ناوچە جێناکۆکەکان لەبەردەم مەترسییەکی گەورەی تەعریب و داگیرکردندا

ڕاپۆرت

13/06/2021‌ 1115 جار خوێندراوه‌ته‌وه

شارپرێس:

ئامارەکان ئاماژەی ترسناکیان تێدایەو دەسەلاتدارانی کوردیش هیچیان لە دەستنایەت.

رۆژ بەرۆژ دانیشتوانی کورد لەو ناوچانە کەم دەکەن و کەسیش باکی بە دۆخەکە نییە.

دانیشتوانی ناوچەکان بونەتە قوربانیی یەکەم لە دۆخەکەو حزبە کوردیەکانیش خەریکی بازرگانین بە دۆخی ناوچەکانەوە.

پارتی و یەکێتی تا ئێستاش لەسەر تەنها دەستەواژەیەک ڕێک نەکەوتوون بۆ وەسفی ئەو ناوچانەو دانیشتوانەکەشی چاویان لە دەستی ئەو دوو حزبەیە بۆ ڕزگارکردنیان لە نەهامەتی.

کەرکوک قودسی کوردستانە... کەرکوک دڵی کوردستانە.. کەرکوک ناسنامەمانە، یان کەرکوک و خانەقین یان تا ماوین دەجەنگین....

 ئەمانە و دەیان دەستەواژەی دیکە، پێناسەی یەکێتی و پارتین لەبارەی کەرکوک و خانەقینەوە...

 بۆیە ئەگەر لەدوورەوە تەماشای ئەو دەستەواژانە بکەیت دەڵێی، یەکێتی و پارتی ئامادەن لەسەر کەرکوک شەڕی گەورە بەرپا بکەن و تا دوا دوا دڵۆپی خونیان بەرگری لە ماف و ئازادی و کەرامەتی دانشتوانەکەی بکەن، بەڵام ئاخۆ لەسەر ئەرزی واقع ئەوە چەند ڕاستە؟ ئێستا کە دۆخی هەرێمی کوردستان و پەیوەندییەکانی ئەو دوو حزبە و دۆخی عێراقیش لە بارێکی ناجێگیردایە، کورد چی بۆ کەرکوک پێیە، کە مێژووی شەڕکردنی لەسەر ئەو پارێزگایە بۆ چەندین دەیەی ڕابردوو دەگەڕێتەوە؟

هەرچەندە ڕووداوەکانی دوای ڕیفراندۆمەکەی ساڵی 2017ی هەرێمی کوردستان هۆکارێکی سەرەکی بوو بۆ پاشەکشێی کورد لە کەرکوک و ناوچە جێناکۆکەکانی دیکە، بەڵام ئەوە تاکە هۆکار نییە، بەڵکو بە ڕای چاودێران و تەنانەت هەنێک بەرپرسی ئەو دوو حزبە، کورتبینی سەرکردایەتی سیاسی کورد و یاریکردن بە هەستی نەتەوەکانی دیکەی ئەو ناوچانە و خراپ ئیدارەدانی ناوچەکان کاتێک کورد تیایدا باڵادەست بوو، دیاترین هۆکارەکانی دیکەی پاشەکشێی کوردن لە ناوچە جێناکۆکەکان...

لە دروشمی یەكێتی و پارتیدا ئەگەر تەماشا بکەیت یەک شێوە مامەڵەکردن هەیە لەبەرامبەر ناوچە جێناکۆکەکان و هەردوو حزبەکە بە ئەندازەی نزیکیی بیرورایان، داکۆکی لەو ناوچانە دەکەن، بەڵام لەجەوهەردا هەر وەک ناوەکە خۆی کە دەگوترێت "جێناکۆک" یەکێتی و پارتیش ناکۆکن، بۆ نمونە پارتی بە ناوچە کوردستانیەکانی دەرەوەی ئیدارەی هەرێم و یەکێتی بە ناوچە کێشە لەسەرەکان ناوی دەبات...

دانیشتوانی ئەو ناوچانەی کە تا ئێشتاش یەکێتی و پارتی لەسەر دەستەواژەیەک رێکنەکەوتوون بۆ وەسفکردنی، ساڵانێکە دەناڵینن بە دەست داگیرکاردنی موڵک و ماڵ و ڕوخاندنی خانو و سوتاندنی ڕەز و باخ و کشتوکاڵ تا کوشتنی خودی خۆیان.
ئەوان وەک خۆیان دەلێن رۆژ نییە کەرامەتی تاکی کورد هەنجن هەنجن نەکرێت و هیچیشمان لەدەست نایەت، بۆیە ناچار بە جێهیشتنی زێدی خۆیان و کۆچکردن بۆ سلێمانی و هەولێر دەبن کە، ئەمەش دیسانەوە کارەساتێکی گەورەی لە دوایە.

