شارپرێس:
پیپ گواردیۆلای ڕاهێنەری مانچستەر سیتی هەڵوێستی كۆتایی خۆی و یانەكەی سەبارەت بە هالاند دەربڕی و كە لە ئێستادا نایانەوێت گرێبەست لەگەڵ ئەو یاریزانە واژۆ بكەن.

ئیرلینگ هالاندی تەمەن 20 ساڵی نەرویجی و یاریزانی بروسیا دۆرتمۆند، لەلایەن زۆرێك لە یانەكانەوە چاوی خراوەتە سەر، بە تایبەتی لەلایەن مانچستەر سیتی و ڕیاڵ مەدرید و بەرشەلۆنە.

لە ئێستادا مینیۆ ڕایۆڵای بەڕێوبەری كارەكانی هالاند دەچێتە لای یانەكان بۆ ئەوەی بزانێت چی پێشكەشی هالاند دەكەن و كام یانە زۆرترین خزمەتگوزاری پێشكەش دەكەن.

لەكۆنگرەیەكی ڕۆژنامەوانیدا، پیپ گواردیۆلای ئیسپانی ووتی: "هالاند یاریزانێكی بەتوانایە، تەنانەت كەسێكی نابینایش ناتوانێت ئینكاری لەوە بكات كە هالاند لە چاو تەمەنەكەیەوە ئاستێكی باڵای هەیە".

پیپ ووتی: "بەڵام ئێمە وەكو مانچستەر سیتی ئامادە نین 100 ملیۆن یۆرۆ بە یاریزانێك بدەین، من باوەڕم وایە تۆپی پێ بە كۆمەڵ دەكرێت پەیوەست نییە بە تەنها یاریزانێكەوە".

هەروەها ووتی: "لەگەڵ ئیدارەی یانەی مانچستەر سیتی قسەمان كردووە، نازانین لە داهاتوودا چی ڕوودەدات، بەڵام لە ئێستادا خواستمان لەسەر ئەو گرێبەستە نییە".
ڕەنج ڕەسوڵ