بەردەوامی واشنتۆن‌و مۆسكۆ لەمەڕ پرسی سوریا، ئاماژەو پێوەرێكی ئەرێنییە، هەرچەندە ئەمریكا پێشتر بانگهێشتی فەرمی ڕوسیای ڕەتكردۆتەوە بۆ بەشداریكردن لەگەڕی پازدەیەمی كۆبونەوەكانی ئەستانە.

شاعر بۆچونى وایە، ئەمریكا لەماوەی ئایندەدا بەشدارییەكی كاراو گەرموگوڕ دەكات لەو كۆبونەوانەی سەبارەت بەدۆخی سوریا بەڕێوەدەچن.

جه‌ختیكردۆته‌وه‌، ئیدارەكەی بایدن بەلایەنی كەمەوە پێویستی بەدوو مانگ هەیە تاوەكو بتوانێت دیدگاو بۆچونێكی ڕون‌و ئاشكرا سەبارەت بەدۆسییەی سوریا گەڵاڵە بكات.

ئاماژەی بەوەشكردوه‌، ئەم قۆناغەی ئێستا پێویستی بەوەیە ڕژێم‌و ئۆپۆزسیۆنی سوریا پێشنیازى جۆراوجۆر بخەنەڕوو بەمەبەستی چارەسەركردنی تەنگژەی وڵاتەكەیان.

ناوبراو پێداگری لەسەر گرنگی گرتنەبەری چەند هەنگاوێك كرد لەلایەن ڕژێم‌و ئۆپۆزسیۆنەوە بەمەبەستی گەیشتن بەچارەسەرێكی سیاسی بۆ دۆسییەی سوریا، تاوەكو كۆمەڵگای نێودەوڵەتیش بتوانێت یارمەتیدەربێت‌و بەشێوەیەكی ڕاستەوخۆش كارئاسانی بۆ چارەسەركردنی تەنگژەكانی ئەو وڵاتە بكات.

دبلۆماتكاری ناوبراو جەختی لەوەشكردەوە، پێویستە بەرپرسانی ڕژێمەكەی سوریا پەی بەوەبەرن كە بێ جێبەجێكردنی بڕیاری 2254ی ئەنجومەنی ئاسایشی نیودەوڵەتی، ناتوانن سوریا لەو كارەسات‌و مەرگەساتانەی ئێستا دەربازبكەن، بۆیە پێویستە واز لەو خەیاڵپڵاوییە بێنن.

به‌وته‌ى شاعر، "زۆر گرنگە سورییەكان لەژێر چەتری نەتەوەیەكگرتوەكان‌و سایەو سێبەری كۆمەڵەی ئەستانادا چارەسەرێك بۆ تەنگژەكەیان بدۆزنەوە، ئەمەش لەڕێگەی ئەو نەخشە ڕێگایەی كۆنگرەی دانوستانی نیشتمانی سوری- سوری پێش دووساڵ‌و نیو لەسوچی لەسەری ڕێككەوتون".

شاعر باسی لەو پێنوێنانە (مۆشرات) ئەرێنییانەش كردوە كە پەیوەستن بەگەڕانەوەی پەیوەندییەكانی نێوان ڕژێمی سوریاو چەند دەوڵەتێكی عەرەبی‌و بەتایبەتیش شانشینی عەرەبستانی سعودی.

ناوبراو لەوبارەوە وتویه‌تى:"سعودیە ئامادەباشی خۆی نیشانداوە پشكداری لەگەیشتن بەچارەسەرێك بۆ پرسی سوریاو سەرجەم دۆسییەكانی دیكەی ڕۆژهەڵاتی ناوەڕاست بكات، ئەمەش بەڕون‌و ئاشكرایی لەو پەیوەندییە تەلەفۆنییەدا دەركەوت كە دوشەممەی ڕابردوو لەنێوان ڤلادیمێر پۆتینی سەرۆكی ڕوسیاو محەمەد بن سەلمانی جێنشینی سعودیەدا ئەنجامدرا".

وەرگێڕان: لوقمان حاجی قادر
پێگەی ئەلیكترۆنی: تەیف پۆست