شێخ جەعفەر مستەفا، بەرپرسی لقی 16ی پارتی لە خانەقین لە نوێترین چاوپێکەوتنیدا، باسی لە ئامارێکی مەترسیداری گوندە کوردییەکانی سنورەکەی کرد و وتی لە کۆی 48 گوندی مەندەلی یەک گوند ماوە کە چۆڵنەکرابێت و ئەوانەی دیکە سەرجەمیان چۆڵکراون، کە بەوتەی بەرپرسەکەی پارتی، داعش هۆکاری چۆڵکردنی ئەو گوندانە نییە، بەڵکو حەشدی شەعبی هۆکارە، ئەو بەرپرسەی پارتی ڕێژەی دانیشتوانی کوردی لەو ناوچانە بە کەمتر لە لەسەدا پێنج مەزەندە کرد بە پێی ئەوا ئامارانەی کە خستیە روو، لە کاتیکدا هەر بە وتەی خۆی  پێشتر لانیکەم لەسەدا شەستی ئەو ناوچانە کورد نشین بوون.

دۆخی خراپی پارتی و یەکێتی لە هەرێمی کوردستان، ڕاستەوخۆ ڕەنگدانەوەی لەسەر دۆخی کورد لە کەرکوک هەیە، بۆ نمونە سەرجەم حزبە کوردییەکان بەبێ پارتی مانگانە چەند جارێک کۆدەبنەوە و لێکتێگەیشتنی هاوبەشیان هەیە، بەڵام پارتی هیچ کاتێک بەشداریی لەو کۆبوونەوان ناکات و لەسەر ئاستی باڵای ئەو حزبەش پاساوی ئامادەنەبوونیان یەک ڕستەیە کە بەردەوام دەیڵێنەوە "ئێمە ناچینەوە نێو کەرکوک کە ئێستا حوکمی سەربازیی بەڕێوەی دەبات"...

ئێستا کە عێراق لە سەروبەندی نزیکبوونەوەیە لە هەڵبژاردنی پێشوەختەی پەرلەمان، کورد لە کەرکوک گورزێکی دیکەی کاریگەری بەرکەوتوە، ئەویش ئەوەیە بەگوێرەی ڕێژەی کورد لەو پارێزگایە، دەبوو 50%ی پۆستەکانی نوسینگەی کۆمسیۆنی هەڵبژاردن لە کەرکوک بەدەست کوردەوە بێت، بەڵام وەک محەمەد عوسمان، بەرپرسی مەڵبەندی دووی یەکێتی لەکەرکوک دەڵێت، ئەوان 25%ی پۆستەکانی کۆمسیۆنی کەرکوکیشیان بەدەستەوە نییە.

بەهۆی داواکاری و گوشاری بەشێک لە تورکمان و عەرەبەکانی کەرکووک، لە ئۆفیسی کەرکووکی کۆمیسیۆنی باڵای سەربەخۆی هەڵبژاردنەکان گۆڕانکاری کراوە، تادێت پشکی کورد لە کۆمسیۆنەکە کەمدەکرێتەوە.

لەشەنگال دۆخەکە خراپترە، لەلایەک وێرانبوونی قەزاکە و لەلایەکی دیکە بوونی حەشدی شەعبی بە تەواوی هێزی خۆیەوە لەو قەزایە، وایکردوە پێشبینیکردنی ئایندەی کورد لەو قەزایە قورس بێت، هەرچەندە هەولێر و بەغدا مانگی ئەیلولی ساڵی ڕابردوو لەسەر دۆخی شەنگال و کشانەوەی هێزە چەکدارەکان گەیشتنە ڕێککەوتن، بەڵام ڕێککەوتنەکە بە مردوویی لەدایکبوو

ئەگەر جاران عەرەبی سوننەی ناوچە جێناکۆکەکان تەنیا پاڵپشتییەکەیان تورکیا بوبێت، ئێستا حەشدی شەعبی بۆ زیادبووە و کار گەیشتووەتە ئەوەی کورد لەو ناوچانە یەکێک لەو دوو بژاردەیە هەڵبژێرێت، یان بێدەنگبوون وەک زۆرینەی لایەنە سیاسییە کوردییەکان، یان نەگەڕانەوە بۆ ئەو ناوچانە وەک پارتی، لەم نێوەندەشدا باجەکەی خەڵکیی لەسەر حسابی کەمی خزمەتگوزاریی و کێشەی ئەمنیی و داگیرکردنی موڵک و ماڵیان و شکاندنی شکۆی تاکی کورد دەیدات.